Ekipi i Unitetit thotë se e kanë humbur shpresën që zgjidhja mund të arrihet përmes KS të OKB-së

Burime nga Ministria e Jashtme Britanike, Foreign Office, thanë se anëtarët e delegacionit kosovar kanë sot takime në Parlamentin britanik dhe në Departamentin për Zhvillim Ndërkombëtar.

Në rendin e ditës të vizitës së Ekipit të Unitetit është një konferencë shtypi në orët e para të pasdites, e cila pritet t'i paraprijë takimeve me zyrtarë të lartë në Ministrinë e Jashtme.

BBC mësoi se politikanët kosovarë do të priten nga Sekretari i Jashtëm britanik, David Miliband dhe Ministri për Çështjet e Europës, Jim Murphy.

Negociuesit kosovarë thonë se takimi pritet të ofrojë një përgjigje mbi formën e vendimit për statusin e Kosovës dhe mbi rolin që duhet të luajë BE-ja pas 10 dhjetorit.

Negociuesit kosovarë kanë thënë se e kanë humbur shpresën që zgjidhja mund të arrihet përmes KS të OKB-së.

Takimi në Londër i paraprin një takimi tjetër të drejtpërdrejtë ndërmjet palëve, i parashikuar të mbahet në Bruksel më 14 Tetor.

Kundër idesë së Ischingerit

Ekipi i Negociuesve të Kosovës e ka cilësuar si të panevojshme organizimin e një konference ndërkombëtare për statusin, të llojit të Daytonit, të paralajmëruar nga Wolfgang Ischinger, një prej ndërmjetësve ndërkombëtarë.

Pesëshja kosovare ka thënë se Kosova është një rast unik dhe ajo nuk mund të krahasohet me Bosnjë Hercegovinën.

Sipas saj Kosova ka krijuar realitetin e ri dhe Prishtina zyrtare pret njohje ndërkombëtare të pavarësisë së saj.

Kosova është një rast unik dhe ajo nuk mund të krahasohet me Bosnjë Hercegovinën Ekipi i Unitetit

Por udhëheqësit politikë të Kosovës, kanë theksuar se janë shterrur të gjitha mundësitë për të gjetur një zgjidhje për Kosovën dhe se bashkësia ndërkombëtare duhet të ecë më shpejt drejt njohjes së pavarësisë së saj.

Deklarimet e pesëshes së Prishtinës pasuan një deklaratë të ndërmjetësit evropian, Ischinger, pas takimeve në Bruksel, se Treshja Ndërkombëtare po mendon në organizimin e një konference ndërkombëtarë të nivelit të Daytonit, që i dha fund konfliktit të armatosur në Bosnjë e Hercegovinë, por që nuk ka zgjidhur problemet atje as 12 vjet pas nënshkrimit të marrëveshjes.

Konferenca për Kosovën mund të pritet të organizohet nga fillimi i muajit dhjetor në ndonjë vend të Evropës.