Archifau Tachwedd 2010

Mae cryn sylw wedi cael ei roi yn ddiweddar i weithgareddau clybiau a chefnogwyr pêl-droed i godi arian neu i wella cyfleusterau yn eu cymunedau.

Aeth clwb pêl-droed Blackpool ati i ymateb i gais gan ddisgybl ysgol gynradd leol a oedd yn awyddus i helpu rheolwr tîm ieuenctid y clwb, Gary Parkinson, sydd yn wael yn yr ysbyty.

Derbyniwyd cefnogaeth fawr gan y rheolwr Ian Holloway ac aelodau o'r tîm wrth iddynt ymweld â'r ysgol i helpu yn yr achos yma.

Mae gwaith Craig Bellamy, wrth sefydlu mudiad y 'Craig Bellamy Foundation', ynghyd â mudiad 'Right to Dream' i helpu a gwella cyfleusterau ar gyfer yr ifanc yn Sierra Leone hefyd yn enghraifft o'r hyn mae sêr y gêm yn ei wneud dramor.

Ond nid clybiau a chwaraewyr ydi'r unig rai i fynd ati i helpu eraill.

Cafodd mudiad Gôl ei sefydlu gan grŵp o gefnogwyr pêl-droed Cymru a oedd yn awyddus i wneud gwahaniaeth i'r gymuned leol yn Baku, Azerbaijan wrth iddynt ddilyn y tîm cenedlaethol yno beth amser yn ôl.

Ymwelwyd â nifer o gartrefi plant yn Baku gan roi anrhegion, yn ogystal â rhoddion ariannol iddynt a gafodd eu casglu gan gefnogwyr Cymru.

Mae Gôl wedi ehangu o'r cychwyn yn Azerbaijan gan geisio cynorthwyo pobl ifanc - o wahanol gefndiroedd a sefyllfa gymdeithasol a meddygol -mewn gwledydd eraill sydd â chysylltiad â phêl-droed Cymru.

Maent yn cynnig cymorth ariannol a threfnu gweithgareddau fydd yn eu helpu i ddatblygu eu sgiliau ac yn eu galluogi i gymryd rhan mewn cymdeithas fel unigolion annibynnol, aeddfed a chyfrifol.

Mae Cwpan y Byd wedi ei drefnu gan fudiad y digartref er mwyn cyfleodd i'r rhai sydd heb gartref ar draws y byd.

Sefydlwyd elusen gan Tottenham Hotspur i wella ansawdd bywyd yr ardal leol yn Haringey yn Llundain yn ogystal â chyllido cartref i blant amddifad ym mhentref Rustenberg yn Ne Affrica, gyda'r chwaraewyr yn cyfrannu yn uniongyrchol wrth dalu dirwyon pêl-droed yn syth i gronfa'r elusen yma.

Yma yng Nghymru fe aeth tîm pêl-droed Y Seintiau Newydd i agor canolfan chwaraeon newydd yn ysgol uwchradd Llanfyllin yn ddiweddar tra mae clybiau Dinas Caerdydd a Bae Colwyn hefyd yn amlwg o fewn eu cymuned yn trefnu gweithgareddau ar gyfer y gwahanol grwpiau o bobl ifanc yr ardal.

Mae cefnogwyr tîm cenedlaethol Cymru, yn eu teithiau ar hyd a lled Ewrop a chlybiau megis Dinas Caerdydd, Y Seintiau Newydd a Bae Colwyn, yn lleol, eisoes wedi gosod marc safon a dangos beth sydd yn bosibl.

Os oes yna weithgareddau sydd yn gwella ansawdd eich cymuned yn digwydd yn eich ardal chi, yna cysylltwch, a gadewch inni wybod amdanynt.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Gêm fawr y penwythnos yn y Bencampwriaeth yw honno yn Loftus Road rhwng y ddau dîm ar y brig - Queens Park Rangers a Chaerdydd.

