Abakandida 6 bangiwe kwiyamamaza mu matora ya perezida muri Kongo bajuriye

Nkuko bitangazwa n'ibiro ntaramakuru AFP, abakandida bose uko ari batandatu bangiwe n'akanama gashinzwe gutegura amatora ka Repubulika ya Demokarasi ya Kongo batanze ikirego cy'ubujurire mu rukiko rwo kubungabunga itegeko-nshinga.

Babiri muri bo ni bo babihamirije ibiro ntaramakuru AFP ku wa kabiri.

Icyemezo cyo kwangira batandatu mu bakandida-perezida 25 kwiyamamaza mu matora ya perezida ateganyijwe kuba mu kwezi kwa cumi na kabiri uyu mwaka, cyatangajwe ku wa gatanu nijoro n'akanama k'amatora ka Kongo. Aba bajuriye bari bafite igihe cyo kugera ku wa kabiri ngo babe batanze ubujirire bwabo.

Muri aba bajuriye harimo Jean-Pierre Bemba wahoze ari umukuru w'inyeshyamba ndetse akaza kuba minisitiri w'intebe wa Kongo, wasubiye muri Kongo ku itariki ya mbere y'uku kwezi kwa munani agiye gutanga kandidatire ye, nyuma yo kugirwa umwere ku byaha by'intambara n'urukiko mpuzamahanga mpanabyaha.

Barimo na Samy Badibanga na we wigeze kuba minisitiri w'intebe wa Kongo, Adolphe Muzito na Antoine Gizenga - bose babaye mu butegetsi bwa Kongo ku bwa Perezida Joseph Kabila.

Barimo kandi na Marie-Josée Ifoku Mputa, umugore umwe rukumbi wari watanze kandidatire ye ku mwanya wa perezida akaba ari n'umwe muri babiri baganiriye n'ibiro ntaramakuru AFP.

Ubu rero urukiko ruzatanga umwanzuro waryo kuri ubu bujurire, mu gihe akanama k'amatora ko gateganya gutangaza urutonde ntakuka rw'abakandida-perezida ku itariki ya 19 y'ukwezi gutaha kwa cyenda, habura amezi atatu ngo amatora ya perezida abe ku itariki ya 23 y'ukwezi kwa cumi na kabiri.