Путин ҳам Британияга ҳамдардлик билдирди, Мирзиёев, Тоқаев ва Раҳмон ҳам ўз таъзияларини йўллади Britaniya Dunyo Yangiliklar

Қиролича Елизавета II нинг вафоти муносабати билан қироллик оиласи ва британ халқига ҳамдардликлар келишда давом этмоқда.

Британия Қироличаси кеча, пайшанба куни 96 ёшида оламдан ўтганди.

Қироличани хотирларкан, аксарият унинг қатъияти, ўз вазифасига содиқлиги, меҳрибонлиги ва ҳазилкашлигини алоҳида тилга олиб ўтган.

Дунё лидерлари орасидан биринчи бўлиб Франция президенти ўз таъзиясини изҳор этган.

Эммануэль Макрон қиролича Елизаветани Франциянинг дўсти ва "меҳрибон", деб атаган.

АҚШ Президенти Жо Байден эса, қиролича шунчаки ҳукмдорлик қилмагани, балки бутун бир тарихий даврни белгилаб берганлигини айтган.

Қиролича Елизавета Иккинчи ўзининг 70 йиллик ҳукмдорлиги давомида Америка Қўшма Штатларининг 14 та президенти билан шахсан учрашган.

Россиядан олинаётган хабарларга кўра, президент Владимир Путин ҳам қирол Чарльзга "чуқур" таъзия билдирган.

Путин, "қиролича Елизавета II кўп ўн йилликлар давомида ҳақли равишда ўз фуқароларининг севгиси ва ҳурматидан, шунингдек, жаҳон саҳнасидаги обрў-эътиборидан баҳраманд бўлганлиги"ни айтган.

Россия президенти, Британиянинг янги қиролига "ушбу оғир жудолик қаршисида куч-қувват ва сабр-бардош тилаган".

Қирол Чарльз ҳам, қироллик оиласининг бошқа аъзолари каби, Россиянинг шу йил бошидаги ишғоли ортидан Украинани қўллаган.

У ўшанда, "Биз шафқатсиз тажовузга қаршилик кўрсатаётган барча билан бирдаммиз", - деб айтган.

Буюк Британия Россияга қарши урушида Украинани энг фаол қўллаб келаётган етакчи Ғарб давлатларидан бири бўлади.

Украина президентининг расмий веб саҳифасида ҳозирча ҳамдардлик сўзлари кўзга ташланмайди.

Туркия Президенти Режеп Таййип Эрдоған ўзининг ҳамдардлигини Twitter акаунти орқали билдирган.

У бу хабарни қайғу билан қарши олганини айтаркан, қироллик оиласи, Буюк Британиянинг дўст ва иттифоқдош халқи ҳамда ҳукуматига "самимий" ҳамдардлик билдирган.

Туркия ва унинг президенти Украина уруши манзарасида ўзининг дипломатиясига зўр бераётган давлат сифатида халқаро саҳнага чиққан.

Канада Бош вазири Жастин Трюдо эса, Қиролича канадаликлар ҳаётининг ажралмас қисмига айланган инсон экани ва дунёдаги ўзи учун "энг суюкли одамлардан бири" бўлганини айтган.

Таъзия билдираётганлар орасида аксарият Европа давлатлари лидерлари, қироллик оилалари, Ҳамдўстлик давлатлари етакчилари, йирик халқаро ташкилотлар раҳбарлари ва Рим Папасининг ҳам борлиги кўрилган.

Осиё давлатлари раҳбарларининг ҳам ўз ҳамдардликларини йўллаётганликлари кўзга ташланган.

Ҳиндистон Бош вазири Нарендра Моди Елизавета II нинг ўлими ўзи учун оғир бўлганини айтиб, у жамият ҳаётидаги қадр-қиммат ва камтарликнинг энг яхши намунаси бўлганини таъкидлаган.

Покистон Президенти Ориф Алвий Британия Қироличасининг номи жаҳон тарихида олтин ҳарфлар билан ёдда қолишини айтган.

Шу соатларда аксарият Марказий Осиё давлатлари лидерлари ҳам қирол Чарльзга ўз ҳамдардликларини билдиришган.

Ўзбекистон, Қозоғистон ва Тожикистон президентларининг матбуот хизматлари бу ҳақда расман хабар беришган.

Жумладан, президент Шавкат Мирзиёев ўзининг таъзияномасида қиролича Елизавета II "70 йилдан ортиқ вақт давомида мамлакат яхлитлиги ва жадал ривожланишининг рамзи бўлиб келган, Қиролликнинг глобал иқтисодиёт ва сиёсатда етакчи давлатлардан бирига айланишига, унинг халқаро майдондаги обрў ва эътиборини ҳар томонлама оширишга беқиёс ҳисса қўшган буюк давлат арбоби" бўлганини айтган.

Ўзбекистон президенти "ушбу мусибатли дамларда Қиролга, оиласининг барча аъзоларига ва бутун Буюк Британия халқига таскин сўзларини билдирган, сабр-тоқат ва бардамлик тилаган".