Abagwanyi 30 bipfuza kwiyonkora ku gihugu bishwe n'igisirikare muri Cameroun
Ahavuye isanamu, Getty Images
Hafi abagwanyi 30 mu bipfuza kwiyonkora ku gihugu bishwe n'igisirikare mu duce dutandukanye, muri ino minsi ibiri mu buraruko bushira uburengero bwa Cameroun.
Ku munsi wa kabiri, abasirikare b'igihugu bishe abagwanyi 14 mu mishamirano yabereye mu karere ka Mayo-Binka, ku birometero vyinshi uvuye mu gisagara ca Bamenda.
Avugana na BBC, umuvugizi w'ubushikiranganji bwo kwivuna abansi bwa Cameroun, Koloneli Didier Badjeck, yavuze ko abo bagwanyi bariko batwara ibiziga vya bagenzi babo batatu ku maziko, munyuma bagwa mu mishamirano n'igisirikare aho baciye bicwa.
Ku munsi wa mbere, abo bagwanyi bateze umutego igisirikare ahitwa Nkambe, baburamwo bagenzi babo batandatu, bituma igitigiri c'inyeshamba zishwe muri iyi minsi ibiri kija kuri 29.
Koloneli Badjeck yavuze ko abasirikare 200 bamaze gupfira mu ngwano, igitigiri kiri hejuru y'ic'abasirikare bamaze gupfa mu ngwano ya Cameroun ku bagwanyi ba Boko Haram mu myaka ine.
Abo bagwanyi batanguye ingwano bipfuza gushinga igihugu gishasha bazita Ambazonia, mu gihe bidoga bavuga ko abanyagihugu baba mu gace kavugwamwo icongereza bakumigwa mu buzima bw'igihugu.
