Россия: Путин маъшуқаси деб айтилаётган Алина Кабаева ким? Rossiya Dunyo Yangiliklar

Россия аллақачон мисли кўрилмаган санкциялар остида қолган ва энди Европа Иттифоқи сиёсатчи, ОАВ раҳбари, собиқ Oлимпия гимнастикачиси ва, агар миш-мишлар рост бўлса, Владимир Путиннинг маъшуқаси ва баъзи болаларининг онаси Алина Кабаевани нишонга олиши мумкин.

Алоқадор мавзулар:

Европа Иттифоқи ва бошқа давлатлар киритган санкциялар Путинга яқин бўлгани учун фойда кўрган олигархлар, сиёсатчилар ва бошқа амалдорларни жазолаш учун мўлжалланган.

Ўтган ой АҚШ ва Буюк Британия унинг қизлари 36 ёшли Мария Воронцова ва 35 ёшли Катерина Тихоноваларга нисбатан санкциялар жорий қилган эди. Бу унинг собиқ рафиқаси Людмиладан туғилган болаларидир.

Ҳозиргача Кабаева кимлиги маълум бўлишига қарамай, эътибордан четда қолган эди. У нимадир келаётганини сезган бўлиши мумкин: март ойида онлайн петиция уюштирилиб, уни Швейцариядаги уйидан чиқариб юбориш талаб қилинган эди.

Манбалар Би-би-сига унинг Европа Иттифоқи санкцияларига дучор бўлажакларнинг сўнгги рўйхатида борлигини тасдиқлади. AFP хабарига кўра, у Кремль ташвиқотини тарқатишда иштирок этгани ва 69 ёшли президент Путин билан "яқин алоқада бўлгани" учун нишонга олинади. Ҳужжат лойиҳасида у Путиннинг маъшуқаси сифатида тилга олинмаган. Европа Иттифоқи ҳали бу ҳужжатни расман имзолагани йўқ.

Россия раҳбари доим шахсий ҳаётини кўздан қаттиқ пана тутар эди. Унинг шахсий ҳаёти ҳақида сўралганда, у гапни айлантиришга ҳаракат қилар эди.

Бироқ, у Кабаева билан алоқаларини тўғридан-тўғри рад этган.

2008 йилда "Московский корреспондент" газетаси у рафиқаси Людмила билан ажрашишни ва Кабаева билан турмуш қуришни режалаштирганини хабар қилди. Иккаласи ҳам бу воқеани рад этишди. Орадан кўп ўтмай, расмийлар газетани ёпдилар. Путин ва Людмила беш йилдан кейин ажрашганликларини эълон қилишди.

Россия президенти Кабаева билан алоқасини инкор этган ўша пайтда у муваффақиятли спорт карьерасидан сиёсий карьерага ўтаётган эди.

Унинг танлаган йўналиши бадиий гимнастика бўлиб, унда иштирокчилар ленталар ва тўплар каби нарсалар ёрдамида машқлар бажарадилар.

Кабаева хоним ўз карьерасининг энг юқори чўққисида ўзини дунёдаги энг яхши гимнастикачи бўлганини даъво қилади. У спортда устунлик қилган жамоанинг етакчи ўйинчиси эди. Россия 2000 йилдан 2016 йилгача ушбу спорт бўйича Олимпиаданинг барча олтин медалларини қўлга киритган.

Кабаева 1983 йилда туғилган. У тўрт ёшида бадиий гимнастика билан шуғуллана бошлаган. Унинг мураббийи Ирина Винер шундай дейди: "Мен уни биринчи марта кўрганимда кўзларимга ишонмадим. Қизда бадиий гимнастикада иккита энг муҳим хислат - эгилувчанлик ва чаққонликнинг ноёб комбинацияси бор эди".

Кабаева хоним "Россиянинг энг эгилувчан аёли" сифатида танилди.

