Mosul: Minisitiri w'intebe wa Irak yatangaje intsinzi

Ibiro bya Minisitiri w'intebe wa Irak, Haider al-Abadi, byavuze ko ibyo yabitangaje ari mu cyumba gitegurirwamo ibikorwa by'urugamba rwo kurwanya iterabwoba.

Bwana Abadi yazunguje ibendera ry'igihugu cya Irak ari kumwe n'ingabo, avuga ko atangaje "isenyuka rya leta y'iterabwoba y'ikinyoma".

Yageze i Mosul ku cyumweru, ariko yatinze kugira icyo atangaza arindiriye ko agace gato kari gasigayemo umutwe w'iterabwoba wiyita leta ya kisilamu nako kabohorwa.

Urugamba rwa Mosul rwamaze hafi amezi icyenda, rusiga ibice binini bihindutse amatongo, ruhitana abaturage b'abasivili babarirwa mu bihumbi, ndetse rukura mu byabo abaturage barenga 920 000.

Ingabo z'urugaga rw'amahanga ruyobowe na Leta Zunze Ubumwe z'Amerika zafashije ingabo za Irak ku butaka no mu kirere.

Abayobozi bazo bavuze ko urugamba rwo mu bice by'umujyi ari rwo rwabaye isibaniro cyane kuva intambara ya kabiri y'isi yarangira.

Umunyamakuru wa BBC uri i Mosul aravuga ko intagondwa z'umutwe w'iterabwoba wiyita leta ya kisilamu zishobora kuba zatsinzwe mu rwego rwa gisirikari muri uyu mujyi.

Ariko aravuga ko ibi bitavuze ko zameneshejwe mu gihugu cya Irak cyangwa ko ingengabitekerezo yazo idasanzwe nayo yarangiye.