တရုတ်မြန်မာနယ်စပ်မှာ လူစုလူဝေးနဲ့ အသွားအလာများကန့်သတ်

မြန်မာ တရုတ်နယ်စပ်ရဲ့ အဓိက ကုန်သွယ်ရေး မြို့ဖြစ်တဲ့ ရွှေလီမြို့မှာ ကိုရိုနာဗိုင်းရပ်စ်ကူးစက်ခံရသူ တွေ့ရှိခဲ့တဲ့အတွက် ရွှေလီမြို့ပေါ်က ပန်းခြံ ၊ ဟိုတယ်နဲ့ လောင်းကစားဝိုင်းတွေကို ခေတ္တပိတ်ထားမယ့် အပြင် လူစုလူဝေးနဲ့ ပြုလုပ်တဲ့ ပွဲလမ်းသဘင် အခမ်းအနားတွေကိုလည်း ပိတ်ထားမှာ ဖြစ်တယ်လို့ ရွှေလီမြို့အစိုးရက ကြေညာထားပါတယ်။

တရုတ်နိုင်ငံ ၊ ဟူဘေးပြည်နယ် ၊ ဝူဟန်မြို့ကနေ စတင်ဖြစ်ပွားခဲ့တဲ့ ကိုရိုနာ ဗိုင်းရပ်စ်ကြောင့် အခုဆိုရင် သေဆုံးသူ ၈၀ ဦးထိရှိလာပြီး ရောဂါပိုးကူးစက်သူ ၃၀ဝ၀ ကျော် အထိ ရှိလာနေပါတယ်။

ရွှေလီမြို့မှာ ဖြစ်ပျက်နေတဲ့ အခြေအနေကတော့ လက်ရှိ အနေအထားမှာ ရောဂါပိုးကို မထိန်းချုပ်နိုင်ဘူးဆိုရင် နှစ်နိုင်ငံ အပြန်အလှန် ပိတ်ဆို့မှုတွေ လုပ်ရတော့မှာ ဖြစ်တယ်လို့ မူဆယ်ဒေသခံ ကုန်သည်တစ်ဦးဖြစ်တဲ့ ဦးစိုင်းခင်မောင်က ပြောပါတယ်။

ဒါ့အပြင် နှစ်နိုင်ငံနယ်စပ်ဂိတ်ဖြစ်တဲ့ မူဆယ် (၁၀၅)မိုင် ကုန်သွယ်ရေးဇုန်မှာလည်း သယ်ယူပို့ဆောင်ရေး လမ်းကြောင်း ကန့်သတ်ထားမှုကြောင့် တင်ပို့ရောင်းချမှုနဲ့ ဝယ်ယူမှု ဈေးကွက်မှာ အခက်အခဲ ဖြစ်ပေါ်နေတယ်လို့ မူဆယ်က သစ်သီးဝလံ ကုန်စည်ဒိုင်က စာထုတ်ပြန်ထားပါတယ်။

ကြယ်ဂေါင်မှာ နေထိုင်တဲ့ ဒေသခံ တစ်ဦးကတော့ ကြယ်ဂေါင်ထဲကို တရုတ်ကား မဟုတ်ရင် အဝင် မခံသလို သေသေချာချာ လည်း စစ်ဆေးတဲ့အပြင် တရုတ်ကားနံပါတ်ဆိုရင်လည်း မဝင်ခင် ပိုးသတ်ဆေးဖျန်းပြီးမှ ပေးဝင်တယ်လို့ ဒေသအခြေအနေကို ဘီဘီစီကို ပြောပြပါတယ်။

ရွှေလီမြို့ထဲမှာလည်း တည်းခိုတဲ့ဟိုတယ်တိုင်းက ရွှေလီဒေသခံ မဟုတ်သူတွေကို ကိုယ့်နေရာဒေသကို ပြန်ဖို့ ရွှေလီမြို့ အာဏာပိုင်တွေက ကြေညာချက် ထုတ်ပြန်ထားပါတယ်။

ရွှေလီမြို့ဟာ မြန်မာနိုင်ငံနဲ့ နယ်နိမိတ်ခြင်း ထိစပ်နေတဲ့ မြို့ဖြစ်သလို ကုန်သွယ်ရေး အဓိကပြုလုပ်နေတဲ့မြို့ဖြစ်ပါတယ်။

အခုလက်ရှိအချိန်မှာတော့ တရုတ်နှစ်သစ်ကူးကာလဖြစ်တဲ့အတွက် ဖရဲ၊ သခွားမွှေးနဲ့ ငရုတ်သီးတောင့် အစရှိတဲ့ သစ်သီးကုန်စည်တွေကို ဒီကနေ့ ပြန်လည်ဖွင့်လှစ် ရောင်းချနေတယ်လို့ သစ်သီးကုန်သည်တွေက ဆိုပါတယ်။

ပုံမှန် ရောင်းချမှုတွေရှိပေမယ့် တရုတ်ပြည်တွင်းမှာ တပြည်နယ်နဲ့ တပြည်နယ် အသွားအလာတွေ ကန့်သတ်ထားတာကြောင့် ရောင်းချမှုကတော့ နှေးကွေးနေပြီး မနက်ဖြန်ထိ ဆက်လက် စောင့်ကြည့်ရမှာ ဖြစ်တဲ့အပြင် နောက်ထပ် လာရောက်ရောင်းချမယ့် သစ်သီး ကုန်သည်တွေအနေနဲ့လည်း ရောဂါထိန်းချုပ်နိုင်ပြီး အခြေအနေတည်ငြိမ်တဲ့အထိ စောင့်ဆိုင်းသင့်တယ်လို့ မူဆယ်က သစ်သီးကုန်သည်တစ်ချို့က ပြောခဲ့ပါတယ်။