Fe fydd dau frawd, un yn cefnogi Rangers a'r llall yn cefnogi'r Adar Gleision, yn ymuno gyda ni i edrych ymlaen at y gêm.

Hefyd ar y rhaglen fe fyddwn yn trafod streic y dyfarnwyr yn yr Alban ac yn edrych ar yr offer diweddaraf y mae pêl droedwyr yn eu defnyddio.

Osian Roberts a Glyn Griffiths fydd y gwesteion.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Does dim terfyn ar bynciau trafod yn ymwneud â Chymru'r dyddiau yma.

Ar ôl y stŵr o drafod ble i chwarae'r gêm yn erbyn Lloegr, bydd penodiad rheolwr newydd ar ein tîm cenedlaethol hefyd yn sicr o fod yn bwnc llosg.

Y diweddaraf i gael ei gysylltu gyda'r swydd ydi Lars Lagerback, cyn rheolwr Sweden a Nigeria.

Mae ganddo brofiad o arwain Sweden i rowndiau terfynol Ewro 2000, 2004 a 2008, yn ogystal â mynd â nhw i rowndiau terfynol Cwpan y Byd yn 2002 a 2006.

Fe hefyd oedd rheolwr Nigeria yng Nghwpan y Byd a gafwyd eu cynnal yn Ne Affrica'r Haf diwethaf.

Mae yna farn y dylid penodi rhywun sydd ag adnabyddiaeth dda o bêl-droed rhyngwladol, ac un sydd wedi cael profiad o reoli ar y lefel yma yn barod.

Roedd John Toshack yn brofiadol fel rheolwr ar y cyfandir, ond fel rheolwr clybiau yn Sbaen.

Ai dyma'r amser i symud gam ymhellach a defnyddio profiad rhywun sydd eisoes wedi rheoli tramor, ar lefel rhyngwladol, er mwyn ceisio cyflawni'r nod o gyrraedd rowndiau terfynol Pencampwriaethau Ewrop neu Gwpan y Byd yn y dyfodol?

Ar y llaw arall, a ddylid penodi rhywun sydd yn Gymro ac sydd yn adnabod ac yn gyfarwydd ag anghenion pêl-droed Cymru ?

Beth yw eich barn?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Mae Glyn Griffiths wedi codi gwrychyn rhai o gefnogwyr ffyddlon Cymru gyda'i sylwadau ar y blog yn gynharach yn yr wythnos.

Fe fydd Glyn ac un o gefnogwyr anfodlon yn cael cyfle i drafod cynnwys y blog yn fyw ar Ar y Marc fore Sadwrn.

Hefyd ar y rhaglen fe gawn ni glywed be fydd hanes tîm dan un ar bymtheg Cymru yn erbyn Gogledd Iwerddon wrth iddyn nhw geisio ennill y Victory Shield am y tro cyntaf er dros hanner can mlynedd.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Unwaith eto - penderfyniad yn ymwneud a pheldroed, ffrae ac anghytuno, a'r hyn sydd wedi codi gwrychyn llawer o gefnogwyr Cymru y tro yma ydi lleoliad y gem ryngwladol rhwng Cymru a Lloegr mis Mawrth nesaf.

Cafwyd cyhoeddiad swyddogol gan Gymdeithas Beldroed Cymru yr wythnos diwethaf yn cadarnhau mai ar Stadiwm y Mileniwm fydd y gem, ond daeth hyn ond i esgor ar gwyno gan griw o gefnogwyr yn credu mai, yn eu barn hwy, ar Stadiwm Dinas Caerdydd y dylid cynnal y gem. Pam ar wyneb y ddaeaer sydd angen chwarae'r gem yma mewn stadiwm cyfyngiedig ei maint, pan mae cymaint o Gymry yn edrych ymlaen am gael cyfle i gefnogi eu gwlad mewn gem a allasai fod yn enedigaeth ar ddyfol newydd?

