ဟောင်ကောင်ဆန္ဒပြသီချင်း ပိတ်ပင်ဖို့ အစိုးရကို တရားရုံး အနိုင်ပေး
ဓာတ်ပုံ ရင်းမြစ်, Getty Images
ဟောင်ကောင်မှာ အရင်တုန်းက ဆန္ဒပြပွဲတွေအတွင်း ဟစ်ကြွေးလေ့ရှိတဲ့ သီချင်းကို တရားဝင် တားမြစ်ပေးဖို့ အစိုးရရဲ့ အဆိုကို အယူခံတရားရုံးက အတည်ပြုပေးလိုက်တာကြောင့် ဒါကို ဆန့်ကျင်ဆန္ဒပြဖို့ ဒီမိုကရေစီအရေး လှုပ်ရှားသူတွေက တိုက်တွန်းနေပါတယ်။
Glory to Hong Kong သီချင်းကို တရားမဝင်တဲ့ သီချင်းအဖြစ် အစိုးရက လျှောက်ထားခဲ့ရာမှာ မနှစ်တုန်းကတော့ အောက်တရားရုံးမှာ ပယ်ချခံခဲ့ရပါတယ်။
ဒီသီချင်းကို တားမြစ်တာဟာ လွတ်လပ်စွာ ထုတ်ဖော်ပြောဆိုခွင့်ကို အဟန့်အတား ဖြစ်စေလိမ့်မယ်လို့ တရားသူကြီး တယောက်က ပြောကြားခဲ့တာပါ။
ဒါပေမယ့် အစောပိုင်းတုန်းက ချခဲ့တဲ့ ဒီဆုံးဖြတ်ချက်ကို အစိုးရက ပြန်ပြီး အယူခံတင်ခဲ့ရာမှာ ဒီနေ့ မေလ ၈ ရက် ဗုဒ္ဓဟူးနေ့မှာ အယူခံတရားရုံးက ပြန်ပြောင်း အမိန့်ချခဲ့တာ ဖြစ်ပါတယ်။
အခု တရားရုံးရဲ့ လုပ်ရပ်ဟာ လွတ်လပ်မှု ထိန်းချုပ်ခံနေရတဲ့ ဟောင်ကောင်မှာ စိုးရိမ်မှုတွေကို ပိုတိုးလာစေခဲ့ပါတယ်။
ဒါ့အပြင် ရာဇဝတ်မှုမြောက်စေတဲ့ လုပ်ဆောင်ချက်တွေကို အမြန် ရပ်တန့်ဖို့ လိုတယ်လို့လည်း တရားသူကြီးတယောက်က ပြောသွားခဲ့ပြီး ဘယ်လုပ်ရပ်တွေက ရာဇဝတ်မှု ဖြစ်စေသလဲ ဆိုတာတော့ အတိအကျ ပြောမသွား ခဲ့ပါဘူး။
အခုလို ဟောင်ကောင်ဆန္ဒပြသီချင်းကို အာဏာပိုင်တွေက တားမြစ်ဖို့ လုပ်ဆောင်ချက်ဟာ အမျိုးသား လုံခြုံရေး ကာကွယ်စောင့်ရှောက်ရမယ့် တာဝန်ကို ဖြည့်ဆည်းရာ ရောက်တယ်လို့ တရုတ်နိုင်ငံခြားရေး ဝန်ကြီးဌာနပြောခွင့်ရသူက ဒီနေ့ ဗုဒ္ဓဟူးနေ့မှာ ပြောသွားခဲ့ပါတယ်။
အရင်က တရားရုံးအမိန့်
ဓာတ်ပုံ ရင်းမြစ်, Getty Images
ဒီသီချင်းနဲ့ပတ်သက်ပြီး ၂၀၂၃ ခုနှစ်တုန်းကတော့ ဟောင်ကောင်တရားရုံးက အစိုးရရဲ့ ပိတ်ပင်တားမြစ်ဖို့ တောင်းဆိုချက်ကို ပယ်ချခဲ့တာပါ။
နောက်ဆုံးရ သတင်းနဲ့ မျက်မှောက်ရေးရာအစီအစဉ်များ
ပေါ့ဒ်ကတ်စ်အစီအစဉ်များ
End of podcast promotion
တရားသူကြီး အန်တိုနီချန်းက ဒီသီချင်းကို ပိတ်ပင်တာဟာ လွတ်လပ်စွာ ထုတ်ဖော်ပြောဆိုခွင့်ကို နှောင့်ယှက်ရာ ရောက်တယ် အထူးသဖြင့် အပြစ်မဲ့ တတိယ အဖွဲ့အစည်းရဲ့ ဥပဒေကြောင်းအရ အခွင့်အရေးတွေ အပေါ် သက်ရောက်မှု ရှိနိုင်တယ်လို့ ဆိုပြီး အမိန့်ချမှတ်ခဲ့တာ ဖြစ်ပါတယ်။
