Elfennau drama ydy'r cynhwysion sy'n rhoi siâp a chymeriad i ddarn o waith. Yn ogystal â chymeriadau, plot a gweithredoedd, ystyria pa ffurfiau a chonfensiynau dramatig i'w defnyddio.
Wyt ti’n gallu adnabod elfennau drama gwahanol? Gwylia’r clip hwn o’r ddrama Y Gwyll gan S4C a BBC Cymru. Ateba’r cwestiynau a chymhara dy atebion â’r atebion enghreifftiol.
Question
Pa ffurf ddramatig sy’n cael ei gynrychioli yn y fideo?
Mae Y Gwyll yn enghraifft o ddrama gyffrous neu ‘thriller’.
Question
Lle mae’r enghraifft o uchafbwynt yn y fideo hwn?
Mae’r olygfa yn cyrraedd uchafbwynt pan fydd y ditectif yn cael ei daro gan rywun anhysbys.
Question
Sut mae confensiynau dramatig yn cael eu defnyddio i adeiladu at yr uchafbwynt?
Mae’r gerddoriaeth yn cyflymu ac yn dwysáu wrth i’r prif gymeriad redeg trwy’r gors. Mae’r cymeriad ei hun yn symud ynghynt ac mae’r golygu o lun i lun hefyd wedi cyflymu.
Question
Beth ydy’r enghraifft o gyrraedd ‘ochr y dibyn’ yn y fideo hwn?
Mae’r gynulleidfa yn cael ei gadael ar ‘ddiwedd y dibyn’ ar ôl i’r prif gymeriad gael ei daro yn ddiymadferth. Nid ydy’r gynulleidfa’n gwybod eto os mae e wedi cael ei anafu’n ddifrifol neu beidio.
Question
Ydy’r digwyddiadau yn y fideo mewn trefn linellol neu anllinellol?
Mae’r digwyddiadau yn y fideo mewn trefn linellol ac yn digwydd yn gronolegol. Dydyn nhw ddim yn symud o gwmpas mewn amser.
