Proffiliau llwyddiannus
Bydd proffil da yn fanwl ac yn gywir. Bydd yn cynnwys:
- ffotograff efallai
- crynodeb gweithredol
- profiadau sy'n gysylltiedig â gwaith
- gwybodaeth am gefndir addysgol
- sgiliau a phriodweddau personol
Disgrifio sgiliau a phriodweddau
Rhaid i ti ddefnyddio tystiolaeth i gefnogi’r geiriau rwyt ti’n eu dewis ar gyfer disgrifio dy briodweddau. Gallai hyn fod yn seiliedig ar dy sgiliau, dy addysg neu dy gyflogaeth, ee
"Rwy’n benderfynol iawn o gyflawni fy nodau. Enghraifft o hyn yw fy ymrwymiad i gael gradd anrhydedd dosbarth cyntaf, yn ogystal â chwblhau blwyddyn o brofiad perthnasol mewn diwydiant."
Dylai’r geiriau rwyt ti’n eu dewis i ddisgrifio sgiliau a phriodweddau fod yn berthnasol i’r math o swydd mae gen ti ddiddordeb ynddi. Mae'n syniad da i edrych ar y geiriau sy'n cael eu defnyddio mewn hysbysebion ar gyfer swyddi, a dewis geiriau tebyg i’w cynnwys yn dy broffil dy hun.
Dysga sut i farchnata dy sgiliau ar-lein (Cynnwys Saesneg)
Question
Ar ôl edrych ar y rhestr isod, dewisa’r tri gair sydd fwyaf perthnasol i ti:
- cydwybodol
- blaengar
- dyfeisgar
- uchelgeisiol
- penderfynol
- egnïol
- dibynadwy
- ymroddedig
Ysgrifenna frawddeg i ddisgrifio dy hun gan ddefnyddio un o’r ansoddeiriau o’r rhestr uchod. Cofia gynnwys enghraifft sy’n dangos sut rwyt ti wedi defnyddio’r nodwedd yn ddiweddar.
Dyma rai enghreifftiau o frawddegau.
- Rwy’n gydwybodol iawn ac rwyf wedi gweithio’n galed i gwblhau gwaith cwrs ym mhob pwnc, gan geisio cael y graddau uchaf posibl.
- Rwy’n berson blaengar iawn ac mae hyn i’w weld yn fy ymroddiad i warchod yr amgylchedd. Rwy’n dewis beicio yn hytrach na defnyddio car er mwyn lleihau fy ôl troed carbon.
- Rwy’n berson dyfeisgar iawn, ac mae hynny’n sgil gwerthfawr wrth helpu i redeg y clwb ieuenctid lleol. Rwy’n gallu cynllunio a chyflwyno gweithgareddau amrywiol, ac rwyf bob amser yn gwneud yn siŵr fy mod wedi paratoi gweithgareddau dan do, rhag ofn y bydd y tywydd yn anffafriol.
- Rwy’n uchelgeisiol iawn, ac mae fy ymroddiad i fod yn filfeddyg yn brawf o hyn. Rwyf wedi bod yn gwirfoddoli mewn lloches leol i fulod ers tair blynedd.
- Rwy’n berson penderfynol iawn ac ni fyddaf yn rhoi’r ffidil yn y to. Mae’r ffaith fy mod wedi dal ati gyda’r gwersi piano a chyrraedd gradd 6 yn profi hyn.
- Rwy’n berson penderfynol iawn, a phan fyddaf yn rhoi tasg i mi fy hun byddaf bob amser yn ei chwblhau. Dangosais hyn wrth ymarfer ar gyfer ras hanner marathon a’i chwblhau.
- Pan fyddaf yn gweithio tuag at nod penodol, rwy’n canolbwyntio ac yn dangos penderfyniad. Y ddwy nodwedd bwysig hyn wnaeth fy helpu i baratoi’n drylwyr ar gyfer y modiwl Gwyddoniaeth yn gynharach yn y flwyddyn.
- Rwy’n berson egnïol iawn ac rwy’n mwynhau gwirfoddoli mewn amgylchedd bywiog, ee y clwb ieuenctid.
- Rwy’n dangos yn rheolaidd fy mod yn berson dibynadwy sy’n gallu gweithio’n dda mewn grŵp neu ar fy mhen fy hun. Rwy’n cwblhau gwaith o fewn terfynau amser ac mae fy mhresenoldeb da yn yr ysgol yn golygu fy mod yn cyfrannu’n rheolaidd at gyfarfodydd tîm.
- Rwy’n berson ymroddedig iawn. Mae’r ffaith nad wyf wedi colli diwrnod o waith ers i mi gael fy swydd ran-amser yn brawf o hyn.
