Qananiisaa fi Kipchoogeen Olompikii Paarisirratti ammas wal arguuf

Olompikii Paaris 2024 irratti atileetonni wal morkachuun seenaa guddaa qaban wal argu.

Itoophiyaan atileetota Olompikii Paaris irratti hirmaatan keessaa tokko atileet Qanaaniisaa Baqqalaa tahuu ifoomsiteetti.

Olompikii Riyoo fi Tookiyoo irratti osoo hin filamiin kan hafe Qananiisaan amma atileetota dhiiraan Paaris irratti Itoophiyaa bakka bu'an keessaa tokko tahuu Woeld Athletics fuula Feesbuukii isaa irratti ifoomseera.

Dubartootaan rikardii Maraatoonii harkaa kan qabdu Tigist Asaffaa, shaampiyoonaa Adunyaa kan turte Amanee Badhaasoo, fi Magartuu Alamuu filamaniiru.

Dhiiraan ammoo Qananiisaa Baqqalaa, Siisay Lammaa fi Dheeressaa Galataa Olompikii Paaris irratti Itoophiyaa bakka bu'uun dorgomu.

Atileet Qananiisaa Baqqalaa dorgommii Olompikii Riyoo irratti ''yeroo dorgommiin dhiyaatutti seera haaraa nama dorgommii sadi afur fiige malee hin ta'u jedhu fidanii na hambisan'' jedhee ture.

Akkasumas Olompikii Tookiyoo irratti akka hin hin hirmaannes ''ta'e jedhanii na ahnbisan'' jechuun Federeeshinii Atileetiksii Itoophiyaa irraa akak komii qabu ibsee ture.

Amma ammoo atileetota Itoophiyaa bakka bu'uun Olompikii Paaris irratti dorgoman keessaa tokko tahuu ifoomeera.

Atileet Qananiisaa Baqqalaa faeenya 5,000m fi 10,000m wal tajjii Olompikii irratti yeroo sadii shaampiyoonaa taheera.

Garuu erga bara 2012 as tapha Olompikii irratti osoo hin hirmaatiin hafe.

Maraatoonii Landan irratti ji'a darbe lammaffaan xumuruun isaa ammoo Qananiisaan Olompikii irratti haalaan akka eegamu isa taasiseera.

Olompikii Paaris irratti Maraatooniidhaan rikardii kan harkaa qabu atileetii Keeniyaa Eliyuud Kipchoogee waliin Hagayya 10 morkata.

Atileetiin Keeniyaa rikardii Maraatoonii sa'a lamaa gadi galuun harkaa qabu Kipchoogeen Olompikii irratti yeroo sadii walitti aansee mo'achuun seenaa hojjechuuf qophii tahuu himeera.

Kipchoogeen kana dura Olompikii Riyoo bara 2016 fi Olompikii Tookiyoo bara 2020 irratti mo'ateera.

Atileetonni lamaan morkattoota walii jaboo yoo tahan, falmii jabaa isaan taasisan ammoo Paaris irratti dorgommii Shaampiyoonshiippii addunyaa bara 2003 irratti ture.

Yeroo sana Kipchoogeen meetira 5,000 warqee mo'ate. Atileetiin Morookoo Hichaam El Guurej ammoo lammaffaa bahe. Qananiisaan yeroo sana sadaffaan xumure.

Waggaa booda tapha Olompikii Ateensi irratti Kipchoogeen sadaffaa, Qananiisaan lammaffaa atileetiin Morookoo El Guurej ammoo warqee mo'atan.

Kun fageenya 5,000m ture. Fageenya 10,000m ammoo Qananiisaan warqee mo'achuun dorgommicha xumure.

Bara 2008 Olompikii Beejingi irratti fageenya meetira 5,000 Qananiisaan warqee mo'ate. Kipchoogeen ammoo lammaffaan xumure.

Ammas dorgommichuma irratti fageenya meetira 10,000 Qananiisaan warqee injifachuun xumure.

Bara 2013 Kipchoogeen dorgommii Maraatooniitti fuula naanneeffate. Ergasii atileetii jabaa addunyaa tahuu danda'e.

Dorgommii Olompikii lama irratti warqee injifate dabalatee ergasii medaaliyaawwan 11 mo'achuu danda'eera.

Bara 2014 Qananiisaan yeroo Maraatoonii Paaris irratti dorgomee mo'ate sa'aatii saffisaa fageenyichaa [km 42.16] galmeessuu danda'eera.

Ergasii miidhama isa mudataa tureen Qananiisaan dorgommii gurguddaa irraa dhabameera. Lamaan isaanii erga magaalaa Paarisitti wal morkatanii ammas waggaa 21 booda achumatti waliif bahuuf jiru.

Dorgommiin Olompikii kun dorgommii Olompikii xumuraa Kipchoogee fi Qananiisaan irratti wal morkatan taha.