Coronavirus: Djibouti niyo ifite abanduye Covid-19 benshi muri Afurika y’uburasirazuba

Ejo kuwa kane Djibouti yatangaje abantu bashya 156 banduye Covid-19 mu masaha yari 24 ashize, umubare w'abayanduye muri icyo gihugu bose hamwe bahita bagera kuri 591.

Ni ko kwiyongera k'umubare w'abanduye kwa mbere kunini kubayeho mu munsi umwe gusa, kuva umurwayi wa mbere yagaragara muri icyo gihugu mu kwezi gushize.

Iki gihugu ni cyo gifite abaturage bacye cyane muri aka karere k'Afurika y'uburasirazuba - barenga gato 900,000.

Mohammed Warsame, Minisitiri w'ubuzima muri Djibouti, yavuze ko abarwayi babiri bamaze kwicwa n'iyo ndwara naho abandi 73 bakaba bamaze kuyikira.

Yemeje ko benshi mu banduye ari abanduriye imbere mu gihugu.

Djibouti ni igihugu gito kiri mu ihembe rya Africa mu marembo y'inyanja itukura inzira y'amato yose hagati ya Aziya n'Uburayi.

Ni igihugu gishingira ubukungu bwacyo ku byambu n'ubucuruzi.

Ikigo kitwa Stockholm International Peace Research Institute kivuga ko Djibouti ari igihugu gifite ibirindiro byinshi by'ingabo z'ibihugu by'amahanga.

Ibyo bihugu ni; Ubushinwa, Ubufaransa, Ubuhinde, Ubutaliyani, Ubuyapani, Espagne, Emira zunze ubumwe z'Abarabu, Leta zunze ubumwe za Amerika.

Perezida Ismail Omar Guelleh wa Djibouti ejo ku wa gatatu yatangaje ko igihe cy'inyongera y'iminsi 7 ku bihe bidasanzwe cyongerewe kigashyirwa ku minsi 10.

Yavuze ko ibihe bidasanzwe by'akato byatangiye mu byumweru bibiri bishize "nta gushidikanya ko byafashije umuryango mugari [sosiyete] kwirinda ubwandu bwinshi".

Kugeza ubu iki gihugu kimaze gupima abantu barenga 5,000.

Aba mbere mu banduye Covid-19 muri icyo gihugu bari abaganga bari basubiye mu gihugu bavuye hanze, nkuko minisitiri w'ubuzima yabitangaje.

Iki gihugu gifite 'laboratoire' yacyo bwite, buri munsi ipima abacyekwaho kuba barwaye Covid-19.