'Abantu barenga 50 bapfiriye mu mpanuka y'imodoka za bisi muri Ghana'
Ahavuye isanamu, Anas Sabit-Kaskiya
Amakuru avuga ko abantu barenga 50 bapfuye ubwo imodoka ebyiri za bisi zagonganaga mu gitondo cyo kuri uyu wa gatanu mu mujyi wa Kintampo, rwagati muri Ghana, ku birometero 430 mu majyaruguru y'umurwa mukuru Accra w'iki gihugu.
Hari ubwoba ko uyu mubare w'abapfuye ushobora kwiyongera.
Uwabibonye biba yatangarije aya amafoto umunyamakuru wa BBC Thomas Naadi uri i Accra.
Izo bisi zombi zari zitwaye abagenzi barenga 100. Ntibiramenyekana icyateye iyo mpanuka.
Polisi ya Ghana itangaza ko bisi imwe yahise ishya nyuma yo kugongana.
Umuvugizi wayo yavuze ko "benshi mu bagenzi bari mu modoka zombi bahise bapfira aho" naho "abandi bakomeretse mu buryo butandukanye bahise bihutishirizwa ku bitaro" biri hafi aho aho bari kuvurirwa.
Ahavuye isanamu, Anas Sabit-Kaskiya
Amakuru avuga ko abakora ubutabazi bari aho iyo mpanuka yabereye, bagerageza gufasha abandi bagiheze muri izo modoka.
Impanuka zo mu muhanda zirasanzwe muri Ghana, leta y'iki gihugu ikaba itanga agera hafi kuri 1.6% by'amafaranga iki gihugu cyinjiza buri mwaka mu guhangana nazo.
Mu buryo bw'impuzandengo, abantu batandatu bapfa bazize impanuka zo mu muhanda buri munsi muri Ghana. Ndetse mu mwaka ushize wa 2018, abarenga 200 bapfuye bazize impanuka muri iki gihugu.
Nyinshi mu mpanuka bivugwa ko ziterwa no kwibeshya bya kimuntu - n'imihanda imeze nabi yo muri iki gihugu.
