Igisirikare cya Zimbabwe gishinjwa gukorera abigaragambya 'iyicarubozo rigambiriwe'

Akanama k'uburenganzira bwa muntu kashyizweho na leta ya Zimbabwe kashinje abasirikare b'iki gihugu gukoresha "iyicarubozo rigambiriwe" mu guhosha imyigaragambyo.

Kanenze bikomeye abategetsi ba Zimbabwe katangaje ko bifashishije abasirikare mu guhosha imyigaragambyo.

Hashize icyumweru kirenga iyi myigaragambyo itangiye, abigaragambya bakaba bamagana itumbagira ry'ibiciro by'ibikomoka kuri peteroli.

Mu itangazo aka kanama kasohoye, kavuze ko abantu umunani bamaze gutangazwa ko bishwe guhera mu cyumweru gishize, "bazize ahanini ikoreshwa ry'amasasu nyamasasu".

Ryongeyeho riti: "Abasirikare ba Zimbabwe bambaye imyenda yabo y'akazi ibaranga na polisi ya Zimbabwe batangije iyicarubozo rigambiriwe".

Aganira na BBC, umuvugizi wa leta ya Zimbabwe yashyigikiye uburyo bwo guhosha imyigaragambyo agira ati: "Iyo amazi yarenze inkombe, akantu gato ko gukoresha ingufu kaba gacyenewe".

Hatangajwe amakuru y'ibikorwa by'ihutaza bivugwa ko byakozwe n'igisirikare cya Zimbabwe mu bice bitandukanye by'umurwa mukuru Harare.

Ku wa kabiri, abasirikare ba Zimbabwe bagaragaye bakubita itsinda ry'abashoferi b'imodoka zitwara abagenzi.

Ku wa mbere, Perezida Emmerson Mnangagwa w'imyaka 76 y'amavuko, yavuye mu rugendo yarimo i Burayi rutarangiye ngo ahangane n'umwuka mubi ukomeje mu gihugu.

Yari mu nama y'ubukungu n'ishoramari i Davos mu Busuwisi, aho yateganyaga gusaba ko hashorwa imari muri Zimbabwe.

Amaze kugera i Harare, yifashishije urubuga nkoranyambaga rwa Twitter ashishikariza abaturage bose gusenyera umugozi umwe mu kuzahura ubukungu bw'iki gihugu.

Umunyamakuru wa BBC Andrew Harding uri i Harare yavuganye n'umugabo uvuga ko we n'abandi bagera hafi kuri 30 batawe muri yombi n'abasirikare bakanabakubita "mu gihe kirenga amasaha abiri".

Uyu munyamakuru wa BBC yongeraho ko ibikorwa by'urugomo bikomeje muri Zimbabwe biri no gutuma hibazwa ku bushobozi bwa Perezida Mnangagwa bwo kumvirwa n'igisirikare, cyamufashishe kugera ku butegetsi mu mezi 14 ashize.

Perezida Mnangagwa yasezeranyije ko guhohotera abaturage b'abasivile bitazihanganirwa.