Arabie Saoudite ishaka kuburanisha abacyekwaho kwica umunyamakuru Khashoggi, ntizabohereza muri Turukiya

Minisitiri w'ububanyi n'amahanga wa Arabie Saoudite yavuze ko abacyekwaho kwica umunyamakuru Jamal Khashoggi bazaburanishirizwa muri iki gihugu.

Ubwo yafataga ijambo ku wa gatandatu mu nama mu gihugu cya Bahrain, Adel al-Jubeir yashinje ibitangazamakuru by'i Burayi no muri Amerika "gutwarwa n'amarangamutima" mu buryo bitangaza inkuru zijyanye n'iyicwa ry'uyu munyamakuru.

Yavuze ibyo nyuma y'umunsi umwe Turukiya itangaje ko yifuza kohererezwa abaturage 18 ba Arabie Saoudite abategetsi bacyekaho kugira uruhare muri ubwo bwicanyi.

Bwana Jubeir yabwiye inama yiga ku mutekano yo muri Bahrain ati:

"Ku kibazo cyo kohereza [abacyekwaho kwica Bwana Khashoggi], ni abaturage ba Arabie Saoudite. Bafungiye muri Arabie Saoudite, n'iperereza riri gukorerwa muri Arabie Saoudite, kandi bazaburanishirizwa muri Arabie Saoudite."

Turukiya na Arabie Saoudite ntabwo bizwiho kugirana amasezerano yo kohererezanya abacyekwaho ibyaha.

Bwana Khashoggi - kavukire wa Arabie Saoudite wanengaga ubwami bw'iki gihugu - yiciwe mu nyubako y'ibiro by'uhagarariye Arabie Saoudite i Istanbul muri Turukiya, hari ku itariki ya kabiri y'uku kwezi kwa cumi.

Arabie Saoudite yahakanye ivuga ko umuryango w'ibwami uri ku butegetsi nta ruhare wagize mu iyicwa ry'uyu munyamakuru, ibwegeka ku ntasi zayo "zataye umurongo".

Ku ikubitiro, Arabie Saoudite yahakanye yivuye inyuma ko itazi ibyabaye kuri uyu munyamakuru, ariko umushinjacyaha w'iki gihugu ubu noneho avuga ko iyicwa rye ryari "ryagambiriwe".