မြန်မာငလျင် - ''မြန်မာဟာ အကျပ်အတည်းကြုံနေရတဲ့ မေ့လျော့ခံနိုင်ငံ ဖြစ်လာနေပါတယ်''

မြန်မာမှာ ငလျင်ကြီးလှုပ်ခဲ့တာ ဇွန် ၂၈ ရက်မှာ သုံးလ ရှိပါပြီ။ ငလျင်ဒဏ်သင့်ဒေသတွေမှာ ပြန်လည်ထူထောင်ရေးစိန်ခေါ်မှုတွေရှိနေပြီး လူ ၆ သန်းကျော်လည်း အရေးပေါ်အကူအညီတွေလိုအပ်နေဆဲဖြစ်တယ်လို့ ကုလသမဂ္ဂစီမံကိန်းများဆိုင်ရာဝန်ဆောင်မှုရုံး (UNOPS) အမှုဆောင်ညွှန်ကြားရေးမှူး မစ္စတာ ဂျော့မိုရေးရာဒါဆီးလ်ဗားက ပြောပါတယ်။ သူဟာ ငလျင်ဒဏ်ဆိုးဆိုးရွားရွားခံခဲ့ရတဲ့ မန္တလေးနဲ့စစ်ကိုင်းမြို့တို့ကိုလည်း သွားရောက်ခဲ့ပါတယ်။ အဲဒီက အခြေအနေကို တွေ့မြင်ခဲ့တဲ့ မစ္စတာဂျော့ဂျ်ကို ဘီဘီစီက ရန်ကုန်မြို့မှာ သီးသန့်တွေ့ဆုံမေးမြန်းခဲ့ပါတယ်။

ဘီဘီစီ - မစ္စတာဂျော့ဂျ်ဟာ မန္တလေးနဲ့ စစ်ကိုင်းကို ပြီးခဲ့တဲ့ သီတင်းပတ်ကုန်မှာ သွားရောက်ခဲ့တယ်လို့ ဆိုပါတယ်။ အဲဒီမှာ ပြန်လည်ထူထောင်ရေးအခြေအနေ ဘယ်လိုတွေ့ခဲ့ရသလဲ။

UNOPS - ငလျင်ဒဏ်အဆိုးဆုံးခံခဲ့ရတဲ့ နေရာတွေကို ကျွန်တော်ရောက်ခဲ့ပါတယ်။ အဲဒီမှာ ပြည်သူလူထုရဲ့တောင့်ခံနိုင်စွမ်းကို ကျွန်တော်မျက်မြင်ကြုံခဲ့ရတယ်။ လူထုနဲ့ ကျွန်တော်တို့ရဲ့မိတ်ဖက်အဖွဲ့အစည်းတွေဆီက ငလျင်ကြီးရဲ့အကျိုးဆက်တွေကို ကျော်လွှားဖို့ စိတ်ဆန္ဒပြင်းထန်နေတာကိုလည်း ကျွန်တော် အလွန်ပဲ အားရမိပါတယ်။ ဒါပေမဲ့ အကျပ်အတည်းပေါင်းများစွာနဲ့ ကြုံနေရပြီးသား မြန်မာပြည်သူလုထုကို မေ့မထားကြပါနဲ့ဦး။ ဒီငလျင်ဆိုတာက ကြီးမားတဲ့ ရာသီဥတုပြောင်းလဲမှုရဲ့ သက်ရောက်မှုတွေထဲက နောက်ထပ် အကျပ်အတည်းတစ်ခုပါပဲ။ မြန်မာဟာ ဖန်လုံအိမ်ဓာတ်ငွေ့အာနိသင်အများအပြားမထုတ်ပေမဲ့ ရာသီဥတု ဖောက်ပြန်မှု ဒဏ်ကို အခံရဆုံးထိပ်တန်းငါးနိုင်ငံထဲမှာ ပါဝင်နေတာပါ။ ဒါက လုံးဝမျှတမှုမရှိပါဘူး။ အကြမ်းဖက်မှုတွေနဲ့ ပဋိပက္ခတွေ ကြုံနေရတဲ့ အထဲ ရာသီဥတုဖောက်ပြန်ပြောင်းလဲမှုတွေကြောင့် ကြီးမားတဲ့ သက်ရောက်မှုတွေ ရှိနေတာက လုံးဝ မမျှမတ ဖြစ်နေတဲ့အခြေအနေပါ။ ဒါကြောင့် ငလျင်ဟာ မြန်မာမှာ အေထွေထွေ အကျပ်အတည်းတွေကြားထဲက နောက်ထပ် လူသားချင်စာနာမှုအကျပ်အတည်း တစ်ခုဖြစ်ခဲ့ပါတယ်။

