ကိုရိုနာဗိုင်းရပ်စ် - ဝူဟန်က မြန်မာကျောင်းသားတွေ ပြန်ဖို့ ဘယ်လောက်နီးစပ်ပြီလဲ

နိုဗယ် ကိုရိုနာ ဗိုင်းရပ်စ်စတင်ပြန့်ပွားရာ ဝူဟန်မြို့ထဲ ပိတ်မိနေတဲ့ မြန်မာကျောင်းသားတွေကို ခေါ်ဖို့ တရုတ်အစိုးရရဲ့ ခွင့်ပြုချက်ရတာနဲ့ လာမယ့် စနေ၊တနင်္ဂနွေနေ့မှာ ချက်ချင်းခေါ်ယူဖို့ အားလုံး အသင့်ပြင်ထားတယ်လို့ ဘေဂျင်းက မြန်မာသံရုံးက ဇန်နဝါရီ ၂၉ ရက်စွဲနဲ့ ထုတ်ပြန်လိုက်ပါတယ်။

သံရုံးထုတ်ပြန်ချက်မှာ လူမှု ကွန်ရက်မှာ စားနပ်ရိက္ခာတွေ ပြတ်တော့မယ်ဆိုတာအပါအဝင် မမှန်ကန်တဲ့သတင်းတွေ ပြောဆိုရေး သားတာမလုပ်ဖို့ မြန်မာကျောင်းသားတွေကို မေတ္တာရပ်ခံတယ်လို့လည်း အဲဒီထုတ်ပြန်ချက်က ဆိုပါတယ်။

တရုတ်အာဏာပိုင်တွေကို တင်ရမယ့် အချက်အလက်တွေအကုန် မြန်မာဘက်က တင်ပြထားပြီး မြန်မာ နဲ့အတူ ထွက်ခွာခွင့် စောင့်ဆိုင်းနေတဲ့ တခြားနိုင်ငံတွေလည်း ရှိနေတုန်း ဖြစ်တယ်လို့ ဘေဂျင်းက မြန်မာသံရုံးရဲ့ ဒုတိယအတွင်းဝန် ဦးစိုးပြည့်ဝင်းက ဘီဘီစီကို ပြောပါတယ်။

"Flight Permission မရရင် ကျန်တဲ့ဟာတွေ ဘာမှ အစီအစဉ် ဆက်လုပ်လို့ မရဘူး။ တရုတ်က တင်ပြပါ၊ ခွင့်ပြုမိန့်ချပေးမယ်၊ အထူးအခြေအနေဆိုတော့ ခွင့်ပြုရင် ပြုလိုက်မယ်၊ ခွင့်မပြုရင် မပြုသေးဘူး၊ အဲလိုတော့ရှိတယ်။ အကြောင်းတော့ မပြန်သေးဘူး။ သံရုံးအနေနဲ့ တောက်လျှောက်ဆက်သွယ်တာပေါ့နော်။ သက်ဆိုင်ရာ တရုတ်ဘက်ကိုတော့ အထပ်ထပ်ညှိနှိုင်းတယ်။ မေတ္တာရပ်ခံတယ်" လို့ ပြောပါတယ်။

ဝူဟန်ထဲက အမေရိကန်နဲ့ ဂျပန်နိုင်ငံသားတွေကို ထွက်ခွာခွင့်ပေးခဲ့တဲ့အတွက် အဲဒီနိုင်ငံတွေလို ချက်ချင်း ထွက်ခွာနိုင်ဖို့ သံတမန်လမ်းကြောင်းအရ လုပ်ဆောင်နိုင်တဲ့နည်းလမ်းတွေကို ဘီဘီစီက မေးတဲ့အခါ ဦးစိုးပြည့်ဝင်းက အဲဒီလိုထွက်ခွာဖို့နည်းလမ်းကို စုံစမ်းပေမဲ့ တိကျတဲ့အချက်အလက် မရသေးဘူးလို့ ပြောပါတယ်။

မြန်မာသံရုံးဘက်က အစွမ်းကုန် ကြိုးစားပေးနေတာက သိရှိပြီး ကျေးဇူးတင်ပေမယ့် တခြားနိုင်ငံတွေလို အင်တိုက် အားတိုက်ဆောင်ရွက်မှုမျိုး လုပ်ဆောင်စေချင်တယ်လို့ ဝူဟန်ဆေးတက္ကသိုလ်မှာ ဆေးပညာ မဟာဘွဲ့ တက်ရောက်နေတဲ့ ဒေါက်တာ ခင်သီရိသန့်ဇင်က ပြောပါတယ်။

ဒါ့အပြင် အစားအသောက် ပြတ်လပ်တော့မယ်ဆိုတာနဲ့ တခြားနိုင်ငံသားတွေ အလွယ်တကူထွက်ခွာလို့ရတယ်ဆိုတာ သတင်းအမှားတွေလို့ သံရုံးရဲ့ ထုတ်ပြန်ချက်နဲ့ပတ်သက်လို့ ဒေါက်တာခင်သီရိသန့်ဇင်က "အမေရိကန်နဲ့ ဂျပန်က ထွက်ခွာသွားပြီဆိုတာတော့ confirm ပါ။ သူများနိုင်ငံတွေနဲ့ တန်းတူ သူတို့လို အမြန်ဆုံး ပြန်ခေါ်စေချင်တဲ့ စိတ်လေးတစ်ခုပါ။ နောက် စိတ်အားငယ်တယ်။"

