Uruhande rwa Perezida Kabila rurakemanga ko Bemba yemerewe kwiyamamaza mu matora yo muri Kongo

Umuvugizi w'urugaga rw'amashyaka ari ku butegetsi muri Repubulika iharanira demokarasi ya Kongo, yavuze ko Jean-Pierre Bemba ashobora kutemererwa kwiyamamaza mu matora ya perezida ateganyijwe mu kwezi kwa cumi na kabiri uyu mwaka.

Ku wa gatanu, ibiro ntaramakuru AFP byatangaje ko Alain Atundu yavuze ibi nyuma yaho Bwana Bemba avuze ko azajya muri Kongo kwiyamamaza mu matora ya perezida.

Bwana Atundu yagize ati:

"[Bemba] Ashobora kugongwa n'ibiteganywa n'ingingo ya 10 y'itegeko rigenga amatora" ivuga ko abigeze guhamwa n'icyaha cya ruswa mu nkiko "batemerewe" kwiyamamaza.

Bwana Atundu yavuze ko yizeye ko Bwana Bemba yakwemera "ku mugaragaro" ko ataziyamamaza "igihe itegeko rigenga amatora ryaramuka ryemeje ko atemerewe kwiyamamaza."

Mu kwezi gushize, urukiko mpuzamahanga mpanabyaha rwakuyeho mu rwego rw'ubujurire igihano cy'imyaka 18 y'igifungo Bwana Bemba yari yahawe ku ikubitiro kubera ibyaha by'intambara n'ibyibasira inyoko-muntu.

Mu kumukuriraho icyo gihano, urukiko rwanzuye ko Bwana Bemba wigeze kuba Visi-Perezida wa Kongo ataryozwa ibyaha byakozwe n'abasirikare yari ayoboye.

Ariko mu kwezi kwa gatatu k'umwaka ushize wa 2017, uru rukiko rwari rwamuhamije icyaha cyo guha ruswa abatangabuhamya.

Kuri ubu, Bwana Bemba ari kuba mu Bubiligi kandi agomba kubwira uru rukiko amakuru y'aho aherereye igihe cyose bibaye ngombwa.

Ubu akoresha impapuro z'inzira nk'iz'abategetsi bakuru b'ibihugu.