ကျွန်တော်ရောက်ခဲ့တဲ့ စစ်ကိုင်းနဲ့မန္တလေးမှာ ပျက်စီးဆုံးရှုံးမှုတွေကို မျက်ဝါးထင်ထင် တွေ့ခဲ့ရုံသာမက လူထုက သူတို့အိုးအိမ်တွေကို လျင်လျင်မြန်မြန်နဲ့ ပြန်ပြီး တည်ဆောက်ချင်တဲ့ စိတ်ဆန္ဒတွေကိုလည်းတွေ့မြင်ခဲ့ရပါတယ်။ နေအိမ်တော်တော်များများကတော့ ပြန်ဆောက်ပြီးတာ တွေ့ရတယ်။ ပြီးတော့ တချို့ အိမ်တွေက လုံးဝကြီး ပျက်စီးသွား တာမျိုးတော့ မဟုတ်ပေမဲ့ အိမ်ထောင်စုတွေအတွက် နောက်ထပ် မလိုလားအပ်တဲ့ ထိခိုက်မှုတွေ မဖြစ်ပေါ်အောင်လို့ ထိခိုက်ပျက်စီးမှုတွေအတိုင်းအတာကို စစ်ဆေးအကဲဖြတ်ကြည့်ဖို့ အရေးကြီးပါတယ်။ ဒါကြောင့် အဲဒီအပိုင်းမှာလည်း ကျွန်တော်တို့ ယူနော့အဖွဲ့အစည်းက အိမ်ထောင်စုတွေရဲ့ ပျက်စီးဆုံးရှုံးမှုတွေကို အကဲဖြတ်တာတွေ လုပ်ပေးနေပါတယ်။ ယူအန် ဟက်ဘိတက်လိုမျိုးတခြားအဖွဲ့အစည်းတွေကလည်း ဒါကိုလုပ်ပေးနေပါတယ်။ ဒါက သိပ်ကိုအရေးကြီးလို့ပါ။ ဒါတင်မက နေအိမ်တွေ ပြန်လည်တည်ဆောက်ဖို့ဆိုတာ အလုပ်သမားတွေနဲ့ ဆောက်လုပ်ရေးလုပ်သားတွေကို လိုအပ်တဲ့ သင်တန်းတွေပေးဖို့ မရှိမဖြစ် ပါ။ ငလျင်ဒဏ်ကို ခံနိုင်ရည်ရှိပြီး ရာသီဥတု ဒဏ်ကိုလည်း ခံနိုင်ရည်ရှိတဲ့ အိမ်တွေ လိုအပ်တာကြောင့် ဒီလုပ်သားတွေ ပြန်ဆောက်တာက ပိုဘေးကင်းကြောင်း သေချာစေဖို့ အကောင်းဆုံး လေ့ကျင့်မှုတွေ လိုအပ်တယ်။ ဒီသင်တန်းတွေလည်း ကျွန်တော်တို့ လုပ်ပေးနေပါတယ်။ ပြီးတော့ လူတွေ ကြုံတွေ့နေရတဲ့ ကျန်းမာရေး စိန်ခေါ်မှုတွေကိုလည်း ကျွန်တော်တွေ့ခဲ့ရပါတယ်။ ကျွန်တော်စစ်ကိုင်းမှာ ပဋိပက္ခနဲ့ ငလျင်ဘေးကနေ ထွက်ပြေးခဲ့ရသူတွေ အများကြီးရှိတဲ့ ပြည်တွင်း ရွှေ့ပြောင်းနေထိုင်သူတွေရဲ့ စင်တာတွေကို သွားရောက်လေ့လာခဲ့ပါတယ်။ သူတို့တွေမှာ ကျန်းမာရေး၊ ပညာရေးနဲ့ အသက်မွေးဝမ်းကြောင်းဆိုင်ရာ ပံ့ပိုးကူညီမှုတွေ လိုအပ်နေပါတယ်။

