CAN 2021: Cameroun yiteguriye gute kwakira iri rushanwa?

Bamwe mu babaturage bo mu mujyi wa Yaounde aho BBC Gahuzamiryango yageze bizeye ko aya marushanwa azaba umwanya wo guhuza igihugu gisa n'icyacitsemo kabiri kubera igice cy'abashaka kwigenga.

BBC yageze mu gace k'ubucuruzi k'umurwa mukuru wa Cameroun, Yaounde. Bamwe mu bacuruzi ntibishimiye icyemezo cyafashwe n'abakuriye umujyi cyo gukuraho ubuconsho bacuruzaga.

Sheila ni umucuruzi mu mujyi wa Yaounde avuga ko ari byiza ko Cameroun yakiriye iyo mikino ariko ko atabona neza icyo imikino izabinjiriza.

Yavuze ati: ''Niba abacuruzi bato nkatwe turi kwirukanwa mu mujyi batumariye iki? Reba ukuntu ibicuruzwa byanjye babigize, ibyo nacuruzaga babitaye hasi. Gusa nyine n'ubwo bimeze gutyo, ndacyashyigikiye igihugu cyanjye''.

Abacuruzi bato bavuga ko ubuyobozi bw'umujyi wa Yaounde bwatangiye kubigizayo kugira ngo mu mujyi haboneke isuku.

Gusa umunyamakuru wa BBC avuga ko umujyi wa Yaounde utagaragaza isuku nk'iyagiye igaragara mu bindi bihugu byakiriye igikombe cy'Afrika mu myaka ya vuba (Misiri muri 2019 cyangwa Gabon muri 2017).

Jacques Joe nawe ni umucuruzi mu mujyi wa Yaounde. Avuga ko ubundi imikino nk'iyi irushaho kongera guhuza abanyagihugu cyane cyane igihugu nka Cameroun gifite ibibazo by'imirwano y'abashaka ko igice kivuga ururimi rw'icyongereza cyakwigenga.

Jacques Joe avugako kwirukana abacuruzi bato mu mujyi wa Yaounde bidashobora gutuma haboneka ubumwe bw'abanyagihugu.

Avuga ati: ''Imikino nk'iyi yagombye kongera guhuza abenegihugu ariko imikino ikomeye nk'iyi yangiriza abafite ubucuruzi buciriritse. Abashabitsi bato bose bakuwe mu mujyi, sinibaza ko byadufasha mu bumwe bw'abanyagihugu''.

Ni ubwo bimeze gutyo ariko hari n'abavuga ko amarushanwa y'igikombe cy'Afrika yatangiye kubabyarira inyungu.

Celestin Boya, akora akazi ko gutwara abantu mu modoka (taximan) avuga ati ''ni byiza cyane kuko kubera abantu benshi tugomba gutwara barimo abanyamahanga tujyana cyangwa tuvana kuri stade twe duhagaze neza''.

Imyiteguro ya nyuma

Uretse iby'ubucuruzi Cameroun isa nkaho iri mu myiteguro ya nyuma mu gihe hasigaye iminsi 2 gusa ngo habe umukino wo gutangiza irushanwa uteganyijwe ku cyumweru tariki 9 hagati ya Cameroun na Burkinafaso.

Hari imirimo myinshi yari igikorwa kuri Stade Olembe izakira imikino yo mu itsinda rya mbere ririmo Cameroun, Burkina Faso, Ethiopia na Cape Vert. Hamwe biragaragara ko bacyubaka aho amamodoka aharagara (Parking) n'ibindi bikorwa nk'amatara yo hanze y'ikibuga ndetse n'ubusitani butari bwarangira.

COVID mu bakinnyi bamwe na bamwe mbere y'uko imikino itangira

Ishyirahamwe ry'umupira w'amaguru muri Cameroun riravuga ko abakinnyi 4 b'ikipe y'igihugu bari mu kato bacyekwaho kuba baranduye Covid-19.

Mu ikipe ya Cape Vert naho baratangaza ko abakinnyi babo 6 barwaye Covid-19, barimo abanyezamu 2 ndetse n'umutoza w'iyo kipe izahura na Ethiopia ku cyumweru nyuma y'umukino wa Cameroun na Burkinafaso.

Rutahizamu na kizigenza w'ikipe ya Gabon Pierre Emerick Obameyang na mugenzi we ukina hagati Mario Lemina ndetse n'umutoza wungirije nabo basanzwemo Covid-19, baracyategereje ibipimo byisumbuyeho ngo hemezwe niba bagomba gushyirwa mu kato.

Ikipe ya Senegal nayo yatangaje abakinnyi 3 bari mu kato kubera Covid mu gihe Tunisia yo ivuga ko ifite abakinnyi 2 bafite covid-19.

Cameroun nta ngamba zigaragara ifite zo kwirinda Covid-19. Agapfukamunwa kambarwa n'ubishatse kandi abantu baracucikiranye cyane.

Gusa icyo gihugu cyategetse ko ku bibuga aho Cameroun yakiniye hagomba kwinjira abatarenze 80% y'ubushobozi bwa stade naho ku bindi bibuga hakinjira abatarenze 60% kandi bose bikingije inshuro 2.