Ọlọ́pàá ilẹ̀ Gẹ̀ẹ́sì ti sanwó ìtaràn £2500 fún oníwàásù ọmọ Nàìjíríà tí wọn mú lọnà àìtọ́

Oniwaasu Kristẹni kan ni awọn ọlọpaa ilẹ Gẹẹsi ko panpẹ si lọwọ ti wọn si fipa gba bibeli lọwọ rẹ.

Lẹyin iṣẹlẹ yii lo wa di ẹni ti awọn ọlọpaa yoo san owo gba ma binu ẹgbaa le ẹdẹgbẹta pọun fun un.

Fọnran fidio ibi ti oniwaasu Oluwole Ilesanmi ti n bẹ awọn ọlọpaa ki wọn ma ṣe gba bibeli rẹ lawọn eeyan ti wo ni igba miliọnu mẹta le loju opo ayelujara.

Iwaju ibudoko ọkọ oju irin Southgate ni wọn ti da a duro losu keji ọdun yi lẹyin ti ipe kan wole pe o n sọ ọrọ to korira ẹsin Islam.

Ile iṣẹ ọlọpaa ilẹ Gẹẹsi ni ẹtọ awọn ni lati ṣe iwadii ọrọ tawọn fura si pe o nii ṣe pẹlu idunkooko mọ awọn eeyan ẹya kan tabi ẹlẹsin miran.

Ninu fọnran fidio naa ni ọgbẹni Ilesanmi to jẹ ọmọ ọdun mẹrinlelọgọta ti n sọ fun awọn ọlọpaa naa pe ''Jesu nikan ni ọna iye''

Ọlọpaa to mu u ninu fidio naa si n sọ pe ''Mi o ba ọ jiyan amọ ko si ẹni to fẹ gbọ ohun to n sọ. Wọn fẹ ki o kuro nibi ni' "

Nigba ti ọgbẹni Ilesanmi fẹ mu bibeli rẹ, ọlọpaa naa sọ fun un pe ''o ba ti ro o daadaa ki o to bẹrẹ si ni sọ ọrọ abuku nipa ẹlẹsin miran''

Ọgbẹni Ilesanmi ni lootọ lohun sapejuwe ẹsin Islam gẹgẹ bi ohun ti ko bojumu amọ ero ọkan tohun ni gẹgẹ bi Kristẹni kii ṣe pe ohun bẹnu atẹ lu awọn musulumi.

Lọjọ Iṣẹgun, ọgbẹni Ilesanmi yoo fi iwe ẹhonu sọwọ si ileeṣẹ ijọba eleyi ti awọn eeyan fọwọsi lati le daabo bo awọn to n ṣe iwaasu nita gbangba.

Bi ọlọpaa ṣe mu mi da ibẹrubojo simi lọkan

Ileeṣẹ ọlọpaa ti gba pe awọn yoo san owo gba ma binu ẹgbaa le ẹdẹgbẹta poun fun un tori bi wọn ti ṣe fipa gba bibeli rẹ ti wọn si doju ti .

Ọgbẹni Ilesanmi ni ''Inu mi dun pe ọlọpaa mọ pe awọ́n ko lẹtọ lati mumi tori pe mo n fi bibeli ṣe iwaasu.''

O tẹsiwaju pe ''Iṣẹlẹ naa jami laya nigba ti wọn mu mi, ṣugbọn ko ko irẹwẹsi ọkan bami lati pada lọ Southgate lọ ma ṣe iwaasu nitagbangba.''