Zambia igiye kujya igura amashanyarazi mu mahanga

Perezida Edgar Lungu wa Zambia yategetse minisitiri ushinzwe iby'ingufu kwihutisha gahunda yo kugura umuriro w'amashanyarazi (cyangwa umuyagankuba mu Kirundi) mu mahanga.

Iki gihugu kibasiwe n'ikibazo gikomeye cy'ibura ry'umuriro w'amashanyarazi nyuma yaho ikigo cya leta cy'amashanyarazi cyitwa Zesco gitangarije ko kigiye kugabanya umuriro ukajya uboneka amasaha 15 ku munsi.

Uko ibintu bimeze byahuhuwe n'igabanuka ry'amazi yo mu kidendezi ('dam') cya Kariba - kikaba ari cyo cy'ingenzi kigabura amazi n'umuriro mu gihugu.

Ikinyamakuru Zambia Daily Mail kibogamiye kuri leta gisubiramo amagambo ya Bwana Lungu agira ati:

"Leta imaze igihe ikora uko ishoboye kose kugira ngo tugire indi soko y'ingufu z'amashanyarazi ngo biturinde kujya ducungira gusa ku mashanyarazi aturuka ku mazi".

"[Ikigo] Zesco nayo itegetswe kunganira ingufu ziva ku mazi ikazongeraho n'iziva ku zuba bitarenze hagati mu mwaka utaha kugira ngo mu buryo buhoraho igabanuka ry'umuriro ribe ikintu kizasigara mu mateka gusa".

Bwana Lungu yavuze ko ibura ry'umuriro uhagije riri kugira ingaruka mu zindi nzego zitandukanye z'ubukungu bw'iki gihugu.

Yongeyeho ko yategetse Matthew Nkhuwa, Minisitiri w'ingufu, kumusanga mu nama mu biro bye akamusobanurira aho gahunda yo gutumiza umuriro w'amashanyarazi mu mahanga igeze.

Ariko gahunda zo kuwutumiza muri Afurika y'Epfo zakomwe mu nkokora no kuba ikigo Eskom cy'ingufu z'amashanyarazi muri icyo gihugu cyarasabye Zambia kubanza kuriha miliyoni 41 z'amadolari y'Amerika y'ubwishyu bw'amezi abiri yo guheraho, nkuko bivugwa n'ibitangazamakuru byo muri Zambia.