Burundi: Térence Mushano wari wafunzwe ari kuvugana n'abanyamakuru, yarekuwe

Térence Mushano, umukozi wo ku kibuga cy'indege cya Bujumbura akaba na visi perezida n'umuvugizi w'ishyirahamwe ryigenga AC Génocide-Cirimoso, wari ufunze kuva kuwa gatanu ushize, yarekuwe nk'uko byemezwa n'umunyamategeko w'iryo shyirahamwe.

BBC yagerageje kuvugana na polisi y'u Burundi ku biregwa Bwana Mushano no ku irekurwa rye ariko ntibyakunze.

Bwana Mushano yafunzwe nyuma yo kuganira n'abanyamakuru ba Journal Iwacu - ikiganiro cyaburijwemo - bari bamusanze aho akorera nk'uko uyu munyamategeko yabibwiye BBC.

Umunyamategeko Remy Kururu wa AC Génocide-Cirimoso yabwiye BBC ko Bwana Mushano yarekuwe ejo kuwa gatatu ahagana saa kumi n'ebyiri z'umugoroba.

Ati: "Nyuma yo kumurekura bamubwiye ko uyu munsi [kuwa kane] mu gitondo yitaba kuri 'police judiciaire' aho yari afungiye, ari kumwe n'userukira AC Génocide-Cirimoso, ntituzi icyo babashakira".

Bwana Kururu avuga ko Mushano yerekuwe atorongera kubwirwa ibyaha aregwa, uretse ibyo yabwiwe agifatwa byo "Guhungabanya umutekano w'abanyagihugu".

Yagize ati: "Afunze yongeye kubazwa gusa ibijyanye n'abanyamakuru bamuhaye ikiganiro, abasubiza uko yari yabasubije bwa mbere, nibwo OPJ yatanze raporo ku umukuriye bategeka ko bamurekura".

Térence Mushano w'ikigero cy'imyaka 60 yahoze akuriye sendika y'abakozi ba SOBUGEA (Société Burundaise de Gestion Aéroportuaire), azwi mu bikorwa by'amasendika mu Burundi.