Tha am bàrd a' sealltainn gur e pìos pearsanta a th' ann le mi agus gu bheil am bàrd ag aithneachadh gu bheil rudeigin aice ri dhèanamh (Feumaidh). Tha seo a' glacadh aire an leughadair is tha sinn airson faighinn a-mach dè tha i a' cur roimhpe.

Tha an uaim aig toiseach nam faclan shad agus shuath a' cur cuideam air mar a thilg seanmhair a' bhàird às uidheaman is gun robh iad aig a' cheann thall ann an sabhal seanair a' bhàird far an robh e 's dòcha a' dèanamh feum de rudan air nach robh iarrtas tuilleadh san taigh. Tha uaim ann cuideachd sna faclan sheanmhair agus sheanair agus tha seo a' toirt nan daoine mu bheil am bàrd a' bruidhinn gu aire an leughadair.

Tha am bàrd ag innse dhuinn gu bheil a bhoisean cnapach sgìth. Tha an taghadh-facail cnapach a' toirt oirnn smaoineachadh gun robh a seanair ag obair le làmhan agus gun tug an obair seo buaidh air boisean an duine – gum b' e obair fhiosaigeach a bha aige. Tha am facal sgìth a' cur ris a seo, agus a' toirt oirnn smaoineachadh gun robh e air a bhith ris an obair sin fad ùine mhòr.

Tha am bàrd ag innse dhuinn mun

''a' chuairt mu dheireadh

a ghabh e''

Dh'fhaodadh seo a bhith cudromach ann an dà dhòigh: gum b' e sin a' chuairt mu dheireadh a ghabh e na bheatha obrach, ach cuideachd gu bheil a' chuairt sin a' riochdachadh a bheatha fhèin agus an earrann de dh'eachdraidh is de chultar a dh'fhalbh leis.