An Taigh-tasgaidh 's an Leabhar le Màiri NicGumaraid
'S ann à Àiridh a' Bhruaich ann an Sgìre nan Loch de dh'Eilean Leòdhais a tha Màiri NicGumaraid. Tha Màiri air ficsean a sgrìobhadh a thuilleadh air bàrdachd. Anns a' phìos seo, tha NicGumaraid a' meòrachadh air a h-eachdraidh agus a cultar agus mar a thèid aice air an tuigsinn agus an cuimhneachadh nas fheàrr.
An Taigh-tasgaidh 's an Leabhar
by Màiri NicGumaraid
Feumaidh mi dhol chun taigh-tasgaidh dh'fhaicinn uidheaman m' eachdraidh a shad mo sheanmhair às, a shuath mo sheanair le bhoisean cnapach sgìth air a' chuairt mu dheireadh a ghabh e dhan t-sabhal.
Feumaidh mi dhol chun taigh-tasgaidh às aonais duslach an fheòir air m' aodach, dh'fhaicinn uidheaman m' eachdraidh mus tèid an leth-shealladh den leth-sgeul a th' agam a dhìth leis an sguab th' air cùl mo shàil.
Feumaidh mi leabhar bhith deas air mo shùil de bhriathran nan làithean a dh'fhalbh, feumaidh mi leughadh fa chomhair an àm tha cànan an cunnart dhol balbh.
Feumaidh mi leabhar a dh'innseas dhomh sgeul nach eil idir air bilean an t-sluaigh, a dhol gu fear eile 'son barrachd de dh'fhios 's de thuigse air adhbhar na truaigh'.