"စားနပ်ရိက္ခာက ဒီမှာ အယောက် ၆၀ က ကျောင်းတစ်ကျောင်းတည်းမှာ စုနေကြတာ မဟုတ်ဘူး။ Public Transportation တွေ အကုန်လုံးပိတ်ထားတဲ့အတွက်ကြောင့် သူတို့အတွက်လည်း ပို့ပေးဖို့ အခက်အခဲရှိတာကို နားလည်တယ်" လို့ ပြောပါတယ်။

Skip အဖတ်အများဆုံး and continue reading
အဖတ်အများဆုံး

End of အဖတ်အများဆုံး

ဒါ့အပြင် သူ့အတွက် အစားအသောက်က သုံးရက်စာလောက်ပဲ ကျန်တော့တယ်လို့ ပြောပါတယ်။

ဝူဟန်နည်းပညာတက္ကသိုလ်က ပါရဂူတန်းကျောင်းသူ မသင်းသင်းထက်က

"ကန်တင်းဖွင့်ပေးထားတယ်လို့ ပြောပေမဲ့ ကူးစက်နှုန်းမြန်နေတဲ့ အချိန်မှာ mask တပ်ပြီး အပြင်မထွက်ရဲကြဘူး။ ကိုယ့်အခန်းထဲကနေ အဆောင်ထဲ အဝတ်လျှော်ဖို့ သွားတာတော့ အဆင်ပြေသေးတယ်။ အဆောင်ထဲကကျတော့ ဟိုတစ်နေ့က ဆေးဖြန်းထားတယ်။"

"အဆောင်ရဲ့ အပြင်ဘက်ကို ထွက်သွားဖို့ဆိုတာက ဘယ်လိုမှ အဆင်မပြေတဲ့အနေအထား။ တချို့ကျောင်းကျတော့ နည်းနည်းလေး အခက်အခဲရှိတယ်။"

"ကျောင်းကပို့တဲ့ သတင်းတွေအရဆိုရင် အဆောင်ထဲကနေပြီးတော့ အပြင်ကို ထွက်သွားတာသည် သူတို့အတွက်က illegal ပေါ့။ သူတို့ရဲ့ rules and regulations ကို မလိုက်နာဘူးဆိုတဲ့ သဘောပေါ့"လို့ သူတို့ကျောင်းရဲ့ အခြေအနေကို ပြောပြပါတယ်။

"ချွေစားမယ်ဆိုရင်တော့ သုံးလေးရက်စာလောက်တော့ ကျန်ပါသေးတယ်။ တစ်နေ့ကို ထမင်းတစ်နပ်နှုန်းနဲ့ပေါ့" လည်း မသင်းသင်းထက်က ပြောပါတယ်။

တချို့ကျောင်းတွေမှာ အခန်းအရောက် ကိုယ်အပူချိန်တိုင်းတာလုပ်ပေးပြီး တချို့ကျောင်းမှာတော့ ကိုယ့်ကိုယ်ကိုယ် သံသယရှိလာရင် သတ်မှတ်နေရာမှာ အပူချိန်လာတိုင်းဖို့ ပြောထားတယ်တွေ ရှိတယ်လို့လည်း သူက ပြောပါတယ်။

ဒါ့အပြင် စားနပ်ရိက္ခာထက် ကျောင်းသားတွေက ပြန်ဖို့ကိုပဲ ဦးစားပေးကြတယ်လို့လည်း ပြောပါတယ်။

လက်ရှိမှာ မြန်မာက စေလွှတ်မယ့် အထူးလေယာဉ်ရဲ့အသေးစိတ် အချက်အလက်တွေ၊ တရုတ်ဘက်က ဒေသန္တရ ကျန်းမာရေးအာဏာပိုင်တွေရဲ့ ခွင့်ပြုချက်၊ ဝူဟန်ထဲက ကျောင်းသား တွေရဲ့ ခရီးသွားအထောက် အထားတွေ တင်ပြနိုင်ရေးနဲ့ အထူးလေယာဉ်ပေါ် လိုက်ပါမယ့် ကျန်းမာရေးအဖွဲ့ အပါအဝင် လိုအပ်တာတွေ အကုန်ပြင်ဆင်ထားတယ်လို့ မြန်မာသံရုံး ထုတ်ပြန်ချက်မှာ ဖော်ပြထားပါတယ်။

အခုအချိန်မှာ ကိုရိုနာဗိုင်းရပ်စ်ကြောင့် သေဆုံးသူ ၁၇၀ ဦးအထိရှိပြီး တိဘက် အပါအဝင် တရုတ်ပြည်မကြီးရဲ့ ဒေသအားလုံးကို ပျံ့သွားပြီးလို့ တရုတ်အစိုးရက အတည်ပြုထားပါတယ်။

ကူးစက်ခံရသူက ဇန်နဝါရီ ၂၉ ရက်မှာ ၇၇၀၀ ကျော်အထိရှိသွားပြီလို့လည်း တရုတ်ကျန်းမာရေးအာဏာပိုင် အဖွဲ့က အတည်ပြုထားပြီး အနည်းဆုံး တခြား နိုင်ငံ ၁၉ နိုင်ငံကိုလည်း ကူးစက်သွားပြီ ဖြစ်ပါတယ်။