Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Didier Drogba avuga ko umupira w'Afurika "wasubiye inyuma cyane"
Didier Drogba aravuga ko umupira w'amaguru w'Afurika "wasubiye inyuma cyane" nyuma yaho gusezererwa kwa Senegal gutumye buba ubwa mbere Afurika yitwaye nabi cyane mu gikombe cy'isi mu myaka 36 ishize.
Senegal ibaye ikipe ya mbere mu mateka y'igikombe cy'isi isezerewe hagendewe ku myitwarire yayiranze. Yabonye amakarita menshi y'umuhondo kurusha Ubuyapani banganya amanota 4.
Mu mukino wayo wa nyuma yatsinzwe na Colombia 1-0.
Misiri, Maroc, Nigeria na Tunisia zari zaramaze gusezererwa mu mikino yo mu matsinda.
Drogba wahoze ari rutahizamu wa Ivory Coast n'ikipe ya Chelsea yagize ati:
"Hari umunsi Afurika izitwara neza ariko dukeneye kongera tugatekereza uburyo twitegura amarushanwa nk'aya akomeye".
Nta kipe yo muri Afurika irigera irenga imikino ya kimwe cya kane mu gikombe cy'isi.
Ariko kuva mu mwaka wa 1982 - ubwo amakipe ya Algeria na Camerouni yarengaga imikino yo mu matsinda - nibura ikipe imwe yo ku mugabane w'Afurika yageze mu mikino yo gukuranamo. Kugeza ubwo bidashobotse kuri iyi nshuro.
Mu Burusiya, amakipe yo muri Afurika yatsinze gusa imikino itatu atsindwa 10 mu mikino 15 yakinnye.
Drogba, watsindiye igihugu cye ibitego 65 mu mikino 104 yakinnye, yagize ati: "Ni ugusubira inyuma cyane".
Yongeyeho ko ubu ari umwanya ku makipe y'Afurika n'ishyirahamwe ry'umupira w'amaguru kuri uyu mugabane wo kongera gutekereza no kuburyo ategura amarushanwa no ku cyo gukora mu minsi iri imbere.
Yagize ati: "Ni iki twifuza gukora mu gikombe cy'isi gitaha? Dufite abakinnyi, dufite amafaranga yo kwitegura, ariko dukeneye ibirenze ibyo".
"Dukeneye guhozaho mu kwitwara neza ndetse n'inzego zihamye nk'izo tubona mu makipe y'i Burayi no muri Amerika y'epfo".
