ကိုရိုနာ ဗိုင်းရပ်စ် - ဝူဟန်က လူငါးဦး မြန်မာမှာ ရှာပေးဖို့ တရုတ်ရဲပြော၊ တစ်ဦး တရုတ်ဘက်ပြန်လွှဲ

တရုတ်နိုင်ငံမှာ ကိုရိုနာဗိုင်းရပ်စ် ကူးစက်မှု မြန်ဆန်နေချိန်မှာ ကိုရိုနာဗိုင်းရပ်စ် ကူးစက်မှု စတင်ပျံ့နှံ့ခဲ့တဲ့ ဝူဟန်မြို့က တရုတ်နိုင်ငံသားငါးဦး မြန်မာဘက်ကို ရောက်နေတယ်လို့ သတင်းရလို့ စစ်ပေးဖို့ တရုတ်ရဲတပ်ဖွဲ့က အကြောင်းကြားခဲ့ပါတယ်။

သူတို့ဟာ ရွှေလီကနေတဆင့် မြန်မာဘက်က မူဆယ်မြို့ကို ရောက်နေတယ်လို့ သတင်းရတဲ့အတွက် ရှာပေးဖို့ ဖေဖော်ဝါရီ ၅ ရက်မှာ မူဆယ်ခရိုင်ရဲမှူးကို အကြောင်းကြားခဲ့တာ ဖြစ်ပါတယ်။

ရှာဖွေခိုင်းသူ အမျိုးသား လေးဦးနဲ့ အမျိုးသမီး တစ်ဦးမှာ ကိုရိုနာ ဗိုင်းရပ်စ် ကူးစက်မှု သံသယရှိလို့ မြန်မာနိုင်ငံကို ကူးစက်နိုင်တဲ့အတွက် ကြိုတင် အကြောင်းကြားတာလို့ ဆိုပါတယ်။

ဒီလို အကြောင်းကြားစာ ရောက်လာပေမဲ့ သူတို့ဒေသမှာ ဗိုင်းရပ်စ် ကူးစက်မှုရှိမရှိ လူတိုင်းကို စစ်ဆေးချိန်မှာ သူတို့တွေဟာ မစစ်ရသေးသူတွေဖြစ်လို့ ရှာဖွေခိုင်းတာသာ ဖြစ်တယ်လို့ ဒီကိစ္စနဲ့ပတ်သက်ပြီး ပြောရေးဆိုခွင့်ရှိသူ မူဆယ်မြို့က ပြန်ဆက်ဦးစီးအရာရှိ ဦးအယ်စိုးထန်းက ဘီဘီစီကို ပြောပါတယ်။

လောလောဆယ်မှာ အဲဒီရှာဖွေခိုင်းသူတွေထဲက အမျိုးသမီးတစ်ဦးကို ပန်ဆိုင်းမှာ ရှာတွေ့ပြီ ဖြစ်ပြီး ကျန်လေးဦးကိုတော့ ရှာမတွေ့သေးဘူးလို့ ဦးအယ်စိုးထန်းက ပြောပါတယ်။

အခု ရှာတွေ့ခဲ့တဲ့ အမျိုးသမီးမှာ အဖျားမရှိကြောင်းနဲ့ သူ့ကို တရုတ်နိုင်ငံဘက်ကို ပြန်လွှဲပေးလိုက်ပြီဖြစ်ကြောင်းလည်း ဦးအယ်စိုးထန်းက ပြောပါတယ်။

အဲဒီအမျိုးသမီးက ပန်ဆိုင်းက သူ့သားသမီးတွေရှိရာကိုလာသူ ဖြစ်ပြီး မြန်မာဘက်ကို ဇန်နဝါရီ ၁၅ ရက် ကတည်းက တရုတ်နှစ်သစ်ကူး ပိတ်ရက်အတွက် ပြန်ရောက်နေတာလို့ သိရပါတယ်။

ဒါ့အပြင် ကျန်နေသေးတဲ့ လေးယောက်ဟာ အခုလတ်တလောမှာ ဝူဟန်ကို သွားလာဖူးသူတွေ မဟုတ်ဘူးလို့လည်း ဦးအယ်စိုးထန်းက ပြောပါတယ်။

သူတို့တွေ မြန်မာဘက်ကို တရားဝင် ဒါမှမဟုတ် ဘယ်လို ရောက်လာတာလဲ ဆိုတာကိုတော့ ရှင်းရှင်းလင်းလင်း မသိရသေးပါဘူး။

လတ်တလောမှာ ကိုရိုနာဗိုင်းရပ်စ်ဟာ ကူးစက်မှု မြန်ဆန်ပြီး လူအချင်းချင်း ကူးစက်နိုင်ခြေရှိလို့ မြန်မာဘက်က ကျန်းမာရေး ဝန်ကြီးဌာနက ရောဂါကူးစက်မှု တားဆီးရေး အရှိန်မြှင့်လုပ်မယ်လို့ ပြောထားပါတယ်။

မြန်မာ နိုင်ငံအနေနဲ့ နယ်စပ် အဝင်အထွက်ဂိတ်တွေမှာ ဇန်နဝါရီ ၂၆ ရက် နောက်ပိုင်း ဝင်ထွက်သွားလာသူတိုင်းကို အဖျားတိုင်း စစ်ဆေးတာ၊ နှာခေါင်းစည်းပေးဝေတာတွေ လုပ်ပြီး ဖျားနာတာတွေ့ရင် ဝူဟန်နဲ့ ဆက်စပ်မှု ရှိမရှိ မေးမြန်းတာတွေကို လုပ်နေတယ်လို့ ဦးအယ်စိုးထန်းက ပြောပါတယ်။

တရုတ်နိုင်ငံထဲမှာ ဆေးရုံနှစ်ရုံ အသစ်တည်ဆောက်တာနဲ့ နောက်ထပ် လူတစ်သောင်းဆံ့ ရောဂါကုသရေးနေရာတွေ ဖန်တီးတာတွေ လုပ်ပေမဲ့ ရောဂါကူးစက်မှုတုံ့ပြန်ရာမှာ လိုအပ်ချက်တွေ ရှိနေသေးတယ်လို့ တရုတ်အစိုးရက ဝန်ခံထားပါတယ်။

ဗိုင်းရပ်စ်ကူးစက်မှုကြောင့် လူ ၆၃၆ ယောက် သေဆုံးခဲ့ပြီး လူပေါင်း ၃၁,၁၉၈ ကို တရုတ်နိုင်ငံထဲမှာ ကူးစက်ထားပါတယ်။ ဒါ့အပြင် တခြားနိုင်ငံ ၂၅ နိုင်ငံကို ကူးစက်ထားပါတယ်။