ဘော်စတန် မာရသွန် ပေါက်ကွဲမှု သေဆုံးသူ ၃ ဦးရှိလာ
ဘော်စတန် မာရသွန် ပန်းဝင်စည်း အနားမှာ ဖြစ်ပွားတဲ့ ပေါက်ကွဲမှု နှစ်ခုကြောင့် လူ ၃ ယောက် သေဆုံးပြီး အနည်းဆုံး လူပေါင်း ၁၅၀ မက ဒဏ်ရာရခဲ့ပါတယ်။
မနေ့က နေ့ခင်း ၂နာရီမိနစ် ၅၀ လောက်မှာ ပန်းဝင်စည်းနဲ့ မလှမ်းမကမ်းမှာ ပထမ ပေါက်ကွဲမှု ဖြစ်ပွားခဲ့ပြီး နောက်ထပ် စက္ကန့်အနည်းငယ် အတွင်းမှာပဲ ပထမပေါက်ကွဲတဲ့ နေရာရဲ့ နောက်ဘက် မီတာ ၅၀ နဲ့ ၁၀၀ အတွင်း အကွာအဝေး လောက်က လူအုပ်ထဲမှာ ဒုတိယ ပေါက်ကွဲမှု ဖြစ်ပွားခဲ့တာ ဖြစ်ပါတယ်။
ဒီပေါက်ကွဲမှုဟာ အကြမ်းဖက် ခြောက်လှန့် သတ်ဖြတ်မှု ကွန်ယက် တွေနဲ့ ဆက်စပ်မှု ရှိမရှိကို အက်ဖ်ဘီအိုင် ထောက်လှန်းရေးက စုံစမ်း စစ်ဆေးနေပါတယ်။
ဘော်စတန် ရဲအဖွဲ့ဟာ နာရီအပြည့် အလုပ်လုပ်နေပြီး ခွင့်ရက်အားလုံး ပယ်ဖျက်ထားတယ်လို့ ဆိုပါတယ်။
ဒဏ်ရာရသူတွေ အနက်မှာ ၁၇ ယောက်ရဲ့ အခြေအနေဟာ စိုးရိမ်ရတယ်လို့ အရာရှိ တွေက ပြောပါတယ်။ အဲဒီ ၁၇ ယောက်ထဲမှာ ကိုယ်လက် အင်္ဂါဆုံးရှုံးသူ တွေလည်း ပါတယ်လို့ ဆိုပါတယ်။ သေဆုံးသူတွေအနက် တယောက်ဟာ ရှစ်နှစ် အရွယ်သာ ရှိသေးတဲ့ ကလေးငယ် တယောက်ဖြစ်တယ်လို့ အမေရိကန် သတင်းမီဒီယာတွေက ထုတ်ဖော်ပြောဆိုပါတယ်။ ဘော်စတန် ရဲမင်းကြီး အက်ဒွပ် ဒေးဗစ်စ် ကတော့ ဒီပေါက်ကွဲမှုနဲ့ ပတ်သက်ပြီး ကြိုတင် သတင်း ရရှိခဲ့တာမျိုး ခြိမ်းခြောက် သတိပေးချက် ရခဲ့တာမျိုး မရှိဘူးလို့ ဆိုပါတယ်။ လူတွေကို ကိုယ့်အိမ်မှာကိုယ်ပဲ နေကြဖို့နဲ့ လူစုလူဝေးနဲ့ မနေကြဖို့လည်း သူက သတိပေးထားပါတယ်။
သမ္မတ အိုဘားမားက ရုပ်မြင်သံကြားကနေ မိန့်ခွန်း ပြောကြား ရာမှာတော့ ဘယ်သူလုပ်တယ်ဆိုတဲ့ လက်သည်ကို ဖော်ထုတ်သွားမယ်၊ ဘာကြောင့် လုပ်တယ် ဆိုတာကိုလည်း ဖော်ထုတ်သွားမယ်၊ တာဝန်ရှိသူဟာ တဦးတယောက်ချင်းပဲ ဖြစ်ဖြစ် အဖွဲ့အစည်းနဲ့ လုပ်တာပဲဖြစ်ဖြစ် ထိုက်သင့်တဲ့ တရားမျှတမှုကို ပေးဆပ်ရ လိမ့်မယ်လို့ ပြောပါတယ်။
အိမ်ဖြူတော်ရဲ့ လုံခြုံရေး အရာရှိကတော့ ဒီဖောက်ခွဲမှုဟာ ပြည်တွင်း အကြမ်းဖက် အုပ်စုရဲ့ လက်ချက်လား နိုင်ငံတကာ ဂျီဟတ် အုပ်စုတွေက နောက်ကွယ်မှာ ရှိနေသလား ဆိုတာကို မသေချာသေးတဲ့အတွက် အထူး သတိထားပြောဆိုနေတယ် လို့ ဘီဘီစီ ဝါရှင်တန် သတင်းထောက် ဂေါ်ဒွန် ကော်ရယ်ရာ ကပြောပါတယ်။
သမ္မတအိုဘားမားကလည်း ရှင်းလင်းတဲ့ အဖြေကို သေသေချာချာ မသိရသေးခင် မှာ ထင်ကြေးနဲ့ကောက်ချက် မြန်မြန် မဆွဲလိုက်ဖို့ ပြောပါတယ်။
နိုင်ငံတကာ တုံ့ပြန်
အာဖဂန်နစ္စတန် သမ္မတ ဟာမစ်ကာဇိုင်းက သေဆုံးသူတွေ အတွက် ဝမ်းနည်းကြောင်း ပြောဆိုပါတယ်။ သူတို့ အာဖဂန်နစ္စတန်ဟာ အကြမ်းဖက် တိုက်ခိုက်မှု တွေကို နှစ်ပေါင်းများစွာ ကြုံတွေ့လာရ သူများပီပီ ဒီလိုဖြစ်စဉ်မျိုးရဲ့ နာကျင်ကြေကွဲဖွယ် ဒဏ်ရာဒဏ်ချက်တွေကို နားလည် သိရှိပါတယ်လို့ သူ့ရဲ့ ထုတ်ပြန် ကြေညာချက်မှာ ဖော်ပြပါတယ်။
ပါကစ္စတန် အစိုးရကလည်း ဒီလို သူရဲဘောကြောင်တဲ့ တိုက်ခိုက်မှုမျိုးအတွက် နက်နက်နဲနဲ ဝမ်းနည်း ကြေကွဲမိတယ်လို့ ပြောပါတယ်။ ပြင်သစ် သမ္မတကလည်း အမေရိကန် ပြည်သူ အမေရိကန် အစိုးရနဲ့ တစိတ်တသဘောတည်း ရှိကြောင်း ပြောဆိုပါတယ်။
