Rochas Okorochas ní ìlàkàkà àti gbé ìpínlẹ̀ Imo sókè ti sọ mí di ọlọ́dẹ orí
Oríṣun àwòrán, Getty Images
Gomina Rochas Okorocha ti ipinlẹ Imo kii ṣe ajeji si ariyanjiyan ati ede aiyede. Bi o ti ṣe n wọ iya ija ariyanjiyan pẹlu awọn adari ẹgbẹ oṣelu rẹ, APC naa loun atawọn ti ipinlẹ rẹ pẹlu n waa ko.
Amọṣa, nibayii Gomina Rochas Okorocha ti ni aigba imọran igbakeji aarẹ orilẹede Naijiria, Yẹmi Oṣinbajo lo fa wahala ti o n n koju ni ipinlẹ naa.
Ẹ gbọ naa, imọran wo ni Ọjọgbọn Yẹmi Oṣinbajo fun Gomina Okorocha ti ko gba naa?
Lasiko to fi n sọrọ nibi ayẹyẹ ṣiṣi awọn akanse iṣẹ to ṣe ni ipinlẹ naa ni gomina Okorocha ti ṣe ijẹwọ yii.
O ni ni asiko ti igbakeji aarẹ ti kọkọ wa ba oun lalejo ni ipinlẹ Imo lo ti fun oun ni imọran lati maa fọnrere awọn iṣẹ ti oun ba n ṣe. Amọ'sa, Okorocha ni esi ti oun fun Oṣinbajo nigba naa ni pe owo ti oun yoo fi ṣe eto ṣiṣi awọn akanṣe iṣẹ naa, oun yoo lo fi kọ kilasi miran sawọn ileewe.
O ni aṣe igbẹyin nii dun oloku ada lọrọ oun yoo pada ja si nitori lẹyin o rẹyin ni oun to kọgbọn ninu ọrọ ti igbakeji aarẹ sọ.
"Inu mi dun loni pe ilu Owerri tii ṣe olu ilu ipinlẹ yii ti mo ba ni ipo abule ti de ipo olu ilu nitootọ. Mo ti gba amọran yin bayii, igbakeji aarẹ. Mo si mọ pe awọn ọmọ orilẹede Naijiria yoo lee mọ bi nnkan ṣe n lọ ni ipinlẹ Imo.
"N ṣe lawọn eeyan n ṣi mi gbọ ninu gbogbo ilakaka mi lati gbe ipinlẹ Imo goke agba. Itara mi fun ipinlẹ Imo si ti sọ mi di ẹni ti ori rẹ ko pe, nitori o wumi lati yi gbogbo nnkan pada ni kiakia."
Ninu ọrọ rẹ igbakeji aarẹ, Yẹmi Oṣinbajo ṣe akawe Gomina Rochas gẹgẹ bii ẹni to ṣe ọpọ aṣeyọri, amọ ti ko pariwo aṣeyọri rẹ sita fun aye ri.
