Imirwano yahitanye abantu 115 muri Centrafrique

Umuryango utabara imbabare - Croix Rouge - uravuga ko wabonye imirambo 115 nyuma y'imirwano mu mujyi wa Bangassou muri Repubulika ya Centrafrique.

Uyu mubare uri hejuru ugereranyije n'iyari yatangajwe mbere n'Umuryango w'abibumbye.

Iyi mibare yatangajwe na Croix Rouge irerekana ko ibintu bikomeye i Bangassou.

Imirwano yahadutse mu mpera z'icyumweru gishize.

Abagabo bitwaje imbunda - bivugwa ko baturuka mu mutwe ugendera ku matwara ya gikirisitu - wagabye igitero ku kigo cy'ingabo za ONU no mu gace gatuwe n'abayisilamu muri uwo mujyi.

Abantu babarirwa mu bihumbi bahungiye muri Repubulika iharanira demokarasi ya Congo, benshi basiga inyuma ibyo bari batunze usibye imyenda bari bambaye.

Ibi si ubwa mbere biba.

Muri iki gihugu cya Centrafrique hakunze kuba ibikorwa byo gukozanyaho hagati y'imitwe yitwaje intwaro yiganjemo abakiristu n'iyiganjemo abayisilamu bigahitana abantu.

Akenshi abaturage b'abasivile bahasiga ubuzima.