Mae'n wir nad yw gobeithio Cymru o orffen yn ail, ( heb son am fod ar frig y grwp) yn un realistig erbyn hyn, ond erbyn mis Mawrth nesaf, bydd rheolwr newydd yn ein harwain, ac os bydd pob chwaraewr yn holliach, fe ddylid cael carfan eithaf cryf ac a fyddai yn rhoi arwydd o'r hyn y gellir ei ddisgwyl o dan ofal olynydd John Toshack.

Yn anffodus, ymddengys fod gan Cymru rhyw garfan o gefnogwyr sydd yn ymddangos fel petaent yny styried eu hunain fel rhyw grachach elitaidd,- y math o berson a gafwyd ei bortreadu yn un o sgets Harry Enfield ers talwm - ' Allai ddim helpu sylweddoli fy mod i yn llawer pwysicach na chi!', ie, rhyw freintiedig rai sydd wedi cael eu hunan- eneinio ( neu gan Dewi Sant o bosib) i gefnogi Cymru, ac yn sgil hynny, yn ymddangos fel pe baent yn edrych i lawr eu trwynau ar y gweddilkl ohonom, sydd ddim mor ffodus o gael y cyfle i ddilyn Cymru i bob gwlad, ac ar gyfer pob gem.

Tydy'r crach yn ffodus eu bod mewn sefyllfa o allu gwneud hyn! Mi fyddai llawer un arall yn hoffi gwneud yr un peth petae eu sefyllfa yn wahanol! Gorau Cymro, Cymro oddi cartref efallai, yn enwedig y rhieni sydd yn barod i deithio i Azerbajan , Albania neu hyd yn oed Abu Dhabi petae rhaid!

Mae'n hen bryd inni sylweddoli fod cefnogwyr yn dod o wahanol gefndiroedd cymdeithasol ao o wahanol diwylliant - gan gynnwys y rhai sydd yn ddigon ffodus i allu teithio, a'r rhai sydd yn gallu gweld Cymru adref, ond na all deithio i Gaerdydd ar nos Wener neu ganol wythnos chwaith.

Y peth pwysicaf ydi sicrhau fod cefnogwyr yn troi i fyny i'r gemau, ble bynnag y byddant yn cael eu chwarae ac yn dangos undod fel Cymry, a rhoi gorau i'r clegar hurt a hunanol, gan wneud yr un peth yr ydym wedi dysgu ei wneud dros y blynyddoedd, - byw mewn gobaith!

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Roedd 'na ddigon o heip bnawn Sul wrth i'r Elyrch godi gobeithion eu cefnogwyr a dangos eu bod hwythau, fel clwb y brifddinas, yn ddigon da i gael eu hystyried fel tîm sydd yn brwydro am le yn Uwchgynghrair Lloegr.

Ond och a gwae! Daeth nos Fercher, ac wrth imi eistedd yn Stadiwm Liberty yn gweld Abertawe yn cwympo yn erbyn Bristol City, anodd oedd credu mai dyma oedd y tîm a chwalodd eu cymdogion dridiau yn gynt ag sydd yn meddu ar un o amddiffynfeydd gorau'r Bencampwriaeth.

Doedd pethau fawr gwell yn Reading - gyda gôl Jay Bothroyd yn achub y dydd i Gaerdydd, ond honno yn cael ei hamau o fod yn un ddilys.

Ond dyna ni, penderfyniad y dyfarnwr sydd yn cyfrif, ac os bydd y gôl yma yn allweddol wrth sicrhau y bydd Caerdydd yn dyrchafu, pwy sydd angen technoleg mewn gemau onid e?!

Dim ond pam mae rheolwr yn cael ei enwi fel rheolwr y mis, a blaenwr - Bothroyd - yn derbyn y clod fel chwaraewr y mis mae canlyniadau annisgwyl yn digwydd!

