Ubufaransa bwisubiyeho, buhagarika 'inyongera ku musoro ku bikomoka kuri peteroli' yateje imyigaragambyo

Inyandiko gusa
Edouard Philippe, minisitiri w'intebe w'Ubufaransa, yavuze ko uburakari bw'abaturage bugomba kwitabwaho

Ahavuye isanamu, AFP

Insiguro y'isanamu, Edouard Philippe, minisitiri w'intebe w'Ubufaransa, yavuze ko uburakari bw'abaturage bugomba kwitabwaho

Edouard Philippe, minisitiri w'intebe w'Ubufaransa, amaze guhagarika mu gihe cy'amezi atandatu inyongera ku musoro w'ibikomoka kuri peteroli yateje imyigaragambyo imaze ibyumweru yaranzwe n'ibikorwa by'urugomo.

Bwana Philippe yavuze ko uburakari bw'abaturage bugomba kwitabwaho, avuga ko izo ngamba zo kongera uwo musoro zakurikizwa ari uko zibanje kugibwaho impaka nyazo hamwe n'abo bireba.

Yabitangarije kuri televiziyo nyuma yo gukorana inama n'abadepite bo mu ishyaka riri ku butegetsi rya La République en Marche.

Yavuze ko uko guhagarika mu gihe cy'amezi atandatu bireba inyongera ku musoro ku bikomoka kuri peteroli, izamuka ry'ibiciro by'amashanyarazi n'umwuka wa gas ndetse no ku magenzura akaze akorerwa ku modoka zishobora gusohora imyuka ihumanya ikirere.

Bwana Philippe ubwo yerekezaga aho yatangarije ihagarikwa ry'icyo cyemezo cy'inyongera y'umusoro ku bikomoka kuri peteroli wari uteganyijwe gutangira mu kwezi kwa mbere umwaka utaha

Ahavuye isanamu, AFP/Getty Images

Insiguro y'isanamu, Bwana Philippe ubwo yerekezaga aho yatangarije ihagarikwa ry'icyo cyemezo cy'inyongera y'umusoro ku bikomoka kuri peteroli wari uteganyijwe gutangira mu kwezi kwa mbere umwaka utaha

Yagize ati:

"Abafaransa bambaye amajaketi y'umuhondo bakunda igihugu cyabo. Natwe dusangiye nabo izo ndangagaciro".

Ibikorwa byo kwangiza byaragaragaye mu gihe cy'imyigaragambyo mu murwa mukuru Paris

Ahavuye isanamu, EPA

Insiguro y'isanamu, Ibikorwa byo kwangiza byaragaragaye mu gihe cy'imyigaragambyo mu murwa mukuru Paris

Ariko yavuze ko ibikobwa by'urugomo bigomba guhagarara.

Yagize ati:

Skip Ibisomwa cane and continue reading
Ibisomwa cane

End of Ibisomwa cane

"Inshingano y'ibanze ya leta ni ugutuma habaho ituze muri rubanda, ariko tugomba kurwanya ikintu cyose gishyira mu kaga ubumwe bw'igihugu". Yongeyeho ko indi myigaragambyo yabaho mu bihe biri imbere yagombye kumenyeshwa ubutegetsi ku mugaragaro kandi igakorwa mu mahoro.

Bwana Philippe yongeyeho ko guhera ku itariki ya 15 y'uku kwezi kwa cumi na kabiri kugera ku itariki ya mbere y'ukwezi kwa gatatu umwaka utaha, hazabaho kugisha inama abaturage ku misoro no ku ikoreshwa ry'imari y'igihugu.

Iyi myigaragambyo yibasiye imijyi ikomeye y'Ubufaransa, ndetse yangiza byinshi mu mpera z'ibyumweru bitatu bishize.

Iyi myigaragambyo izwi nka "gilets jaunes" cyangwa "amajaketi y'umuhondo", yamaze gukura ubu ikaba ibonwa nk'igaragaza uburakari bamwe mu Bafaransa bafitiye leta yabo.

Abigaragambya babambira ahabitse ibikomoka kuri peteroli. Ubutumwa bwo kuri iyi jaketi bugira buti: "Macron ni umugambanyi, abaturage barashonje"

Ahavuye isanamu, AFP

Insiguro y'isanamu, Abigaragambya babambira ahabitse ibikomoka kuri peteroli. Ubutumwa bwo kuri iyi jaketi bugira buti: "Macron ni umugambanyi, abaturage barashonje"

Abantu batatu bamaze gupfa kuva iyi myigaragambyo yatangira ikabamo n'ibikorwa by'urugomo no kwangiza ibikorwa rusange cyangwa iby'abantu ku giti cyabo - cyane cyane nk'igihe amashusho yamenwaga ku wa gatandatu ushize ku nyubako ya Arc de Triomphe iri hafi n'ibiro bya perezida bya Champs-Élysées.

Ni ibikorwa byamaganwe na benshi.

"Amajaketi y'umuhondo" yitwa gutyo kubera ko abigaragambya bigabije imihanda bambaye imyenda y'ibara rigaragara cyane ry'umuhondo risabwa kuba muri buri modoka itwara abagenzi, bijyanye n'amategeko yo mu Bufaransa.

Imbuga nkoranyambaga zagize uruhare mu kuyimenyekanisha kurushaho, kandi ifite abayishyigikiye bo mu mashyaka atandukanye yo mu Bufaransa.

Perezida Marcon (ibumoso) yari yasezeranyije ko atazagamburuzwa n'iyo myigaragambyo

Ahavuye isanamu, EPA

Insiguro y'isanamu, Perezida Marcon (ibumoso) yari yasezeranyije ko atazagamburuzwa n'iyo myigaragambyo

Hashize imyaka ibiri Emmanuel Macron atowe nka Perezida w'iki gihugu, ahanini kubera amavugurura menshi yasezeranyaga muri manda ye. Ariko gukundwa n'Abafaransa kwe kwaragabanutse cyane mu mezi ya vuba ashize.

Bwana Macron ashinja abatavuga rumwe na we kuba ari bo bari inyuma y'iyi myigaragambyo mu rwego rwo kuburizamo amavugurura y'ubutegetsi bwe.