Simone Gbagbo, umugore w'uwahoze ari perezida wa Côte d’Ivoire, ari muri 800 bafunguwe

Umugore wari ufunze w'uwahoze ari perezida wa Côte d'Ivoire yahawe imbabazi na perezida w'iki kihugu mu cyo yavuze ko ari gahunda igamije gufasha ubwiyunge.

Mu mwaka wa 2015, Simone Gbagbo yari yakatiwe gufungwa imyaka 20 kubera uruhare yagize mu bikorwa by'urugomo byakurikiye amatora ya perezida yo mu mwaka wa 2010 bikagwamo abantu ibihumbi 3.

Madamu Gbagbo ari mu bantu 800 bafunguwe ku bw'imbabazi za Perezida Alassane Ouattara wa Côte d'Ivoire.

Umugabo we Laurent Gbagbo, aburanishwa n'urukiko mpuzamahanga mpanabyaha aho ashinjwa ibyaha byibasira inyoko-muntu.

Mu ijambo ryanyuze kuri televiziyo y'igihugu, Perezida Ouattara yavuze ko izi mbabazi zigamije kuzana "amahoro n'ubwiyunge bw'ukuri" mu gihugu.

Ibikorwa by'urugomo byabaye muri iki gihugu cya Côte d'Ivoire - cya mbere ku isi mu buhinzi bwa cacao ikorwamo shokola - byatewe na Bwana Gbagbo wari wanze kwemera ibyavuye mu matora yari yatsinzwemo na Bwana Ouattara.

Madamu Gbagbo na Bwana Gbagbo batawe muri yombi mu mwaka wa 2011 nyuma yuko abasirikare binjiye mu nzu y'umutamenwa yo mu nsi y'ubutaka aho bari bihishe mu mujyi wa Abidjan.

Madamu Gbagbo ashinjwa "kubangamira umutekano w'igihugu" n'ituze rusange ashinga imitwe yitwaje intwaro.

Yanashinjwaga ibyaha byibasira inyoko-muntu ariko yabigwizeho umwere mu mwaka ushize wa 2017 mu rundi rubanza. Uku kugirwa umwere kwari kwarakuweho n'undi mwanzuro w'urukiko.