ဘီဘီစီ-ငလျင်သင့်ဒေသတွေကိုရောက်တဲ့အခါ မြန်မာအာဏာပိုင်တွေရဲ့ ငလျင်အလွန်ပြန်လည် ထူထောင်ရေး ကြိုးပမ်းမှုတွေကို ဘယ်လိုတွေ့ရလဲ။

မစ္စတာ ဂျော့ဂျ်-အာဏာပိုင်တွေရဲ့ ကြိုးပမ်းအားထုတ်မှုတွေကိုတော့ ကျွန်တော် သတိမမူနိုင်ခဲ့ပါဘူး။ ဒီရက်တိုခရီးအတွင်းမှာ ငလျင်ကြောင့် ပျက်စီးဆုံးရှုံးမှုများကို အကဲဖြတ်တာ၊ စောစီးစွာ ပြန်လည် ထူထောင်ရေးလုပ်ငန်းစဥ်တွေနဲ့ ပြန်လည်တည်ဆောက်ရေးတို့မှာ အကူအညီပေးနေတဲ့ ကျွန်တော်တို့ ယူနော့စ်ရဲ့လုပ်ဆောင်ချက်တွေကိုပဲ အာရုံစိုက်ခဲ့တာပါ။ ကျွန်တော်တို့ရဲ့ ဒေသခံလုပ်ဖော်ကိုင်ဖက်တွေဆီကနေ သိပ်ထိရောက်တဲ့ လုပ်ဆောင်မှုတွေကို တွေ့မြင်နိုင်ခဲ့ပါတယ်။ ပြီးတော့ ကျွန်တော်တို့ရဲ့ တခြားနိုင်ငံတကာအဖွဲ့အစည်းများနဲ့ ပြည်တွင်းလုပ်ဖော်ကိုင်ဖက်တွေနဲ့ ပူးပေါင်းပြီး ကျန်းမာရေးကဏ္ဍကလူတွေကို ကူညီပေးခဲ့ပါတယ်။

ဘီဘီစီ-ယူနော့စ်နဲ့ မိတ်ဖက်အဖွဲ့အစည်းတွေက မြန်မာ့ငလျင်ဘေး အရေးပေါ်တုံ့ပြန်ကူညီဖို့ အမေရိကန် ဒေါ်လာ ၁၇ သန်းကျော် ချမှတ်ခဲ့တယ်လို့ ထုတ်ပြန်ချက်ကို ကျွန်မ တွေ့ရပါတယ်။ အဲဒီထဲကနေ ငလျင်လှုပ်ပြီးပြီးချင်း အစပိုင်းသီတင်းပတ်တွေမှာ အရေးတကြီးလိုအပ်နေတဲ့ အသုံးအဆောင်ပစ္စည်းတွေနဲ့ ဘက်စုံသုံး ငွေကြေးတွေ စီစဥ်ပေးခဲ့တယ်လို့ နားလည်ထားပါတယ်။ ဒါပေမဲ့ ဒါက ငလျင်လှုပ်ပြီးပြီးချင်း အခြေအနေမှာပါ။ ခုတော့ ငလျင်ကြီးလည်း သုံးလရှိပါပြီ။ ဒီအချိန်မှာ အလိုအပ်ဆုံးက ဘာတွေဖြစ်မလဲ။ ဒါတွေကို ယူနော့စ်က ဘယ်လိုဆက်ပြီးထောက် ပံ့သွားမှာပါလဲ။

မစ္စတာဂျော့ဂျ်-ဒါက ကျွန်တော် ဘာကြောင့် ဒီကိုရောက်လာရသလဲဆိုတဲ့အဓိက အကြောင်းရင်းပါပဲ။ မြန်မာမှာ လူသားချင်းစာနာမှုလိုအပ်ချက်တွေအတွက်ရော ဖွံ့ဖြိုးရေးလိုအပ်ချက်တွေအတွက်ပါ ကျွန်တော်တို့တွေအနေနဲ့ အရင်းအမြစ်တွေ များများစီမံပေးဖို့ လိုအပ်နေပါတယ်။ ငလျင်ကနဦးကာလတွေမှာ ကျွန်တော်တို့ အလှူရှင်တွေနဲ့ မိတ်ဖက်အဖွဲ့အစည်းတွေကို မြန်မြန်ဆန်ဆန်ပဲ စည်းရုံးနိုင်ခဲ့ပါတယ်။ တချို့ အရင်းအမြစ်တွေက ယာယီအမိုးအကာတွေ၊ သောက်သုံးရေ၊ ဆေးဝါးနဲ့ မရှိမဖြစ် အသုံးအဆောင်ပစ္စည်းတွေအတွက်ဖြစ်ခဲ့ပါတယ်။ ပြီးတော့ ကျွန်တော်တို့မိတ်ဖက် ကျန်းမာရေးအဖွဲ့တွေနဲ့ ရွေ့လျား ဆေးခန်းတွေလည်း စုစည်းနိုင်ခဲ့ပါတယ်။ ဒါပေမဲ့ အခုဆို ဒီလုပ်ငန်းတွေအတွက်က ဘီလျံဒေါ်လာနဲ့ချီပြီးပေးနိုင်တဲ့ အကူအညီတွေ ဖြစ်သင့်ပါတယ်။ ဒေါ်လာသန်းဂဏန်းပမာဏလောက်ပဲ မဖြစ်သင့်ပါဘူး။ အဲဒီဒေါ်လာ သန်း ဂဏန်းပမာဏဟာ အရေးပေါ်ကူညီကယ်ဆယ်ရေးအတွက် ပထမနာရီပိုင်းအတွင်းမှာ အရေးကြီးပေမဲ့ ကျွန်တော်တို့မှာ ဒီထက်ပိုပြီးလိုအပ်နေတာပါ။ ကမ္ဘာ့ဘဏ်ကဆို ငလျင်ကြောင့် ပျက်စီးဆုံးရှုံးမှု ပမာဏဟာ အမေရိကန်ဒေါ်လာ ၁၂ ဘီလျံလောက်ရှိတယ်လို့ ခန့်မှန်းထားပါတယ်။ ပြန်လည်ထူထောင်တည်ဆောက်ရေးက ဒီထက် နှစ်ဆ ကနေ သုံးဆအထိ ကျသင့်မယ်လို့လည်း ပြောထားပါတယ်။ ဒါကြောင့် စုစုပေါင်းကုန်ကျစရိတ်ဆိုရင် အမေရိကန် ဒေါ်လာ ၂၂ ဘီလျံကနေ ၃၃ ဘီလျံကြား ရှိနိုင်တာပါ။ ဒါကြောင့် အိမ်ထောင်စုတွေအတွက် တည်ဆောက်ရေး လုပ်ငန်းအတွက်သာမက ဖွံ့ဖြိုးတိုးတက်မှုအတွက် အထောက်အပံ့ဖြစ်ဖို့ အခြေခံ အဆောက်အဦတွေနဲ့ ပြန်လည်ထူထောင်ရေးကို ဝိုင်းဝန်းကူညီကြဖို့ နိုင်ငံတကာ အသိုင်းအဝိုင်းကို ကျွန်တော်တို့ စည်းရုံးနိုင်ဖို့ လိုအပ်နေပါတယ်။

မြန်မာနိုင်ငံဟာ အကျပ်အတည်းကြုံနေရတဲ့ မေ့လျော့ခံနိုင်ငံဖြစ်လာနေတာက အမှန်တကယ်အရေးကြီးပါတယ်။ ဒါက မတရားဘူးလို့ ကျွန်တော်ထင်တယ်။ မြန်မာပြည်သူတွေဟာ ပဋိပက္ခတွေ အကြမ်းဖက်မှုတွေ စစ်ပွဲတွေ ရာသီဥတု ဖောက်ပြန်မှုတွေနဲ့ အခုငလျင်ကိုပါ ကြုံတွေခဲ့ရပြီးပါပြီ။ ဒီကိစ္စတွေကိုထိုက်သင့်သလောက် ဆွေးနွေးတာတွေလည်း မလုပ်ကြတော့ပါဘူး။ ဒါကြောင့် ကျွန်တော် ဒီကိုလာတဲ့ရည်ရွယ်ချက်ကိုက ဒီမှာ ဘာတွေဖြစ်နေလဲ ဆိုတာကို ကျွန်တော်မြင်တာ တွေ့တာ ကြုံခဲ့ရတာ ကျွန်တော်အဖွဲ့နဲ့ ပူးပေါင်းလုပ်ကိုင်ရတဲ့အခြေအနေတွေကို ကမ္ဘာကို ပြောပြပါမယ်။ မြန်မာပြည်သူတွေဟာ ဒီထက်ပိုတဲ့ ထောက်ပံ့ကူညီမှုတွေနဲ့ ပိုပြီးထိုက်တန်တဲ့အကြောင်းနဲ့ ကျွန်တော်တို့မိတ်ဖက်အဖွဲ့တွေကနေတစ်ဆင့် လူထုဆီ တိုက်ရိုက်အကူအညီတွေ ပေးနိုင်တာကြောင့် ဆိုပြီး ကျွန်တော်တို့ စည်းရုံးမှာပါ။

ဘီဘီစီ-မြန်မာမှာငလျင်အလွန်ပြန်လည်တည်ဆောက်ရေးမှာ စိန်ခေါ်မှုတွေ အများကြီး ရှိနေပါတယ်။ ဘိလပ်မြေလိုဆောက်လုပ်ရေးပစ္စည်းတွေ စျေးကြီးတာ၊ လိုသလောက် ဝယ်မရတာမျိုးတွေဖြစ်နေတာပါ။ ဒီ့အတွက် အကူအညီပေးနိုင်တဲ့ နည်းလမ်းတစ်ခုခုများ ရှိမလားရှင်။

မစ္စတာ ဂျော့ဂျ်-ကျွန်တော်တို့က သီးသန့်ဖြစ်နေတဲ့ အခက်အခဲလောက်ကို ပြောဆိုတာမျိုးမရှိပါဘူး။ ဘာလို့ဆို ကျွန်တော်တို့က ပဋိပက္ခထဲမှာ ရှိနေတာပါ။ ပြီးတော့ မြန်မာမှာ ငြိမ်းချမ်းရေးနဲ့ အမျိုးသားပြန်လည်သင့်မြတ်ရေးရရှိဖို့ ကျွန်တော်တို့အမှန်တကယ်မျှော်လင့်ပါတယ်။ ပြန်လည်ထူထောင်ရေးနဲ့ ပြန်လည်တည်ဆောက်ရေးအပါအဝင် ကျွန်တော်တို့ရဲ့ ဆောင်ရွက်ချက်တွေကနေ လူထုဆီ တိုက်ရိုက်အကူအညီတွေရောက်ဖို့ အဆင်သင့်ရှိတယ်ဆိုတာ ကျွန်တော်ပြောနိုင်ပါတယ်။ ဒါပေမဲ့ အရေးကြီးတာက နိုင်ငံတကာအသိုင်းအဝိုင်းကလည်း မြန်မာအတွက် ထပ်ဆောင်းကူညီမှုတွေကို စုစည်းကူညီပေးဖို့ကလည်းအရေးကြီးတာပေါ့။ ငလျင်က နှစ်လခွဲကျော်ကြာသွားပါပြီ။ နိုင်ငံတကာကဆို မေ့တောင်မေ့နေကြပြိ။ သုံးနှစ်လောက်ကြာပြီလာလို့တောင် ထင်နေကြပုံရပါတယ်။ ဒါပေမဲ့ ကျွန်တော် မြန်မာလူထုနဲ့ စကားပြောတဲ့အခါ သူတို့မှာ ဒီဒဏ်ကို ကုစားနေရတုန်း၊ အတိဒုက္ခကိုကျော်လွှားဖို့ ကြိုးစားနေရတုန်းပါ။ ငလျင်မှာ သူတို့ သားသမီးမြေးမြစ်တွေ နေအိမ်တွေ ရှိသမျှ အားလုံးဆုံးရှုံးသွားတဲ့ အကြောင်းတွေ ကျွန်တော့်ကိုပြောနေကြတုန်းပါ။ အကျပ်အတည်းပေါင်းစုံကြုံထားရပြီးသား လူထုမှာ စိတ်ပိုင်းဆိုင်ရာ ထိခိုက်မှု စိတ်ဒဏ်ရာတွေလည်း ရှိနေကြပါတယ်။ ကျွန်တော် နိုင်ငံတကာအသိုင်းအဝိုင်းကို ပြောချင်တာကမြန်မာလူထုကို ကူညီဖို့အချိန်ကျရောက်ပါပြီ။ ကျွန်တော်တို့ရဲ့ စုစည်းညီညွတ်မှုနဲ့ စာနမှုကို ပြဖို့ လိုအပ်နေပါတယ်။ အဲဒီအတွက် မြန်မာမှာ ငြိမ်းချမ်းရေးနဲ့ ပြန်လည်သင့်မြတ်ရေးလိုအပ်ပါတယ်။ အကြမ်းဖက်မှုတွေ သိသာစွာရပ်တန့်ဖို့ လိုအပ်ပါမယ်။ ကျွန်တော် စစ်ကိုင်းမှာတုန်းက နေရပ်စွန့်ခွာ သူတွေရှိတဲ့ စခန်းအနီးကို ရောက်ခဲ့တယ်။ အဲဒီမှာ ပဋိပက္ခတွေလည်း ရှိနေတယ်။ ဒါကြောင့် စိန်ခေါ်မှုတွေက တော်တော်ခက်ခဲပါတယ်။ လူတွေဟာ ပဋိပက္ခတွေနဲ့ အကြမ်းဖက်မှုတွေရှိနေတဲ့ ကြားက ငလျင်ကနေ ပြန်လည်ထူထောင်ဖို့ ကြိုးစားနေရဆဲပါ။ ဒါကြောင့် ကျွန်တော့်အနေနဲ့ မြန်မာပြည်သူတွေအတွက် လူသားချင်းစာနာမှုဖွံ့ဖြိုးရေးအကူအညီတွေ လိုအပ်နေတယ်ဆိုတဲ့အသံတွေတင်သာမက ဒီတိုင်းပြည်ငြိမ်းချမ်းရေးအတွက် အခြေအနေကောင်းတွေဖန်တီးပေးဖို့ဆိုတဲ့ သတင်းစကားတွေ ယူဆောင်သွားမှာပါ။

ဘီဘီစီ-SAC ထိန်းချုပ်ဧရိယာမဟုတ်တဲ့နေရာတွေမှာ ငလျင်ပြန်လည်ထူထောင်ရေးနဲ့ လူသားချင်းစာနာမှုအကူအညီလိုအပ်ချက်တွေနဲ့ပတ်သက်လို့ သိရှိထားတာရှိပါသလား။

မစ္စတာဂျော့ဂျ်- ဒါနဲ့ပတ်သက်လို့ ကျွန်တော် သတိပြုမိထားတာမရှိပါဘူး။ ကုလသမဂ္ဂ ဒုက္ခသည်များဆိုင်ရာမဟာမင်းကြီးရုံးက ကျွန်တော့်လုပ်ဖော်ကိုင်ဖက် တွမ်ဖလက်ချာလည်း မြန်မာကို မကြာသေးခင်က လာရောက်ထားပါတယ်။ သူပြောတောတော့ လူသားစာနာအကူအညီ ၈ ရာခိုင်နှုန်းလောက်ပဲ စီမံပေးထားနိုင်သေးတယ်လို့ ဆိုပါတယ်။ ဒါကြောင့် ကျွန်တော်တို့က နိုင်ငံတကာအသိုင်းအဝိုင်းကို မြန်မာကို ကူညီဖို့ ပြောတဲ့အခါ ၈ ရာခိုင်နှုန်းပဲထောက်ပံ့ပေးခဲ့ကြပါတယ်။ နောက် ငလျင်နဲ့ဆက်စပ်ပြီး ချက်ချင်းလိုအပ်မှုတွေ ရှိလာတဲ့အခါ ၂၂ ရာခိုင်နှုန်းလောက်ပဲ ထောက်ပံ့ခဲ့ကြပါတယ်။ ကျွန်တော်တို့အကဲဖြတ်ချက်ဟာကုလသမဂ္ဂက လုပ်ဆောင်တာသာမက ဘာတွေက လိုအပ်ပြီးဘာတွေကတော့ လုပ်ဆောင်ပေးထားပြီးပြီဆိုတဲ့ ကြားက ကွာဟချက်ကိုလည်း ထည့်သွင်းတွက်ချက်တာကြောင့်ပါ။ ဒီကိန်းဂဏန်းတွေက ကုလသမဂ္ဂနဲ့ ကမ္ဘာ့ဘဏ်က နံပါတ်တွေပါ။ တခြားဘယ်အဖွဲ့အစည်းနဲ့မှတော့မသက်ဆိုင်ပါဘူး။

ဘီဘီစီ-ငလျင်ကြီးကနေ ပြန်လည်ထူထောင်ဖို့ မြန်မာမှာ လိုအပ်နေတဲ့အချက်သုံးချက်ကို ပြောပါဆိုရင် ဘာဖြစ်မလဲ။

မစ္စတာဂျော့ဂျ်- လူတွေအတွက်အခြေခံလိုအပ်ချက်တွေကိုလက်လှမ်းမီမီရရှိနိုင်ဖို့နဲ့အတူ ကျန်းမာရေးနဲ့ဆက်နွှယ်တဲ့ လူသားစာနာမှုအထောက်အပံ့တွေ ရှင်းရှင်းလင်းလင်းလိုအပ်တယ်လို့ကျွန်တော်ထင်တယ်။ မြန်မာမှာ စစ်ဘေးကြောင့် အိုးအိမ်စွန့်ခွာထွက်ပြေးရသူက ၃ ဒသမ ၄ သန်းကျော်ရှိနေပြီးပါပြီ။ အခု ငလျင်ကြောင့်အိုးအိမ်စွန့်ခွာရသူက လေးသိန်းထပ်တိုးလာပါတယ်။ ဒီနိုင်ငံသားတွေမှာ အခြေခံလူ့လိုအပ်ချက်တွေ ထောက်ပံ့ပေးဖို့လိုနေပါတယ်။ ဒါပေမဲ့ ချက်ချင်းတုံ့ပြန်ဆောင််ရွက်တာထက် ပြန်လည်ထူထောင်ရေးနဲ့ တည်ဆောက်ရေးအတွက် ကျွန်တော်တို့ ပြင်ဆင်ထားပေးဖို့ လိုပါတယ်။ အိမ်အဟောင်းတွေကို ပြန်ဆောက်ဖို့ အရေးကြီးပါတယ်။ နေအိမ်မရှိတော့တဲ့ မိသားစုတွေအတွက်နေစရာရှိဖို့က အရမ်းအရေးကြီးပါတယ်။ ဒါကြောင့် ဒါဟာ ဖြည့်ဆည်းပေးဖို့လိုအပ်နေတဲ့ အခြေခံအားထုတ်မှုတစ်ခုဖြစ်ပါတယ်။ ဒါ့အပြင် လမ်းတွေတံတားတွေအခြေခံအဆောက်အဦတွေဟာ ဆိုးဆိုးရွားရွား ထိခိုက်ပျက်စီးထားပါတယ်။ အိမ်ထောင်စုတွေအတွက်သာမက ဒီလို အခြေခံအဆောက်အဦတွေရော ငလျင်မလှုပ်ခင်တည်းက မြန်မာမှာရှိနေတဲ့တခြားလိုအပ်ချက်တွေကိုပါ ဖြေရှင်းပေးဖို့ အရေးကြီးပါတယ်။ ဘာကြောင့်လဲဆိုတော့ မြန်မာဟာ ရာသီဥတု ပြောင်းလဲဖောက်ပြန်မှုတွေ ရော တခြားစိန်ခေါ်မှုတွေအများကြီး ကြုံနေရတာမို့ ပြောင်းလဲလာတဲ့ ရာသီဥတုနဲ့လိုက်လျောညီထွေ တုံ့ပြန်ဆောင်ရွက်ဖို့ကလည်း ထိပ်တန်းဦးစားပေးကိစ္စ ဖြစ်တယ်လို့ မြင်ပါတယ်။

ဘီဘီစီ-မစ္စတာဂျော့တို့ ယူနော့စ်အဖွဲ့အစည်းရဲ့ဆောင်ရွက်ချက်တွေကို ပြည်တွင်းမှာ လွတ်လွတ်လပ်လပ်ပဲလုပ်ကိုင်ခွင့်ရပါသလား။ ပြီးတော့ ရန်ပုံငွေတွေကိုဘယ်လိုစီမံခန့်ခွဲပါသလဲ။ တချို့ အလှုရှင်တွေက သူတို့လှူလိုက်တဲ့ရန်ပုံငွေတွေကို အာဏာပိုင်တွေဆီ မရောက်စေချင်ကြဘူးလေ။ ဒီလိုအခြေအနေမျိုးမှာ ဘယ်လိုကိုင်တွယ်ဆောင်ရွက်ပါသလဲ။

မစ္စတာ ဂျော့ဂျ်-ဒီမေးခွန်းဟာ အလွန်အရေးကြီးပါတယ်။ ကျွန်တော်တို့ကို ကမ္ဘာလုံး ဆိုင်ရာရန်ပုံငွေအဖွဲ့ကနေ ပေးအပ်လာတဲ့ ရန်ပုံငွေတွေနဲ့ ကျန်းမာရေးဆိုင်ရာ ကဏ္ဍ ရန်ပုံငွေတွေ ကို သုံးစွဲရပါတယ်။ ဒီပိုက်ဆံတွေကို ကျွန်တော်တို့က စီမံတဲ့အခါမှာ ပြည်တွင်းက အရပ်ဖက်အဖွဲ့အစည်းတွေကို စီမံကိန်းတွေအလိုက် တာဝန်ပေးအပ်ပြီး သုံးစွဲစေတာဖြစ်ပါတယ်။ ဒါက ပြည်သူတွေကို တိုက်ရိုက်ပံ့ပိုးပေးတဲ့အရေးကြီးတဲ့အချက်ပါ။ ကျွန်တော်တို့က လူထုကို ထောက်ပံ့ကူညီမှုသက်သက်ဖြစ်ပါတယ်။ ဒါကြောင့် ဒီအကူအညီတွေ လူထု လက်လှမ်းမီမီရရှိဖို့ ဒေသဆိုင်ရာအဖွဲ့အစည်းကွန်ရက်တစ်ခုရှိဖို့က အရေးကြီးပါတယ်။ သူတို့ဟာလည်း အတော်လေးခိုင်မာတဲ့ အနေအထားမှာရှိပါတယ်။ ကျွန်တော်မြန်မာကို အကြိမ်ပေါင်းများစွာ ရောက်ရှိတဲ့ခရီးစဥ်တော်တော်များများမှာ ဒါကို ကျွန်တော်ကိုယ်တိုင် မျက်မြင်ကိုယ်တွေ့ ကြုံရပြီးဖြစ်ပါတယ်။