Dewis y set
Mae’n bwysig fod y dewis o set yn cyd-fynd ag arddull y cynhyrchiad ac yn ychwanegu ato. Mae’n rhaid i ddylunydd y set ddeall anghenion y ddrama’n llawn, megis creu aml-leoliadau, llinellau golwg i’r gynulleidfa, ble y daw actorion i mewn ac allan ac unrhyw newidiadau posibl sydd angen eu gwneud i’r set yn ystod y ddrama. Ei swydd ydy dylunio mewn ffordd sy’n cefnogi’r hyn sy’n digwydd yn hytrach na thynnu sylw at y dyluniad ei hun. Gall set sy’n rhy brysur dynnu sylw oddi wrth yr hyn sy’n digwydd a gwneud gwaith yr actor yn anoddach, yn hytrach na’i gynorthwyo ar y llwyfan.
Fel arfer, bydd dylunydd y set yn dechrau drwy drafod brasluniau o’i syniadau gyda’r cyfarwyddwr (ac weithiau’r cast). Yna, ar ôl gwneud y dewisiadau, bydd yn creu blwch model, sef model bach o’r set, wedi ei adeiladu i raddfa. Wrth wneud hyn mae’n gallu gweld sut y dylai edrych yn y cynhyrchiad a gwneud unrhyw addasiadau angenrheidiol.
Gweithio gyda blwch model
Mae’r clip Saesneg hwn o gynhyrchiad y BBC, yn dangos dylunydd llwyfan yn esbonio sut mae hi’n gweithio gyda model o’r set
