Bhidio - Buaidh eucoir

Coimhead a' bhidio seo agus faigh a-mach mun bhuaidh a tha aig eucoir air na daoine a dh'fhuilingeas e.

Ciamar a tha eucoir a' toirt buaidh air a' chomann-shòisealta?

Nuair a thèid eucoir a dhèanamh, tha droch bhuaidhean no droch bhuilean ann. A rèir 's dè an seòrsa eucoir a chaidh a dhèanamh, faodaidh e buaidh a thoirt air bodhaig, faireachdainn no airgead.

Buaidh eucoir air na daoine a dh'fhuilingeas e agus an teaghlaichean

Faodaidh iomadh droch bhuaidh a bhith aig eucoir leithid mèirle air daoine fa leth agus air an teaghlaichean:

• Buaidh air bodhaig – leòn gu dìreach bho ionnsaigh. Faodaidh seo a bhith anns a' gheàrr-ùine no anns an ùine-fhada.
• Buaidh air faireachdainnean – dragh, uallach no streas inntinn air sgàth eucoir air choreigin fhulang. Uaireannan, bidh daoine ag atharrachadh gu tur agus dìreach a' fuireach a-staigh nan dachaigh, no bidh e doirbh dhaibh deagh dhàimhean a chumail suas ris an teaghlach aca.
• Buaidh air airgead – a' call airgead, cairt creideis no a' feumachdainn pàigheadh airson fòn-làimhe ùr, msaa. Dh'fhaodadh nach tèid aig a' phrìomh neach-cosnaidh ann an teaghlach obrachadh tuilleadh agus tha seo a' dèanamh an teaghlaich nas bochda.

Buaidh eucoir air coimhearsnachdan

Faodaidh iomadh droch bhuaidh a bhith aig eucoirean leithid goid an dèidh briseadh a-steach a dhachaigh tachairt tric:

• Faireachail – tha an t-eagal air daoine an dachaighean fhàgail agus canar gu bheil iad air am bacadh gu sòisealta.
• Ionmhasail – tha cosgaisean àrachais anns a' choimhearsnachd a' dol suas agus tha prìsean thaighean a' tuiteam.

Buaidh eucoir air gnothachasan

Faodaidh iomadh droch bhuaidh a bhith aig eucoirean, leithid goid, air gnothachasan agus luchd-ceannach:

• Ionmhasail – dh'fhaodadh gnothachas airgead a chall agus dùnadh air sgàth stuth a chall.
• Ionmhasail – 's dòcha gun tig air luchd-ceannach prìsean nas motha a phàigheadh gus dèanamh suas airson cosgais nan stuthan a chaidh a ghoid no airson dòighean nas fheàrr air bùithtean a dhìon, mar eisimpleir, CCTV.

Dè a' bhuaidh ionmhasail a tha aig eucoir?

A thaobh a' chomainn-shòisealta san fharsaingeachd, tha cosgais an cois a h-uile eucoir oir feumaidh luchd-pàighidh nan cìsean na poilis a phàigheadh airson eucoir a rannsachadh, na cùirtean airson eucoraich a thoirt gu cùirt, agus ma thèid am faighinn ciontach, feumaidh an t-eucorach seirbheis coimhearsnachd a dhèanamh no a dhol dhan phrìosan. Tha eucoir cuideachd a' cosg do sheirbheisean smàlaidh agus slàinte, mar eisimpleir, nuair a bhios iad a' dèiligeadh ri lasadh theineachan a dh'aon ghnothaich no cùram meadaigeach an dèidh ionnsaigh.

Buaidh eucoir ann an Alba

Ann an 2022-23, thug Riaghaltas na h-Alba beagan nas lugha na £4 billean airson òrdugh agus sàbhailteachd phoblach, agus b' e sin 3.6% de na chosg Riaghaltas na h-Alba.

Dè a' bhuaidh a tha aig eucoir air an neach a nì an eucoir?

Tha droch bhuaidhean aig eucoir cuideachd air an neach a nì e:

• A' faireachdainn nàire no ciont
• A' call obair no doirbh obair fhaighinn anns an àm ri teachd
• Duilgheadasan ann an dàimhean còmhla ri teaghlach agus caraidean