Собиқ Россия президенти Медведев: Ғарб Россияни йўқ қилмоқчи Ukraina Rossiya Dunyo Yangiliklar

Россия Грузия урушини бошлаганининг 14 йиллиги санаси муносабати билан гапирган собиқ президент Дмитрий Медведев, Грузия ва Украина урушлари бир-бирига боғлиқ, боиси Ғарб Россияни йўқ қилмоқчи, деб даъво қилган.

Россия 2008 йили 8 август куни Грузияга бостириб кирганди.

Ўша вақтда Дмитрий Медведев Россия президенти эди.

Алоқадор мавзулар

Грузия уруши бошлангани 14 йиллиги санаси муносабати билан Россиянинг ТАСС ахборот агентлиги собиқ президентдан интервью олган.

Медведев сўзларига кўра, Украина урушининг мақсади - "бизнинг шартларимиз бўйича тинчликка эришиш".

Бугунги кунда Россия Хавфсизлик Кенгаши раиси ўринбосари лавозимини эгаллаган Дмитрий Медведев айтишича, Грузия урушидан кейин ҳам Ғарб Россияни инкор этишда давом этаверган, шунинг учун ҳам Украина уруши бошланган.

АҚШ ва Ғарбдаги иттифоқчилари НАТОни Шарққа кенгайтиришда давом этаверганлар, 2008 йили Грузияни НАТОга қабул қилмоқчи бўлганлар, Грузияга қурол-яроғ бериб Россияга қарши гижгижлаганлар, деб даъво қилди Дмитрий Медведев.

Медведев сўзларига кўра, Грузияга бостириб кириш билан Россия Ғарбнинг Россиянинг ўзидаги вазиятни издан чиқариш ҳаракатларини олдини олмоқчи бўлган.

Грузия ва Украина урушлари бир занжир халқалари, мақсади эса бир - Россияни йўқ қилиш, деди Дмитрий Медведев.

Президент Путин ҳокимиятга келганидан буён Ғарбни Россияга душманликда айблаб келади, НАТОнинг Шарқий Европа мамлакатлари ҳисобига кенгайишини Россия ўзига таҳдид деб кўришини эълон қилган.

Грузия ва Украинанинг НАТО аъзолигини Россия қабул қилмас деб билиб келди.

Бироқ Украина уруши Швеция ва Финландияни ҳам НАТОга қўшилишга ундади.

Аммо бу хабарни Президент Путин бефарқ қабул қилгандек кўрсатди ўзини.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek