Dyn yn gwadu ceisio llofruddio menyw yng Nghaerfyrddin
Mae disgwyl i'r achos llawn yn erbyn James McKenna gael ei gynnal yn yr haf
- Cyhoeddwyd
Mae dyn 57 oed wedi pledio'n ddieuog i gyhuddiad o geisio llofruddio menyw mewn parc yng Nghaerfyrddin.
Ond mae James McKenna wedi cyfaddef cyhuddiadau eraill o anafu'n fwriadol a bod ag arf finiog - cyllell gegin - yn ei feddiant, mewn man cyhoeddus.
Fe ddigwyddodd yr ymosodiad honedig ar Joanne Sidaway ym Mharc Caerfyrddin, ar 29 Ionawr.
Fe ymddangosodd y diffynnydd yn Llys y Goron Abertawe ddydd Gwener trwy gysylltiad fideo o Garchar Abertawe.
Mae disgwyl iddo sefyll ei brawf ym mis Gorffennaf.
Presenoldeb heddlu yn ardal Heol Picton yn dilyn y digwyddiad honedig ym Mharc Caerfyrddin
Yn dilyn y digwyddiad honedig, fe aeth Heddlu Dyfed Powys ati i chwilio am Mr McKenna, sy'n dod o Gaerfyrddin ond sydd â chysylltiadau yn Iwerddon.
Ar y pryd fe wnaeth y llu ddiolch i'r gymuned leol am eu hamynedd a'u dealltwriaeth wrth iddyn nhw gynnal ymholiadau.
Fe gafodd ei arestio maes o law yn dilyn apêl i'r cyhoedd am gymorth.
Cafodd Joanne Sidaway ei chludo i'r ysbyty wedi'r digwyddiad honedig a'i rhyddhau.
Cyhuddo dyn o geisio llofruddio yng Nghaerfyrddin
- Cyhoeddwyd4 Chwefror
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
