Martin Fayulu avuga ko amasezerano y'abatavuga rumwe na leta ya Kongo 'akiriho'

Martin Fayulu wari wemejwe ku cyumweru n'abatavuga rumwe na leta ya Repubulika ya Demokarasi ya Kongo nk'umukandida umwe bahuriyeho mu matora ya perezida ateganyijwe kuba ku itariki ya 23 y'ukwezi gutaha kwa cumi na kabiri, yasabye ko habaho ubumwe.

Ni nyuma yaho babiri mu bakuru b'abatavuga rumwe n'ubutegetsi bari bashyize umukono kuri ayo masezerano - Félix Tshisekedi na Vital Kamerhe - bisubiyeho bakavuga ko batakiyakurikije kubera ko abayoboke b'amashyaka yabo bayamaganye.

Bwana Fayulu, umudepite uzwi cyane nk'umushoramari n'umunyemari kurusha uko azwi nk'umunyapolitiki - yagenwe bitunguranye ku cyumweru nk'umukandida uhuriweho nyuma y'ibiganiro byari bimaze iminsi bibera i Genève mu Busuwisi.

Yavuze ko ayo masezerano atasenyutse burundu, ashishikariza abayavuyemo kongera bakayakurikiza.

Ibiro ntaramakuru AFP bisubiramo amagambo ya Bwana Fayulu ubwo yaganiraga na televiziyo TV5Monde ku wa kabiri agira ati:

"Amasezerano aracyariho".

"Ndashishikariza abavandimwe banjye kurenga amarangamutima ashingiye ku burwanashyaka ahubwo bagaha agaciro inyungu ziyaruta z'igihugu".

"Nta na rimwe igihe kiba cyarenganye umuntu ukora igikwiye".

Bwana Fayulu yongeyeho ati:

"Ni uruhe rugero turi guha abana na rubanda, cyane twebwe tutavuga rumwe n'ubutegetsi iteka tuba tuvuga ko ubutegetsi bwa [Perezida] Kabila butubahiriza itegeko-nshinga?"

Umutegetsi wo mu ishyaka UDPS rya Bwana Tshisekedi uri i Buruseli mu murwa mukuru w'Ububiligi - ari naho Bwana Tshisekedi yagiye nyuma y'inama y'i Genève - yabwiye AFP ati:

"Kuri ubu ibiganiro byararangiye".

Ikusanyabitekerezo ryatangajwe mu mpera y'ukwezi gushize kwa cumi n'ikigo Congo Research Group cyo muri Leta Zunze Ubumwe z'Amerika, ryagaragaje ko Bwana Tshisekedi na Bwana Kamerhe bakurikiranaga ku mwanya wa mbere n'uwa kabiri mu bahabwa amahirwe menshi ko bashobora gutsinda amatora ya perezida.

Iryo kusanyabitekerezo ryagaragaje ko bari bakurikiwe na Emmanuel Ramazani Shadary, umukandida w'urugaga rw'amashyaka ari ku butegetsi muri Kongo.