ဒေတာကုန်ကျမှုလျှော့ချနိုင်ရန်အတွက် ယခုဝက်ဘ်ဆိုက်မှ စာမျက်နှာများကို ရုပ်ပုံမပါ စာသားဖြင့်သာတင်ဆက်ပေးထားပါသည်။ ရုပ်ပုံ ဗီဒီယိုများနှင့် ကြည့်လိုလျှင် မူလစာမျက်နှာတွင်ကြည့်နိုင်ပါသည်။
နိုင်ငံခြားရေးဝန်ကြီးဌာနက ဝူဟန်က မြန်မာကျောင်းသားတွေကို အမြန်ပြန်ခေါ်မယ်
ကိုရိုနာဗိုင်းရပ်စ် စတင်ဖြစ်ပွားခဲ့တဲ့ တရုတ်နိုင်ငံ၊ ဟူဘေးပြည်နယ်ထဲက ဝူဟန်မြို့မှာ ပိတ်မိနေတဲ့ မြန်မာကျောင်းသားတွေကို အမြန်ဆုံး ပြန်လည်ခေါ်ယူဖို့ မြန်မာနိုင်ငံခြားရေးဝန်ကြီး ဌာနက ဇန်နဝါရီလ ၂၅ ရက်နေ့မှာ ညွှန်ကြားချက် ထုတ်ပြန်လိုက်ပါတယ်။
ဒီညွှန်ကြားချက် ထုတ်ပြန်အပြီးမှာတော့ တရုတ်အာဏာပိုင်တွေနဲ့ ညှိနှိုင်းဆွေးနွေးနေတယ်လို့ ဘီဂျင်းအခြေစိုက် မြန်မာသံရုံး ဒုတိယအတွင်းဝန် ဦးစိုးပြည့်ဝင်းက ဘီဘီစီကို ပြောပါတယ်။
ကိုရိုနာဗိုင်းရပ်စ်ကြောင့် သေဆုံးသူ ဦးရေဟာ ၅၆ ဦးထိ ရှိလာပြီး ကူးစက်ခံရသူ အရေအတွက်ကလည်း ၂၀ဝ၀ နီးပါးရှိလာနေပါတယ်။
ဒါကြောင့် တရုတ်သမ္မတ ရှီကျင့်ဖျင်က လဆန်းနှစ်သစ်ကူး အစိုးရ ရုံးပိတ်ရက်မှာ အထူး အစည်းအဝေး တစ်ခု ခေါ်ယူပြီး အခုပြန့်ပွားနေတဲ့ ကိုရိုနာ ဗိုင်းရပ်စ်နဲ့ ပတ်သက်ပြီး အထူးသတိထားဖို့ သတိပေးခဲ့ပါတယ်။
မစ္စတာရှီက တိုင်းပြည်ဟာ အခြေအနေဆိုးကို ရင်ဆိုင်နေရပြီလို့ တရုတ်ထိပ်တန်းအရာရှိတွေကို ပြောကြားခဲ့ပါတယ်။
ရောဂါစတင်ဖြစ်ပွားရာ ဝူဟန်မြို့ကိုလည်း အဝင်အထွက်သွားလာခွင့်တွေ ပိတ်ပင်ထားပါတယ်။
ဒီလို အဝင်အထွက်ပိတ်ထားတဲ့ ဝူဟန်မြို့ထဲက ပိတ်မိနေသူ မြန်မာကျောင်းသားတွေအတွက် ရိက္ခာမပြတ်လပ်အောင် စီစဉ်ပေးဖို့ကို တရုတ်အာဏာပိုင်တွေဆီကို မြန်မာသံရုံးက အကူအညီ တောင်းထား တယ်လို့ ဒုတိယအတွင်းဝန် ဦးစိုးပြည့်ဝင်းက ဆိုပါတယ်။
လက်ရှိ အခြေအနေ ဝူဟန်ရောက် မြန်မာကျောင်းသားတွေကတော့ မနေ့က ကျောင်းတွင်းက ဆူပါမားကတ် ဆိုင်တစ်ခုကို မနေ့က ဝယ်ယူခွင့်ပေးလိုက်တာကြောင့် အစားအသောက် အနည်းငယ် ဝယ်ယူ နိုင်ခဲ့တဲ့အတွက် သုံးရက်လောက်အထိတော့ အစားအသောက် ဖူလုံတယ်လို့ ဝူဟန်နည်းပညာ တက္ကသိုလ်က မြန်မာကျောင်းသား ကိုစည်သူထွန်းက ဆိုပါတယ်။
ဒါပေမယ့်လည်း မျက်နှာဖုန်း Mask ဝယ်လို့ မရဖြစ်နေပြီး နေရပ်ပြန်ဖို့ကတော့ မြန်မာသံရုံးအပေါ်မှာ မူတည်တယ်လို့ ကိုစည်သူထွန်းက ပြောပြပါတယ်။
ကိုရိုနာ ဗိုင်းရပ်စ်ရောဂါပိုးဟာ ကာကွယ်ဆေးမရှိသေးတာကြောင့် လူထုအနေနဲ့ ကိုယ်ခံအား ကောင်းအောင် နေထိုင်သင့်ပြီး လူထူထပ်တဲ့ နေရာတွေကို ရှောင်ရှားဖို့၊ တိရိစ္ဆာဆန်တွေကို အကာအကွယ် မပါပဲ ထိတွေ့ကိုင်တွယ်တာ မလုပ်ဖို့ ကျန်းမာရေးဝန်ကြီးဌာနက ညွှန်ကြားထားပါတယ်။
ကမ္ဘာ့နိုင်ငံတချို့မှာတော့ ဒီဗိုင်းရပ်စ်ပိုး ကူးစက်တာ တွေ့ရှိနေရတဲ့အပြင် မြန်မာနိုင်ငံရဲ့ အိမ်နီးချင်း နိုင်ငံတစ်ချို့မှာလည်း ရောဂါ ကူးစက်တဲ့ လက္ခဏာတွေကို တွေ့နေရပေမယ့် မြန်မာနိုင်ငံမှာတော့ ဒီဗိုင်းရပ်စ်ပိုး ကူးစက်တာ မရှိသေးဘူးလို့ အာဏာပိုင်တွေက ပြောကြားထားပါတယ်။
