Янгиликлар: Энди Украинага қийин бўладими? Путин хурсанд Rossiya Ukraina Yangiliklar

Жанг жабҳасида ўзи нималар бўлаяпти? Россия президенти нега бунча мамнун?

Алоқадор мавзулар:

Қақшатқич ҳужум

Россия Украинага қақшатқич зарба берди. Бунақаси бу яқин ҳафталарда кузатилмагани айтилмоқда.

Жанг жабҳасидаги бу каби бурилиш шу дам олиш кунларида кузатилган.

Россия сўнгги икки куннинг ўзида юздан ортиқ ракетасини ишга солган, Украина шарқини қаттиқ бомбалаган.

Шанба куни Днепр, Харьков ва Одессадан ташқари Киев вилоятига ҳам зарба берган.

Президент Путиннинг айтишича, ҳарбий амалиёт, "ҳаммаси Мудофаа вазирлиги ва Бош штаб режасига мувофиқ кетмоқда".

Расмий Мосванинг иддао қилишича, Украинанинг ҳарбий ва энергетика инфратузилмаларини нишонга олган.

Аммо Россиянинг ракета ҳужуми оқибатида шарқий Днепр шаҳрида тўққиз қаватли уй ҳам вайрон бўлган.

Шаҳар маъмуриятининг билдиришича, камида 35 киши қурбон бўлган, камида яна шунчасининг эса, дараги йўқ, сатҳда қидирув ишлари ҳануз давом этаётир.

Ҳужумдан омон қолган ўнлаб кишининг тан жароҳати олгани айтилади.

Днепр ҳокими Борис Филатовнинг эътироф этишича, қолганларни "тирик топиш имконияти жуда кам".

Акс-садолар

Польша Бош вазири Россиянинг ракета ҳужумларини "ноинсоний", деб атаган.

Матеуш Моравецкий Россия қасддан тинч фуқароларга қарши уруш жиноятларини содир этаётганлигини айтган.

Бугун, душанба куни Беларусь Россия билан бирга Украинанинг шимолий чегарасида қўшма ҳарбий ўқув машқларини ҳам бошлайди.

Беларусь Мудофаа вазирлиги бунинг мудофаа мақсадида қилинаётганини иддао қилади.

Аммо Москва Беларусни ҳам Украинага қарши урушга қўшмоқчи, деган хавотирлар бор.

Россия ўтган йил февраль ойида Украинага қарши босқинини бошлашда Беларусь ҳудудидан ҳам фойдаланган.

Ўзининг якшанба тунги мурожаатида Украина президенти бутун дунёдан ҳамдардлик изҳорларини олаётганини айтди.

Россияни эса, Днепр ҳужуми юзасидан "қўрқоқларча сукут сақлаётганлик"да қоралади.

"Сизнинг қўрқоқларча сукут сақлашингиз, ҳаммаси "ўтиб кетиши"ни кутиб туришингиз куни келиб ўша террорчиларнинг сизни излаб келиши билан якун топади", - деб айтган Володимир Зеленский.

Украина раҳбари қурбонлар орасида 15 ёшли қизчанинг ҳам борлиги, яна икки боланинг етим қолганлигини ҳам қўшимча қилган.

Яна чеклов

Россия сўнгги бор бундан икки ҳафта аввал Украинанинг энергетика объектларига қақшатқич зарба берганди.

Украина президентининг шанба куни маълум қилишича, Россиянинг янги ҳужумларида ҳам Харьков ва Киев вилоятидаги энергетика инфратузилмалари қаттиқ шикаст еган.

Ҳужумлар ортидан, Украинанинг давлат энергетика ширкати "Укрэнерго" барча ҳудудлар бўйлаб вақтинча истеъмол чекловини киритган. Чекловнинг кечаю кундуз амал қилиши айтилмоқда.

Украина Энергетика вазири келаси бир неча кун "қийин" бўлиши билан ҳам огоҳлантирган.

НАТО Бош котиби эса, якшанба куни Украина Ғарбдан янада кўпроқ қурол-яроғ таъминотига умид қилиши мумкинлигини айтган.

Бунга жавобан Москва Украинага қўшимча қурол-аслаҳа етказиб бериш Россия амалиётларининг кучайиши ва янада кўпроқ тинч аҳолининг қурбон бўлишига олиб келиши билан огоҳлантирган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek