ပြိုင်ဆိုင်မှုပြင်းထန်တဲ့ ကေပေါ့လောကထဲက မြန်မာအိုင်ဒေါ Di Di

မြန်မာမှာ ဒီမိုကရေစီအားကောင်းခဲ့တဲ့ ၂၀၁၄ - ၁၅ ခုနှစ်တွေတုန်းက “K Pop Cover Dance” လို့ ခေါ်တဲ့ တောင်ကိုရီးယားနိုင်ငံရဲ့ နာမည်ကျော် ကေပေါ့ သီချင်းကကွက်တွေကို ပြန်လည်ကပြတင်ဆက်ကြတဲ့ လှုပ်ရှားမှုတခုဟာ မြန်မာလူငယ်တွေကြား ပြောစမှတ်ရှိခဲ့ကြပါတယ်။

အဲဒီကာလတွေက လူတန်းစားအလွှာစုံ၊ ယဉ်ကျေးမှုအစုံနဲ့ ရစ်သိုင်းထားတဲ့ ရန်ကုန်နဲ့ မန္တလေးလို မြို့ကြီးတွေရဲ့ ထင်ရှားတဲ့ နေရာတွေမှာ ကေပေါ့ သီချင်းတွေနဲ့ ကခုန်နေတဲ့ လူငယ်တွေကို အမြဲတစေတွေ့မြင်ခဲ့ရတာကြောင့်ပါ။

လွန်ခဲ့တဲ့ ကိုးနှစ်က ရန်ကုန်မြို့ Junction ဇဝန အနီး music zone မှာပြုလုပ်ခဲ့တဲ့ K Pop Cover Dance ဖျော်ဖြေပွဲမှာ အနီရဲရဲ ဆင်တူအင်္ကျီတွေနဲ့ ကပြခဲ့တဲ့ မိန်းကလေးငယ်လေးဦးရဲ့ ကဟန်တွေဟာ အဲဒီခေတ်ကာလ ကေပေါ့ကြိုက်တဲ့ မြန်မာလူငယ်တွေကြား ရေပန်းစားလူသိများခဲ့ပါတယ်။

အခုတော့ အဲဒီ မိန်းကလေးငယ်လေးဦးထဲက တဦးဟာ တောင်ကိုရီးယားနိုင်ငံကို ရောက်ရှိနေပြီး ကေပေါ့အိုင်ဒေါတယောက်အဖြစ် ကိုယ်ပိုင်သီချင်းတွေနဲ့ သီဆိုကခုန်နေပါပြီ။

သူကတော့ အသက် (၂၇) နှစ်အရွယ် မဆုနဒီစိုး ပါ။ ကေပေါ့အိုင်ဒေါလောကမှာတော့ အနုပညာနာမည် “Di Di” လို့ သိကြပါတယ်။

အပျော်တမ်းကေပေါ့ အက ကသူကနေ အိုင်ဒေါဖြစ်လာသူ

မြန်မာနိုင်ငံရဲ့ ပထမဆုံး ကေပေါ့အိုင်ဒေါတယောက်ဖြစ်လာတဲ့ Di Di ဖြတ်သန်းခဲ့ရတာတွေက စိန်ခေါ်မှု အပြည့်နဲ့ပါ။

“အနောက်ပိုင်းနည်းပညာတက္ကသိုလ်မှာ ဗိသုကာမေဂျာကိုတက်ပေမဲ့ စိတ်မဝင်စားဘူးဆိုတာသိလိုက်ရ တယ်” လို့ တောင်ကိုရီးယားမှာ တက္ကသိုလ်တက်ဖို့ ဆုံးဖြတ်ခဲ့တဲ့အကြောင်း Di Di တစ်ဖြစ်လဲမဆုနဒီစိုး က ပြောပါတယ်။

မြန်မာမှာ တက္ကသိုလ်ပထမနှစ်(ပထမပညာသင်ကာလ) အပြီး ၂၀၁၆ ခုနှစ်ကစလို့ တောင်ကိုရီးယားမှာ မီဒီယာပိုင်းဘာသာရပ် (Korea Media Art) ကို တက်ရောက်နိုင်ဖို့အတွက် ဘာသာစကားသင်တန်းကအစအဆင့်ဆင့် သူ ကြိုးစားခဲ့ရတာပါ။

တောင်ကိုရီးယားရဲ့ နယ်မြို့လေးဖြစ်တဲ့ ဂုံးဂျူမြို့က တက္ကသိုလ်မှာတက်ရောက်ခဲ့ရတာဖြစ်လို့ ကေပေါ့အိုင်ဒေါဖြစ်လိုသူတွေ စုဝေးရာ မြို့တော် ဆိုးလ် ကို သွားဖို့ရာအလှမ်းဝေးခဲ့ပါတယ်။

“မေဂျာမှာလည်း သူတို့ပေးတဲ့ပညာသင်စရိတ် (၄၀) ရာခိုင်နှုန်းလောက်အထိရအောင် ကြိုးစားခဲ့တယ်။ ဝါသနာပါတာအတွက် Choreography (ကကွက်) တွေကို လိုင်းပေါ်ကကြည့်ပြီးပဲ လိုက်ကျင့်ဖြစ် တယ်” လို့ တောင်ကိုရီးယားမှာ တက္ကသိုလ်ကျောင်းသူဘဝဖြတ်သန်းရပုံကို သူက ပြန်ပြောပြပါတယ်။

တက္ကသိုလ်ပညာရေး၊ အချိန်ပိုင်းအလုပ်တွေကြား လုံးချာလည်နေတာကြောင့် တောင်ကိုရီးယားမှာနေထိုင်တဲ့ အစောပိုင်းကာလတွေဟာ သူ့အတွက် ကေပေါ့အိုင်ဒေါတယောက် ဖြစ်လာဖို့ အခွင့်အလမ်းမရှိသလောက်ပါပဲ။

ဒါပေမဲ့ တက္ကသိုလ်ဘွဲ့ရအပြီး ၂၀၂၀ ပြည့်နှစ် ဆိုးလ်မြို့မှာ အလုပ်သစ်ရပြီး ပြောင်းရွှေ့ရချိန်မှာတော့ မဆုနဒီစိုး အတွက် ကေပေါ့အိုင်ဒေါဖြစ်လာဖို့ လမ်းစဖြစ်လာခဲ့ပါတယ်။

လေ့ကျင့်ရေးတွေက ငရဲလိုပါပဲ - Di Di

“Audition (လူတွေ့စစ်ဆေးခန်း) တခုဝင်ပြီးတော့ Training (လေ့ကျင့်ရေး) ဆင်းမလားလို့ ကမ်းလှမ်းချိန်က ရွေးချယ်ဖို့အခက်အခဲဆုံးပဲ”

ဆိုးလ်မြို့အခြေစိုက် နိုင်ငံတကာကုန်သွယ်ရေးစင်တာမှာ မြန်မာတာဝန်ခံအဖြစ် အလုပ်လုပ်ကိုင်မလား၊ ကေပေါ့အိုင်ဒေါအဖြစ် လေ့ကျင့်ရေးဆင်းမလားဆိုတဲ့ ရွေးချယ်မှုနှစ်ခုကြား ဗျာများခဲ့ရတဲ့အကြောင်း Di Di က ပြောပြပါတယ်။

“ကေပေါ့ကိုအရမ်းလုပ်ကြည့်ချင်နေတာဆိုပေမဲ့ Reality (လက်တွေ့) ကိုပြန်ကြည့်ရတယ်။ အဲဒီအချိန် အသက် (၂၃) နှစ်ဆိုတော့ ဖြစ်နိုင်ပါ့မလားဆိုတာစဉ်းစားခဲ့ရတယ်” လို့ သူက ဆက်ပြောပါတယ်။

ကမ္ဘာတလွှားနာမည်ကျော်လာတဲ့ ကေပေါ့လောကမှာ အိုင်ဒေါလို့ခေါ်တဲ့ အနုပညာရှင်တယောက်ဖြစ်လာဖို့ အသက် (၁၀) နှစ်မပြည့်ခင်ကတည်းက လေ့ကျင့်ရေးဝင်နေကြသူတွေ မြောက်အမြားရှိတာကို အနုပညာ အေဂျင်စီတွေရဲ့ ထုတ်ပြန်ချက်တွေ၊ ရုပ်သံတွေကတဆင့် ထင်သာမြင်သာတွေ့နိုင်ပါတယ်။

ဖျော်ဖြေ‌ရေးကုမ္ပဏီနဲ့ လေ့ကျင့်ရေးဆင်းပြီဆိုရင် ကုမ္ပဏီစည်းမျဉ်းစည်းကမ်းအတိုင်းနေထိုင်ရတာဖြစ်ပြီး ကိုယ်အလေးချိန်ကအစ ဆိုရှယ်မီဒီယာအသုံးပြုတာအဆုံး ကိုယ်ပိုင်လွတ်လွတ်လပ်လပ်ဆုံးဖြတ်လုပ်ကိုင်ခွင့်မရှိတော့တာက ကေပေါ့လောကရဲ့ အစိတ်အပိုင်းတခုလို့ Di Di က ထောက်ပြပါတယ်။

မြန်မာနိုင်ငံသားတယောက်အနေနဲ့ တောင်ကိုရီးယားဖျော်ဖြေရေးကုမ္ပဏီမှာ လက်တွေ့ လေ့ကျင့်ရေးဆင်းတဲ့ အခါမှာတော့ သူမျှော်မှန်းထားသလိုပဲ အသက် ၂၃ နှစ်အရွယ်ဟာ အသက်အကြီးဆုံးဖြစ်နေခဲ့ပါတယ်။

အိုင်ဒေါအနုပညာရှင်ဖြစ်လာဖို့ လေ့ကျင့်ရေးဆင်းသူတွေ ကြုံတွေ့ရတဲ့စိန်ခေါ်ချက်တွေကိုလည်း အများနည်းတူရင်ဆိုင်ခဲ့ရပါတယ်။

Di Di အတွက် အကြီးမားဆုံးစိန်ခေါ်ချက်ဖြစ်ခဲ့တာက စနစ်တကျ အဆိုအက မသင်ကြားဖူးသူဖြစ်တာ ‌‌ကြောင့် တစ်ဦးတည်း ကကွက်ကို ချက်ချင်းလိုက်မလုပ်နိုင်တဲ့အချိန်၊ အသံအဆင်မပြေတဲ့အချိန်တွေဆိုရင် စိတ်ဓာတ်ကျဆင်းတဲ့အထိ ခက်ခဲခဲ့ပါတယ်။

“သူတို့ရှေ့မှာက No ဆိုတဲ့စကားမရှိရဘူး၊နောက်တခါအဆင်ပြေအောင်ကြိုးစားပါ့မယ် ဆိုပြီးပဲ positive (အပြုသဘော) ပုံစံနေရတာတွေရှိတယ်”

“အကသင်ချိန်တိုင်းက ငရဲလိုပါပဲ” လို့ စိတ်ပိုင်းဆိုင်ရာ ထိခိုက်ပင်ပန်းခဲ့ရတဲ့အခြေအနေတွေအကြောင်း သူက ဘီဘီစီကို ပွင့်ပွင့်လင်းလင်း ပြောပြပါတယ်။

ဒါအပြင် ကေပေါ့လောက က သတ်မှတ်ထားတဲ့ ခန္ဓာကိုယ်အချိုးအဆရဖို့ကလည်း စိန်ခေါ်ချက်တွေထဲက တခုဖြစ်ပြီး ကာလရှည်အလေးချိန်လျှော့ချရတာ၊ လေ့ကျင့်ရတာတွေဟာ Di Di အတွက် ခက်ခဲခဲ့တာပါ။

“Diet ဆိုလည်း သူတို့ကပိန်တဲ့ပုံစံလိုချင်တယ်။ သူတို့လိုချင်တဲ့ အရိုးပေါ်ကို အရေလေးနည်းနည်းတင်ရုံ ပိန်တာမျိုးညီမမှာမရှိဘူး”

သင်တန်းအတွက် မနက်ပိုင်းကုမ္ပဏီကို ရောက်ပြီဆိုရင် ကိုယ်အလေးချိန်အရင်ဆုံးတိုင်းတာရပါတယ်။ သင်တန်းသားတွေရဲ့ တနေ့တာကိုယ်အလေးချိန်ကို အများမြင်သာအောင် နံရံပေါ်မှာကပ်ထားသလို သင်တန်းသား တစ်ယောက်ချင်းစီအလိုက် အလေးချိန်သတ်မှတ်ပေးထားပါသေးတယ်။

တပတ်တာအတွင်း သတ်မှတ်အလေးချိန်မရှိနေသူဟာ အများအရှေ့မှာပဲ ပုံမှန်လေ့ကျင့်ခန်းတွေထက် နှစ်ဆ၊ သုံးဆ ပိုကြာအောင် လုပ်ရလေ့ရှိပါတယ်။

“Jumping Jacks (ခြေကားလက်မြှောက်) လေ့ကျင့်ခန်းဆိုရင် အကုန်လုံးက အခေါက် (၅၀) လုပ်ပြီးလို့ ရပ်နေချိန်မှာ ကိုယ်တယောက်တည်း အခေါက် ၁၅၀ ပြည့်အောင်လုပ်ရတာမျိုးပေါ့” Di Di က သူ့အတွေ့အကြုံကို ဝေမျှပါတယ်။

ကုမ္ပဏီစည်းမျဉ်းအရ သင်တန်းကာလ အချိန်ပိုင်းအလုပ်လည်းလုပ်ခွင့်မရှိတာကြောင့် ကျောင်းတက်ရင်း ရှာဖွေ စုဆောင်းထားတဲ့ ငွေကြေးနဲ့သာ ချွေချွေတာတာဖြတ်သန်းခဲ့ရပါတယ်။

ဒီလို ရုပ်ပိုင်း၊ စိတ်ပိုင်းသာမက ငွေကြေးပိုင်းမှာပါ ခက်ခက်ခဲခဲနဲ့ လေ့ကျင့်နေကြပေမဲ့ သင်တန်းသားတိုင်း ကေပေါ့အိုင်ဒေါဖြစ်လာတာမျိုးလည်းမဟုတ်ပြန်ပါဘူး။

ဒါပေမဲ့ ကိုရီးယားဘာသာစကားရော အင်္ဂလိပ်စကားရောကျွမ်းကျင်တဲ့ Di Di အတွက်တော့ ၂၀၂၁ ခုနှစ်‌ ၊ ဖေဖော်ဝါရီလမှာ သတင်းကောင်းတခုရောက်ရှိလာခဲ့ပါတယ်။

“ဒရမ်မာထုတ်တဲ့ကုမ္ပဏီဆိုပေမဲ့ ကေပေါ့အဖွဲ့ပထမဆုံးသီချင်းထုတ်ပေးမယ်ဆိုတဲ့အချိန်မှာ ညီမတို့ ရွေးချယ်ခံရတာပါ” လို့ သင်တန်းကာလ တစ်နှစ် မပြည့်ခင်မှာပဲ ပွဲဦးထွက်ခွင့်ရရှိခဲ့တဲ့အကြောင်း Di Di က ပြန်ပြောပြပါတယ်။

မြန်မာနိုင်ငံသား Di Di အပါအဝင် ကိုရီးယားနိုင်ငံသား သုံးဦးနဲ့အတူ အဖွဲ့ဝင်‌လေးဦးပါတဲ့ “Rumble – G” ဆိုတဲ့ ကေပေါ့အဖွဲ့အဖြစ် ၂၀၂၁ ခုနှစ် ဇူလိုင်လမှာ ပွဲဦးထွက်သီချင်းထွက်ရှိလာခဲ့ပါတယ်။

ဒါပေမဲ့ အဲဒါကလည်း နှစ်နှစ်အတွင်းမှာပဲ အပြောင်းအလဲတွေကြုံရပြန်ပါတယ်။

တောင်ကိုရီးယားရဲ့ ကေပေါ့အိုင်ဒေါလောကကို ကြည့်မယ်ဆိုရင် ဖျော်ဖြေရေးနာမည်ကြီး ကုမ္ပဏီတွေရှိသလို ငွေကြေးအင်အားမတောင့်တင်းတဲ့ ကုမ္ပဏီငယ်တွေလည်းရှိနေပါတယ်။

ဒီအပေါ်မူတည်ပြီး ကေပေါ့အဖွဲ့တွေရဲ့ သီချင်းဗီဒီယိုအရည်အသွေး၊ ဂီတဖျော်ဖြေပွဲတွေမှာပါဝင်မှုတွေ ကွာခြားသွားလေ့ရှိတဲ့အကြောင်း တောင်ကိုရီးယားကနေလာတဲ့ အနုပညာသတင်းတွေအရသိနိုင်ပါတယ်။

“Music show (ဂီတဖျော်ဖြေပွဲ) တွေကိုသွားရင် သူတို့ပေးတဲ့ပိုက်ဆံက ဖျော်ဖြေဖို့ပြင်ဆင်ရတဲ့ မိတ်ကပ်၊ အဝတ်အစား၊ ဝန်ထမ်းစရိတ်တွေအတွက် ၀.၁ ပုံ(၁ ပုံတောင်အပြည့်မရ)လောက်ပဲရတယ်” လို့ Di Diက ရှင်းပြပါတယ်။

ကေပေါ့အိုင်ဒေါအဖြစ် တောင်ကိုရီးယားမှာအနုပညာလှုပ်ရှားချိန်မှာတော့ နိုင်ငံခြားသားဖြစ်တာကြောင့် ခွဲခြားဆက်ဆံခံရတာမျိုးမရှိပေမဲ့ ကုမ္ပဏီငယ်လက်အောက်က အနုပညာရှင်တွေအတွက်တော့ ကုန်ကျစရိတ်၊ ငွေကြေးပိုင်းဆိုင်ရာတွေက ဖိအားဖြစ်လာပါတယ်။

ဒီလိုစိန်ခေါ်ချက်တွေကြား Rumble – G အဖွဲ့ဝင်တွေ အသီးသီးနုတ်ထွက်ကာ ကုမ္ပဏီမှာ တစ်ဦးတည်းကျန်ရှိတဲ့ အနေအထားနဲ့ပါ ကြုံခဲ့ရပါတယ်။

“ငါးနှစ်စာချုပ်ချုပ်တယ်ဆိုပေမဲ့ ညီမပဲကျန်ခဲ့တာဖြစ်လို့ အခြားငွေကြေး အရှုပ်အထွေးမရှိဘဲ ထွက်ခွင့်ရခဲ့ပါတယ်” လို့ Di Di က ပြောပါတယ်။

ဒါဟာ ပွဲဦးထွက်စအချိန်မှာ အောင်မြင်မှုမရရှိတဲ့ ကေပေါ့အိုင်ဒေါအဖွဲ့တွေကြုံရလေ့ရှိတဲ့အခြေအနေ တခုဖြစ်ပြီး နောက်ထပ်ကုမ္ပဏီ တခုကိုပြောင်းရွှေ့ခဲ့ပါတယ်။

“ကိုရီးယားနှစ်ယောက်နဲ့အတူ သုံးယောက်အဖွဲ့မှာ leader (ခေါင်းဆောင်) အနေနဲ့ လုပ်နေပါတယ်”

ကုမ္ပဏီအသစ်ဆီပြောင်းပြီး ၁ နှစ်မပြည့်ခင် ၂၀၂၄ စက်တင်ဘာလမှာပဲ “New-L” ဆိုတဲ့ နာမည်နဲ့ ထပ်မံ ပွဲထွက်လာခဲ့ပါတယ်။

ပွင့်လင်းလာတဲ့ ကေပေါ့ နဲ့ စာချုပ်ပြဿနာ

အိုင်ဒေါတယောက်ဖြစ်လာတဲ့ Di Di အပြင် ကေပေါ့အိုင်ဒေါဖြစ်ဖို့ ကြိုးစားနေတဲ့ မြန်မာလူငယ်တွေ ကိုလည်း အခုနှစ်တွေထဲ သိသိသာသာတွေ့လာရပါတယ်။

မနှစ်တုန်းကဆိုရင် တောင်ကိုရီးယားကေပေါ့အိုင်ဒေါရွေးချယ်ပွဲအစီအစဉ်ဖြစ်တဲ့ “Universe Ticket” မှာ မနန်းဧကရီရွှေ က “Riel” ဆိုတဲ့နာမည်နဲ့ပါဝင်ယှဉ်ပြိုင်ခဲ့ပြီး အခြားကေပေါ့အဖွဲ့တွေရဲ့ သီချင်းဗီဒီယိုတချို့ မှာလည်း ဝင်ရောက်သရုပ်ဆောင်ခွင့်ရလာပါတယ်။

ဒီတော့ ကေပေါ့လောကမှာ မြန်မာနိုင်ငံသားတွေကို လက်ခံမှုအခြေအနေကိုဘယ်လိုရှိလာသလဲလို့ Di Di ကို ဘီဘီစီက မေးခွန်းထုတ်ခဲ့ပါတယ်။

“အရင်က တရုတ်၊ ဂျပန်တို့ပဲ နိုင်ငံခြားသားအဖြစ်လက်ခံပေမဲ့ အခုတော့ အနောက်နိုင်ငံသားတွေရော အရှေ့တိုင်းသားတွေပါ အစုံသူတို့လက်ခံလာပြီ” လို့ ပွင့်လင်းလာတဲ့ ကေပေါ့လောကအကြောင်း Di Diက ‌ထောက်ပြပါတယ်။

ကေပေါ့အိုင်ဒေါဖြစ်လာနိုင်ခြေရှိလားဆိုတဲ့ အရည်အသွေးတွေကိုသာ ကုမ္ပဏီတွေကအဓိကလေ့လာ စောင့် ကြည့်လာတယ်လို့ ဆိုပါတယ်။

အခုနှစ်တွေထဲ တောင်ကိုရီးယားနိုင်ငံသားမပါဝင်တဲ့ Blackswan ကေပေါ့အဖွဲ့၊ အကြားအာရုံချို့တဲ့ ကေပေါ့အဖွဲ့အပြင် AI နဲ့ဖန်တီးထားတဲ့ ကေပေါ့အဖွဲ့တွေပါ ထွက်ပေါ်လာပါပြီ။

ဒီလိုပွင့်လင်းလာပေမဲ့ ကေပေါ့လောကရဲ့ အနှောင်အဖွဲ့လို့လူသိများတဲ့ ကုမ္ပဏီတွေနဲ့ စာချုပ်ချုပ်ဆိုတာကို တော့ သတိထားဖို့လိုအပ်တဲ့အကြောင်း Di Di က သတိပေးပါတယ်။

“လုပ်ခလစာကိစ္စတွေနဲ့ ပတ်သက်ပြီး အနစ်နာခံရတာမျိုး၊ အကြွေးပုံစံမျိုးမရှိတဲ့ စာချုပ်ပုံစံညှိသင့်တယ်”

စာချုပ်တကြောင်းစီရဲ့ ဆိုလိုရင်းကို ရှေ့နေတွေနဲ့ သေချာတိုင်ပင်‌ပြောဖို့လိုသလို နားလည်သူတွေနဲ့ ဆွေးနွေးပြီးမှ ချုပ်ဆိုသင့်တယ်လို့ ပြောလာတာပါ။

တောင်ကိုရီးယားရဲ့ ဗီဇာအမျိုးအစားအရလည်း အနုပညာလုပ်ကိုင်မယ့် နိုင်ငံခြားသားတွေကို E-6-1 ဗီဇာ(အနုပညာလုပ်ကိုင်ခွင့်ဗီဇာ) ထုတ်ပေးထားပြီး ဒီလုပ်ငန်းတခုတည်းမှာသာ အလုပ်လုပ်ကိုင်ခွင့်ပြုထားပါတယ်။

ဒီဗီဇာအရ အခြားအချိန်ပိုင်းအလုပ်တွေကို လုပ်ကိုင်ခွင့်မရှိပဲ အနုပညာအလုပ်ကိုသာလုပ်ကိုင်ခွင့်ရပြီး ဝင်ငွေရရှိဖို့အတွက်လည်း ကုမ္ပဏီကစီစဉ်တဲ့ ဖျော်ဖြေရေးတွေမှာသာပါဝင်ဖျော်ဖြေပေးရပါတယ်။

“မအောင်မြင်သေးတဲ့အတွက်ဝင်ငွေနဲ့လောက်အောင်နေရတာမျိုးတော့ရှိတယ်။ Training (လေ့ကျင့်ရေး) တုန်းကလောက်တော့ မချွေတာရတော့ဘူး” လို့ Di Di က နှိုင်းယှဉ်ရှင်းပြပါတယ်။

ကေပေါ့အိုင်ဒေါဖြစ်လာတဲ့အခါ အနုပညာလှုပ်ရှားမှုတွေသာမက နေထိုင်စားသောက်ရေးအတွက်ပါ ကုမ္ပဏီတွေက အလုံးစုံစီမံဆောင်ရွက်ပေးကြတာကြောင့်ပါ။

ဒါကြောင့် “အရေးကြီးဆုံးက ကုမ္ပဏီနဲ့ စာချုပ်ပဲ” လို့ Di Di က အိုင်ဒေါဖြစ်ချင်တဲ့ မြန်မာနိုင်ငံသားတွေ အတွက် အကြံပြုချက်ပေးပါတယ်။

ပြိုင်ဆိုင်မှုပြင်းထန်တဲ့ ကေပေါ့လောက မှာ မြန်မာ့ပထမဆုံးအိုင်ဒေါ Di Di ကတော့ အောင်မြင်မှုရလာဖို့ အတွက် အားသွန်ခွန်စိုက်ဆက်ကြိုးစားနေရဆဲပါ။