Datblygiad Theatr Gerdd
Wrth i ddramâu cerdd ddatblygu, daeth y straeon yn gryfach gyda'r caneuon yn cael eu hintegreiddio'n fwy i'r plot. Drama gerdd llyfr (Book Musical) ydy gwaith sy'n cynnwys drama sydd wedi ei datblygu'n dda ac sy'n llwyddo i ysgogi emosiynau eraill ar wahân i chwerthin.
Fel arfer bydd drama gerdd llyfr yn cynnwys tair rhan:
- y llyfr (sef y sgript, sy’n cynnwys y ddeialog a’r ddrama)
- y gerddoriaeth (wedi ei threfnu ar gyfer nifer o offerynnau o fewn band neu gerddorfa)
- y geiriau (lle mae geiriau’r caneuon wedi eu hysgrifennu o dan ran y piano)
Gyda’i gilydd mae’r geiriau a rhan y piano yn cael eu galw’n sgôr. Mae tîm creadigol mawr yn cydweithio i ddod â drama gerdd llyfr i’r llwyfan. Mae’r gwahanol rolau’n bwysig iawn.
Cyfansoddwyr cynnar
O ddechrau i ganol y 1900au, roedd nifer fach o gyfansoddwyr ac awduron caneuon yn amlwg iawn ym maes Theatr Gerdd. Roedd y gwaith yn gyfrwng ar gyfer eu talentau cyfansoddi caneuon ac yn gyfle i arddangos doniau sêr mawr yr oes. Cafodd llawer o'r rhain eu troi'n ffilmiau. Roedd y straeon yn llai pwysig na'r caneuon a'r dawnsfeydd ysblennydd. Cynhyrchodd awduron caneuon amlwg y cyfnod nifer fawr iawn o ddramâu cerdd. Mae llawer o'r caneuon oedd ynddyn nhw mor adnabyddus fel eu bod yn cael eu galw'n ganeuon 'safonol' ac maen nhw'n dal i fod yn boblogaidd hyd heddiw. Mae enghreifftiau'n cynnwys caneuon gan Cole Porter, Irving Berlin a George ac Ira Gershwin.
Mae'r rhaglen radio Saesneg hon yn edrych ar y stori y tu ôl i'r gân Let’s Face the Music and Dance gan Irving Berlin. Mae’n esbonio pam y datblygodd Theatr Gerdd i fod mor boblogaidd yn ystod y 1930au.
