Defnyddio symbolau
Symbol ydy rhywbeth sy’n sefyll dros, neu sy’n cynrychioli rhywbeth arall. Mae symbolau’n cael eu defnyddio’n aml mewn dramâu i ddwysáu ystyr ac atgoffa’r gynulleidfa am y themâu neu’r pynciau mae’n eu cynnwys.
Yn aml mae gan brop neu ddarn o set arwyddocâd arbennig y bydd cynulleidfa yn ei adnabod ar unwaith pan gaiff ei ddefnyddio’n symbolaidd yn y gwaith. Enghraifft o hyn ydy’r defnydd o’r grisiau fel trosiad gweledol yn nrama Gwenlyn Parry, Y Tŵr.
Beth allai’r pethau uchod fod yn eu cynrychioli?
- Mae côt wen yn cynrychioli meddygaeth, gwyddoniaeth, awdurdod
- Mae’r golomen yn cynrychioli heddwch a thangnefedd
- Mae’r llun priodas wedi ei rwygo yn cynrychioli ysgariad neu wahanu
- Mae oen bach yn cynrychioli bywyd newydd, gwanwyn, diniweidrwydd neu aberth
Symudiadau symbolaidd
Nid propiau yn unig sy’n cael eu defnyddio’n symbolaidd mewn drama. Gall symudiad a gweithredoedd fod yn symbolaidd hefyd, yn enwedig os wyt ti’n defnyddio Theatr gorfforol fel ffurf. Roedd drama uchelgeisiol y Theatr Genedlaethol, Y Bont, yn defnyddio’r brotest gyntaf gan Gymdeithas yr Iaith ar bont Trefechan fel stori. Ond roedd stori’r ddau gariad yn ‘pontio’ eu gwahaniaethau ar ddiwedd y ddrama yn rhoi mwy nag un ystyr i’r ‘bont’ a oedd hefyd yn symbol o’r brotest ei hun.
Mae modd defnyddio amlgyfryngau i gyfleu symbolaeth hefyd. Yn Mac//Beth defnyddiwyd fideo i daflunio delweddau o anifeiliaid symbolaidd megis neidr, tylluan ac eryrod. Ym mherfformiad Theatr Genedlaethol Cymru o Blodeuwedd, mae yna dylluan, fel yn y chwedl, sy’n cynrychioli Blodeuwedd ei hun.
