Bobi Wine Vs Museveni: Sentare nkuru yatangaje umusi w'ugusoma urubanza

Sentare nkuru ya Uganda itangaza ko igenekerezo rya 18 z'ukwa gatatu 2021 ari ho izosoma urubanza ruhuza Perezida Yoweri Museveni n'uwo batavuga rumwe Robert Kyagulanyi azwi kw'izina rya Bobi Wine.

Bobi Wine, umunyamuziki yahindutse umunyapolitike, umukeba mukuru wa Perezida Museveni, yaramwitwariye yiyamiriza ivyatangajwe ko vyavuye mu matora aheruka muri ico gihugu aho Museveni yatangajwe ko ari we yayatsinze.

Ku ncuro ya mbere, abacamanza icenda bagize Sentare nkuru babonanye n'impande zompi muri sentare yo ku mugwa mukuru Kampala baca batangaza ko bazokwumviriza uru rubanza mu kiringo c'imisi 45 isanzwe itegekanijwe n'ibwirizwashingiro.

Umucamanza mukuru wa Uganda, Alfonse Owiny Dollo, niwe arongoye abacamanza bagiye kwumviriza uru rubanza rwashingishijwe na Bobi Wine.

Umucamanza Owiny Dollo asaba impande zompi gukoresha uwu mwanya bahawe bagatanga ivyemezo, na rirya ruzosomwa ku wa 18 z'ukwa gatatu.

Bobi Wine, yifashishije abashingwamanza biwe, yaritwariye Perezida Museveni, umurwi ujejwe gutegura amatora hamwe n'umushikirizamanza mukuru wa Repubulika, abo bose bakaba bari barengutse muri sentare kugira bashigikire intsinzi ya Perezida Museveni yaronse amajwi 58%.

Kuva ejo haheze, uruhande rw'abitwaye n'urw'abitwariwe bagiye guhanahana impapuro z'urwo rubanza hamwe n'ivyemezo gushika ku wa 05 z'ukwa gatatu, nk'uko bivugwa na Asumani Basalirwa, umushingwamanza wa Bobi Wine.

Ubu ni ubugira kane Perezida Yoweri Museveni yitwariwe n'abatavuga rumwe n'ubutegetsi bwiwe inyuma yugutangazwa ko yatsinze amatora.

Kiiza Besigye amaze kumwitwarira incuro zibiri zose, hanyuma Amama Mbabazi nawe amwitwarira mu 2016, ariko ivyo bihe vyose Perezida Museveni yamye atsinda izo manza.

None uru rworwo ruzogenda gute? Ni ku wa 18 z'ukwa gatatu 2021.