Victoire Ingabire, umukuru wa FDU-Inkingi, asaba ubutabera ku barwanashyaka be 'bicwa'

Ibiro ntaramakuru Reuters bitangaza ko umwe mu bategetsi b'u Rwanda ku cyumweru yavuze ko umuvugizi wa Victoire Ingabire, umukuru w'ishyaka FDU-Inkingi ritavuga rumwe n'ubutegetsi bw'u Rwanda ariko ritaremererwa gukorera mu Rwanda, yasanzwe yapfuye.

Muri aka kanya ntibiramenyekana uburyo uyu Anselme Mutuyimana w'imyaka 30 y'amavuko yapfuyemo.

Nyuma y'imyaka 25 jenoside ibaye mu Rwanda, Perezida Paul Kagame w'u Rwanda yakomeje gushimagizwa n'amahanga kubera gusana iki gihugu akagarura ituze n'iterambere.

Ariko nanone akomeje kunengwa kubera icyo imiryango iharanira uburenganzira bwa muntu ivuga ko ari ihohotera ryogeye mu gihugu, kuniga itangazamakuru ryigenga no kuburizamo abatavuga rumwe n'ubutegetsi. Perezida Kagame ahakana ibyo birego.

Mu myaka micye ishize, abatavuga rumwe n'ubutegetsi bamwe bagiye basangwa bapfuye haba imbere mu gihugu no mu buhungiro mu buryo buteye urujijo.

Abategetsi b'u Rwanda bavuze ko bari gukora iperereza ku cyo Mutuyimana yazize.

'Ducyeneye ubutabera'

Modeste Mbabazi, ukuriye urwego rushinzwe ubugenzacyaha rwa polisi y'u Rwanda, yabwiye Reuters ati: "Iperereza ryatangiye. Kuri ubu nta bacyekwa".

Augustin Tubanambazi, mukuru wa Mutuyimana, yabwiye Reuters ko umurambo we nta bikomere bigaragarira ijisho ufite, ariko ko afite amaraso mu kanwa.

Mu mwaka wa 2010, André Kagwa Rwisereka wari visi perezida w'ishyaka Democratic Green Party ritavuga rumwe n'ubutegetsi, yasanzwe yapfuye.

Mu mwaka wa 2014, Patrick Karegeya wahoze akuriye ubutasi bw'u Rwanda bwo hanze, yasanzwe yiciwe mu cyumba cya hoteli yo mu mujyi wa Johannesburg muri Afurika y'epfo.

Madamu Ingabire wavuye mu Buholandi akerekeza mu Rwanda ashaka guhatana mu matora ya perezida yo mu mwaka wa 2010, yaje gufungwa imyaka itandatu ku gifungo cy'imyaka 15 yari yakatiwe kubera ibyaha birimo kugumura rubanda ngo yigomeke ku butegetsi buriho.

Madamu Ingabire yavuze ko Jean Damascène Habarugira, na we wari umwe mu bakuru ba FDU-Inkingi, yasanzwe yapfuye mu myaka ibiri ishize kandi ko nta kiratangazwa ku baba barakoze icyo cyaha.

Madamu Ingabire yagize: "Ducyeneye ubutabera".

Yabwiye Reuters ko ababibonye bavuze ko babonye abagabo bambaye imyenda iranga polisi y'u Rwanda bari mu modoka itukura bafatira Mutuyimana ahitwa Mahoko mu burengerazuba bw'u Rwanda.

Reuters ivuga ko polisi y'u Rwanda itigeze yitaba telefone ngo igire icyo itangaza ku bivugwa muri iyi nkuru.