Perezida Rouhani wa Irani yahinyuye ibihano bishya by'Amerika 'bidafite akamaro'

Perezida wa Irani yasubizanyije ihinyu Perezida Donald Trump wa Leta Zunze Ubumwe z'Amerika wafatiye Irani ibihano bishya, avuga ko bigaragaza ko Amerika iba ibeshya iyo ivuga ko ishaka ibiganiro.

Perezida Hassan Rouhani yavuze ko ingamba Bwana Trump yafatiye umutegetsi w'ikirenga wa Irani ku munsi w'ejo ku wa mbere "ntacyo zimaze" ndetse yamagana imigambi y'Amerika yo gufatira ibihano minisitiri w'ububanyi n'amahanga wa Irani.

Bwana Rouhani yavuze ko izo ngamba zigaragaza ko ibiro bya White House bya Perezida w'Amerika "birwaye mu mutwe".

Bwana Trump yavuze ko ibyo bihano bishya bigamije kwihimura ku "myitwarire y'ubushotoranyi" ya Irani.

Ni bande bandi bafatiwe ibihano?

Amerika ivuga ko yafatiye ibihano bishya bikomeye ibiro by'umutegetsi w'ikirenga w'iki gihugu Ali Khamenei ivuga ko "ari we wo kuryozwa imyitwarire y'ubushotoranyi y'ubutegetsi [bwa Irani]".

Ibiro by'imari by'Amerika byatangaje ko abakuru umunani b'umutwe kabuhariwe w'igirikare cya Irani na bo bafatiwe ibihano kubera "ibikorwa bibi by'uwo mutwe mu karere".

Steve Mnuchin, umukuru w'ibiro by'imari by'Amerika, yavuze ko ibyo bihano bizafatira umutungo wa Irani ubarirwa muri za "miliyari" z'amadolari y'Amerika.

Yavuze ko itegeko-teka rya Bwana Trump rikubiyemo ibyo bihano "rizabuza ubutegetsi bwa Irani kubona imari yo kwifashisha".

Iri tegeko "ritanga uruhushya rwo kwibasira abantu bashyirwa mu mwanya kanaka cyangwa indi myanya n'umutegetsi w'ikirenga cyangwa ibiro by'umutegetsi w'ikirenga".

Bwana Mnuchin yongeyeho ko na Javad Zarif, Minisitiri w'ububanyi n'amahanga wa Irani, azafatirwa ibihano mu mpera y'iki cyumweru.

Mu byumweru bicye bishize, umwuka mubi wakomeje gututumba hagati y'ibihugu byombi.

Akanama k'umutekano k'umuryango w'abibumbye kasabye impande zombi gutuza no gukoresha inzira y'ibiganiro.