Ond mae Dave Jones wedi gosod sylfeini cadarn a gobeithiol ar gyfer gweddill y tymor a tybed a fydd y clwb yn gallu ac yn barod i'w gefnogi ym mis Ionawr pan gaiff gyfle i gryfhau'r garfan?

Ond ar ddiwedd wythnos o anghysondeb, ydi'r ddau dîm o Dde Cymru yn wir ymgeiswyr i gael dyrchafiad eleni, neu rith o fawredd cam arweiniol sydd ar y gweill?

Wedi dweud hynny,' un wennol na wna wanwyn' medda nhw, os felly, ai gwennol annisgwyl oedd perfformiadau siomedig ganol wythnos?

Bydd y gemau sydd i ddod yn gallu ein harwain yn fuan tua'r ateb!

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Penwythnos Cwpan Cymru, ac fe fydd y deiliaid Bangor yn deisio cadw gafael ar y gwpan am y bedwaredd tymor yn olynol.

Mae'n debyg mai'r gêm fwyaf diddorol ydi honno ar y Gnoll, ble mae Castell-nedd yn wynebu'r Rhyl.

Siom oedd sylweddoli nad oedd y Rhyl yn gymwys i chwarae yn Uwchgynghrair Cymru eleni, ond mae eu canlyniadau hyd yn hyn, yn y Gynghrair Undebol yn awgrymu eu bod ar y trywydd iawn i ddychwelyd.

Siom hefyd ydi tymor Castell Nedd wedi bod yn yr Uwchgynghrair hyd yn hyn o ystyried eu gobeithion dros yr Haf.

Pan gafodd Lee Trundle ei arwyddo roedd llawer yn meddwl fod hyn am esgor ar dymor fythgofiadwy iddynt. Nid felly mae wedi bod, ac mae Cwpan Cymru, o bosib, yn cynnig gwell llwybr i Ewrop iddynt nac yw'r Uwchgynghrair ar hyn o bryd.

A son am lwybrau i Ewrop, does yr un ffordd y gall unrhyw un o brif dimau Cymru ddarganfod taith i'r cyfandir drwy gyfundrefn pêl-droed eu gwlad.

Tra mae'r sylw yn troi at y gêm ddarbi fawr rhwng Caerdydd ac Abertawe y Sul yma, gyda gobaith am ddyrchafiad i Uwchgynghrair Lloegr yn bodoli i'r dau dîm, serch hynny, er y byddai cyfoeth yr Uwchgynghrair ar gael iddynt petai llwyddiant ar ddiwedd y tymor, 'dwi ddim yn rhy siwr os y byddant yn gymwys i gynrychioli Lloegr yn Ewrop petai'r llwyddiant yn parhau i'r dyfodol.

Mae'n hen gŵyn gen i ond alla'i ddim ddeall o gwbwl pam na all pob tîm yng Nghymru gystadlu yng Ngwpan Cymru. A oes yna unrhyw wlad arall yn Ewrop sydd yn rhwystro timau o fewn eu gwlad eu hunain rhag cystadlu ar lwyfan cyfandirol?

Oni fyddai delwedd pêl-droed Cymru yn llawer mwy positif petai Caerdydd neu Abertawe yn cystadlu yng Nghynghrair Europa ?

Mae'n hen bryd i'r drefn gael ei ail-strwythuro gan groesawu cynhwysiant Caerdydd, Abertawe, Casnewydd, Wrecsam a hefyd Bae Colwyn i'r Gwpan, ac ymestyn iddynt yr un hawl ac sydd yn cael ei gynnig i bob clwb o fewn awdurdod Cymdeithas Bêl Droed Cymru.

Wn i ddim beth ydi barn a sefyllfa swyddogol y Gymdeithas Bêl Droed - diddorol fyddai cael gwybod. Wedi'r cwbwl, fe gafwyd tîm o Loegr, sef Y Seintiau Newydd yn cynrychioli Cymru yng nghystadleuaeth Cynghrair Pencampwyr Ewrop ar ddechrau'r tymor!

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?