Dè na h-adhbharan a th' ann airson eucoir?
Tha iomadh adhbhar toinnte ann airson mìneachadh carson a bhios eucoir a' tachairt. Tha cuid dhe na h-adhbharan sin co-cheangailte ris na daoine a bhios a' dèanamh eucoir. Tha cuid eile co-cheangailte ri suidheachadh neach, mar:
- bochdainn
- na thachras ann an òige
- ìmpidh cho-aoisean
- mì-chleachdadh air deoch-làidir is drugaichean
Tha dà phrìomh bheachd gan cur air adhart airson eucoir a mhìneachadh – beachdan fa letheachas agus beachdan co-shealbhach.
Ciamar a bhios daoine fa-letheach a' coimhead air eucoir?
Tha daoine fa-letheach buailteach fòcas a chur air roghainnean gach neach fa leth mar adhbhar airson eucoir a dhèanamh. Ma roghnaicheas cuideigin eucoir a dhèanamh, tha an t-uallach orrasan air a shon. Tha iad a' creidsinn ma thèid cuideigin a ghlacadh a' dèanamh eucoir, gum bu chòir dhaibh fulang air a shon tro pheanas.
Ciamar a bhios co-shealbhaich a' coimhead air eucoir?
Tha co-shealbhaich a' creidsinn gur e neo-ionannachd (gun a bhith co-ionann) anns a' chomann-shòisealta am prìomh adhbhar airson eucoir. Tha iad a' creidsinn gu bheil neo-ionannachd a' fàgail dhaoine ann an suidheachadh nas laige agus ann am barrachd cunnairt gun toir sin buaidh orra gu dhol an sàs ann an eucoir.
Tha riaghaltas na h-Alba agus na RA a' gabhail ris gu bheil iomadh adhbhar ann airson eucoir. Ach feumaidh daoine fa leth an t-uallach a ghabhail airson na nì iad. 'S e obair an riaghaltais dèiligeadh ri eucoir, an dà chuid na h-adhbharan air a shon agus a' bhuaidh aige.
