ကိုရိုနာဗိုင်းရပ်စ် - တရုတ်နိုင်ငံသားတွေကို ထိုင်ဝမ်ဝင်ခွင့်ပိတ်

ကိုရိုနာဗိုင်းရပ်စ် ကူးစက်မှု တားဆီးနိုင်ဖို့အတွက် တရုတ်နိုင်ငံသားတွေ ထိုင်ဝမ်ကျွန်းကို ဝင်ခွင့်ပိတ်လိုက်ပါတယ်။

လတ်တလော တရုတ်၊ ဟောင်ကောင်နဲ့ မကာအိုတို့ကို သွားရောက်ခဲ့သူတွေ ထိုင်ဝမ်ကို ဝင်မယ်ဆိုရင်လည်း နှစ်ပတ်သီးသန့်ခွဲထား စောင့်ကြည့်မယ်လို့ ဆိုပါတယ်။

ဒါ့အပြင် ထိုင်ဝမ်ကျွန်းမှာ ဆိုက်ကပ်မယ့် နိုင်ငံတကာ ခရီးသည်တင်သင်္ဘောတွေကိုလည်း တားမြစ်လိုက်ပါတယ်။

အခုချိန်ထိ ထိုင်ဝမ်မှာ ကူးစက်မှု ၁၁ ခု ရှိပါတယ်။

အမေရိကန်၊ သြစတြေးလျနဲ့ စင်ကာပူတို့ကလည်း အလားတူ တားမြစ်ချက်တွေ ကြေညာထားပါတယ်။

တရုတ်နိုင်ငံမှာတော့ ဒေသအာဏာပိုင်တွေက သူတို့ပြည်သူတွေကို ခရီးသွားလာတာတွေကို တားမြစ်ထားပါတယ်။

ကူးစက်မှုကြောင့် တရုတ်မှာ သေဆုံးသူ ၅၆၀ ကျော်ရှိပြီး ကူးစက်ခံထားရသူပေါင်း ၂၈၀၀၀ ကျော်ရှိနေပါပြီ။

တခြားနိုင်ငံတွေမှာ ဗိုင်းရပ်စ်ကူးစက်မှု ကာကွယ်ရေး ထပ်တိုး လုပ်ဆောင်နေတာတွေ-

အိန္ဒိယ - တရုတ်ဗီဇာအားလုံးကို ပယ်ဖျက်လိုက်ပါပြီ။ ဒါကြောင့် ဝင်ခွင့်ပြန်ဖွင့်ပေးတဲ့အခါ အိန္ဒိယကိုလာဖို့ ဗီဇာနောက်ထပ် ထပ်လျှောက် အစစ်ဆေးခံရပါမယ်။

ဂျပန် - ဂျပန် ယိုကိုဟားမား ဆိပ်ကမ်းမှာ ရပ်နားပြီး သီးသန့်ခွဲထား စောင့်ကြည့်ခံနေရတဲ့ ခရီးသည်တင်သင်္ဘောက လူတွေ ထဲမှာ နောက်ထပ် ၁၀ ယောက်မှာ ဗိုင်းရပ်စ်ကူးစက်ခံရတာ တွေ့ခဲ့ပါတယ်။ ဒါကြောင့် အဲဒီသင်္ဘောက စုစုပေါင်း လူ ၂၀ မှာ ကူးစက်ခံနေရပြီ ဖြစ်ပါတယ်။ လူ ၃၇၀၀ ပါတဲ့ အဲဒီသင်္ဘောပေါ်ကနေ ဟောင်ကောင်မှာ ဆင်းခဲ့တဲ့ တစ်ယောက်မှာ ကူးစက်ခံနေရတာကို တွေ့ခဲ့ပြီးနောက်မှာ အဲဒီက လူတွေကို ခွဲထားစောင့်ကြည့်နေတာ ဖြစ်ပါတယ်။

ဟောင်ကောင် - ဟောင်ကောင်ဒေသခံတွေအပါအဝင် တရုတ်ကဝင်လာသူတွေကို နှစ်ပတ်ခွဲထားစောင့်ကြည့်မယ်လို့ မနေ့က ကြေညာထားပါတယ်။

ခရီးသည် ၃၆၀၀ ပါတဲ့ ခရီးသည် သင်္ဘောတင်က ခရီးသည် သုံးယောက်မှာ ဗိုင်းရပ်စ် ကူးစက်ခံထားရတာတွေ့လို့ ဒီသင်္ဘောကလူတွေကို သင်္ဘောပေါ်က ဆင်းခွင့်မပေးဘဲ ဝင်ခွင့်တားမြစ်ထားပါတယ်။

ဆော်ဒီအာရေးဘီးယား - နိုင်ငံသားတွေနဲ့ သူ့နိုင်ငံထဲမှာ နေထိုင်သူတွေကို တရုတ်ကို မသွားဖို့ တားမြစ်လိုက်ပါတယ်။

အမေရိကန် - တရုတ် ဝူဟန်မှာ ပိတ်မိနေတဲ့ အမေရိကန် ၃၅၀ ကို လေယာဉ်နဲ့ ပြန်ခေါ်ပြီး ကယ်လီဖိုးနီးယားက စစ်စခန်း နှစ်ခုမှာ နှစ်ပတ်သီးသန့်ခွဲထားစောင့်ကြည့်နေပါတယ်။

မြန်မာနိုင်ငံမှာတော့ တရုတ်နိုင်ငံသားတွေကို ဆိုက်ရောက်ဗီဇာပေးနေတာကို ဖေဖော်ဝါရီကစလို့ ယာယီ ရပ်ဆိုင်းထားပါတယ်။

တရုတ်အာဏာပိုင်တွေကတော့ ကူးစက်ပြန့်ပွားမှု ထိန်းချုပ်ရေးအတွက် အဓိက ကူးစက်မှု ဖြစ်နေတဲ့ ဝူဟန်မှာ ဆေးရုံအသစ်နှစ်ခု အလျင်အမြန်တည်ဆောက်ခဲ့ပြီး အားကစားရုံနဲ့ စုဝေးခန်းမှ ၁၁ ခုကို ဆေးရုံအဖြစ် အရေးပေါ် ပြောင်းလဲခဲ့ပါတယ်။