Huawei yagiranye amasezerano na kompanyi y'Uburusiya yo kubaka ikoranabuhanga rya 5G

Inyandiko gusa
Umuyobozi mukuru wungirije wa Huawei, Guo Ping, asuhuzanya na Alexei Kornya, Perezida wa kompanyi MTS yo mu Burusiya

Ahavuye isanamu, Getty Images

Insiguro y'isanamu, Umuyobozi mukuru wungirije wa Huawei, Guo Ping, asuhuzanya na Alexei Kornya, Perezida wa kompanyi MTS yo mu Burusiya

Kompanyi y'ikoranabuhanga Huawei yo mu Bushinwa yagiranye amasezerano na kompanyi y'itumanaho MTS yo mu Burusiya yo kubaka umurongo mugari w'ikoranabuhanga rya 5G mu Burusiya.

Amakuru avuga ko izi kompanyi zizubaka imiyoboro y'umurongo mugari w'ikoranabuhanga rya 5G mu gihe cy'umwaka utaha.

Ni amasezerano yashyizweho umukono ubwo ku munsi w'ejo ku wa gatatu Perezida Xi Jinping w'Ubushinwa yatangiraga uruzinduko rw'iminsi itatu mu Burusiya.

Ibi bibaye nyuma yaho ibihugu bimwe by'i Burayi n'Amerika, biyobowe na Leta Zunze Ubumwe z'Amerika, bihagaritse Huawei ku mpungenge zuko iteje ikibazo ku mutekano wabyo.

Umugabo utambutse imbere y'ikirango cya Huawei

Ahavuye isanamu, Getty Images

Nkuko bitangazwa n'ibiro ntaramakuru AFP, itangazo rya kompanyi MTS rivuga ko aya masezerano azatuma "hubakwa ikoranabuhanga ry'umurongo mugari wa 5G ndetse n'igerageza ry'imiyoboro yo ku rwego rwa gatanu mu mwaka wa 2019 no mu mwaka wa 2020".

Byashoboka ko aya masezerano ashobora gusa nk'aruhuye Huawei, mu mezi ya vuba ashize yari ku gitutu cy'ibihugu bimwe by'amahanga.