Urubanza rw'umunyamakuru Phocas Ndayizera rwatangiye
Urukiko ruburanisha ibyaha byambuka imipaka n'ibyiterabwoba rwa Nyanza rwatangiye kuburanisha mu mizi urubanza rwa Phocas Ndayizera wahakanye ibyaha byose aregwa.
Ndayizera yabwiye urukiko ko yemeye gushyira umukono ku nyandikomvugo zimushinja uruhare mu byaha by'iterabwoba kubera 'iyicarubozo' yakorewe.
Ashinjwa kuba ku isonga y'itsinda ry'abantu 12 nabo baregwa ibyaha nk'ibye.
Yavuze ko yababoneye bwa mbere mu rukiko.
Ubushinjacyaha burega Ndayizera na bagenzi be 'umugambi wo gusenya inyubako za Leta' mu rwego rwo kwerekana ko igihugu kitarimo umutekano.
Ubushinjacyaha bwahawe ijambo mbere bwareze Phocas Ndayizera wigeze kuba umunyamakuru wigenga (stringer), n'abo bareganwa 12 kuba mu mugambi w'iterabwoba rigamije guhungabanya umutekano w'igihugu.
Buvuga ko Phocas yari akuriye itsinda ryo mu Rwanda ryarahabwaga amabwiriza n'uwitwa Cassien Ntamuhanga uburanishwa nk'udahari kubera ko atari mu Rwanda.
Ubushinjacyaha bwavuze ko Bwana Ndayizera yafatanywe ibiturika byitwa 'Dynamites' byagombaga kwifashishwa mu gusenya inyubako za Leta nk'ibiraro, inkingi z'amashanyarazi ndetse n'ibigega by'ububiko bw'ibikomoka kuri peteroli.
Ubushinjacyaha kandi bwongeyeho ko ngo ibi biturika byari byoherejwe na Ntamuhanga.
Ndayizera kandi aregwa gushakisha itsinda ry'abagombaga kumufasha barimo uwitwa Eliakim Karangwa, impuguke mu by'ikoranabuhanga wagombaga guteranya ibi biturika ngo bigere ku mugambi wabyo.
Urukiko rwabajije ubushinjacyaha uko bwemeza ko ibyafashwe byagombaga guturitsa inyubako za Leta kandi hatarakozwe igenzura ry'impuguke muri uru rwego.
Byavuzwe ko ibyafashwe byashyikirijwe Ministeri y'ingabo ngo ibigenzure, hakaba hashize umwaka urenga icyegeranyo kitaratangazwa.
'Kwemera kubera iyicarubozo'
Mu kwiregura, Ndayizera yahakanye inyandiko zose zakozwe mu gihe cy'ubugenzacyaha.
Anavuga ko yemeye kuzishyiraho umukono kubera ibikorwa by'iyicarubozo yagirirwaga.
Yavuze ko azi Ntamuhanga bakiri bato ndetse n'igihe yakoraga umwuga w'itangazamakuru.
Cyakora ahakana imikoranire iyo ari yo yose igamije gukora icyaha.
Uretse Karangwa Eliakim, yavuze ko bari batangiranye imishinga y'ishoramari rishingiye ku ikoranabuhanga, Ndayizera yavuze ko abandi bagize itsinda ry'abaregwa yababoneye bwa mbere mu rukiko.
Bwarinze bugoroba nta wundi ubonye umwanya wo kwiregura, urubanza rukaba rugomba gukomeza ku itariki ya 5 z'ukwezi gutaha kwa kabiri.