၂၀၁၉ တုန်းက ဟောင်ကောင် ဒီမိုကရေစီ လှုပ်ရှားမှု အတွင်း ကန်တုန်ဘာသာနဲ့ ရေးသားပြီး ဆန္ဒပြသမားတွေ သီဆိုခဲ့တဲ့ ဒီသီချင်းမှာ 'ဒါဟာ ငါ့တို့ခေတ်ရဲ့ တော်လှန်ရေး ၊ လူထုဟာ ဂုဏ်သရေ ရှိစွာနဲ့ လွတ်လပ်မှု အပြည့်နဲ့ အခုကော နောင်ကော ပိုတိုး အုပ်ချုပ်နိုင်စေရမယ် ၊ ထွန်းလင်းတောက်ပတဲ့ ဟောင်ကောင် ဖြစ်လာရမယ်' ဆိုတဲ့ စာသားတွေ ပါရှိပါတယ်။
အဲဒီတုန်းက ဟောင်ကောင်နိုင်ငံသား အများအပြားဟာ ဒီသီချင်းကို ဆိုပြီး တရုတ်ကနေ ဟောင်ကောင် ခွဲထွက်မှုကို ထောက်ခံ ဆန္ဒပြခဲ့ကြတာပါ။
ဟောင်ကောင်မှာ အခုလို ဥပဒေတွေ ပြဋ္ဌာန်းပြီး အရေးယူမှု လုပ်နေစဉ်မှာ ဒီသီချင်း ဆိုရင်ကို အမျိုးသား လုံခြုံရေး ဥပဒေအရ ပြစ်ဒဏ်ပေး အရေးယူ ခံရနိုင်တာ ဖြစ်ပါတယ်။
၂၀၂၂ တုန်းကလည်း ဗြိတိသျှ ဘုရင်မကြီး ကံတော်ကုန်စဉ်မှာ လူတယောက်က ဟောင်ကောင်က ဗြိတိသျှ သံရုံး အပြင်ဘက်မှာ ဒီသီချင်းဖွင့်ပြီး ဝမ်းနည်းကြောင်းပြခဲ့တဲ့အတွက် အဖမ်းခံခဲ့ရပါတယ်။
ဒီသီချင်းကို ကျောင်းတွေမှာ ၂၀၂၀ ကတည်းက တားမြစ်ထားပြီးသား ဖြစ်ပါတယ်။
ဒါ့အပြင် ဟောင်ကောင် အာဏာပိုင်တွေဟာ ဂူဂယ်လို့နည်းပညာ ကုမ္ပဏီကြီးတွေကို ဒီဆန္ဒပြ သီချင်းနဲ့ပတ်သက်လို့ သူတို့ရဲ့ Search Engine နဲ့ ဗီဒီယို ချန်နယ်တွေကနေ ဖြုတ်ချပေးဖို့ တောင်းဆိုခဲ့ဖူးပေမယ့် တဘက်က ငြင်းဆန်ခဲ့ပါတယ်။
ဒီသီချင်းကို အရင်ကတော့ တရားဝင် အခမ်းအနားတွေ ဖြစ်တဲ့ နိုင်ငံတကာ အားကစားပွဲတွေမှာ မှားယွင်း သုံးခဲ့ဖူးပြီး ဒီကိစ္စအပေါ် အာဏာပိုင်တွေက စိတ်ဆိုး ဒေါသထွက်ခဲ့ဖူးပါတယ်။
ဟောင်ကောင် အစိုးရရဲ့ ဒီသီချင်း ပိတ်ပင်တားမြစ်ချက်ဟာ လူထုအခွင့်အရေးနဲ့ နိုင်ငံရေး ဆိုင်ရာ လွတ်လပ်ခွင့်တွေအပေါ် ပိုတိုး ဖိနှိပ်လာမှု ဖြစ်တယ်လို့ လူ့အခွင့်အရေး အဖွဲ့တွေက ဝေဖန်ထားပါတယ်။
ဟောင်ကောင်မှာ ဒီမိုကရေစီအရေး ဆန္ဒပြမှုတွေကို နှိမ်နင်းဖို့ ၂၀၁၉တုန်းက အငြင်းပွားဖွယ် အမျိုးသား လုံခြုံရေး ဥပဒေ တရပ်ကို တရုတ်အစိုးရက ပြဋ္ဌာန်း အတည်ပြုပေးခဲ့ပြီးတဲ့ နောက်မှာ အခုလို ကိစ္စရပ်တွေ ပေါ်ပေါက်လာတာ ဖြစ်ပါတယ်။