У 1996 йилда халқаро миқёсда дебют қилди ва кутилмаганда 1998 йилги Европа чемпионатида ғолиб чиқди.

2000 йилда Сиднейда бўлиб ўтган Олимпиадада ҳалқа билан чиқишидаги кутилмаган хатоси унга қимматга тушди (ҳалқа думалаб майдондан чиқиб кетди) ва кўпкурашда у фақат бронза медалига сазовор бўлди. Тўрт йил ўтгач, Афинада олтин олиб, натижасини яхшилади.

Спортдан кетганида, у Олимпия совринларидан ташқари 18 та Жаҳон чемпионати ва 25 та Европа чемпионати медалларини қўлга киритганди. Бошқа россиялик спортчилар сингари, у ҳам допинг муаммосидан қочиб қутулмади, 2001 йилдаги бир тадбирда таъқиқланган моддага мусбат натижа берганидан сўнг медалларини йўқотди.

У сиёсатга кирди, 2007 йилдан 2014 йилгача ҳукмрон "Ягона Россия" партиясидан Россия парламентининг қуйи палатаси депутати бўлган.

2014 йилда у Россиянинг деярли барча йирик давлат оммавий ахборот воситаларида катта улушга эга бўлган Миллий медиа гуруҳи раиси бўлди.

Бу ахборот воситалари Украинадаги уруш ҳақидаги кремлпараст даъволарни тинимсиз тарқатиб, украиналикларни ўз шаҳарларини ўққа тутишда айблайди ва рус қўшинларини озод қилувчи сифатида кўрсатади.

Маълумотларга кўра, унинг мавқеи уни бадавлат аёлга айлантирган, ошкор қилинган ҳужжатлар унинг йилига 12 миллион доллар маош олишини кўрсатади.

Унинг Путин билан биринчи марта қачон учрашгани номаълум, аммо етакчи Олимпия чемпиони мамлакат президенти билан учрашиши ноодатий ҳол эмас. Уларнинг 2001 йилда Путин уни энг юқори давлат мукофоти бўлган «Дўстлик» ордени билан тақдирлаганида тушган сурати бор.

Уларнинг фарзандлари борлиги ҳақида миш-мишлар тарқалган, аммо нечта фарзанлиги ҳақида турлича хабарлар бор.

Швейцария газетасининг хабар беришича, Кабаева хоним 2015 йилда Лугано кўли яқинидаги эксклюзив клиникада ўғил кўрган ва 2019 йилда худди шу жойда бошқа бола бўлган.

Кремль бундай хабарларни рад этади. 2015 йилда Путиннинг матбуот котиби "Владимир Путиндан бола туғилиши ҳақидаги маълумотлар ҳақиқатга тўғри келмайди", деб айтган эди.

Бу Путиннинг эҳтиёткор табиатидандир - у Людмиладан туғилган болаларининг исмини ҳеч қачон ошкора айтмаган, фақат иккита вояга етган қизи борлигини айтган. Турли тахминлар ҳали яна давом этиши мумкин.

Кабаева хоним Путин билан муносабатлари ҳақида хабарлар пайдо бўлганидан бери диққат марказида бўлиб қолган.

2011 йилда Vogue муқовасида унинг француз Balmain модалар уйида қимматбаҳо либосда тушган сурати чоп этилган эди. У 2014 йилда Сочида бўлиб ўтган қишки Олимпиада ўйинларининг машъалчиси ҳам бўлган.

Яқинда, апрель ойида у Москвадаги ёшлар гимнастикаси фестивалида кўриниш бериб, ўзининг яширингани миш мишларни рад этди. У ерда у Россиянинг ҳарбий ҳаракатларини олқишлади. Баъзи нашрлар унинг никоҳ узуги тақиб юрганини таъкидлади.

Украинада уруш бошланганидан бери унга қарши санкциялар қўллаш талаблари янграмоқда.

The Wall Street Journal АҚШ Кабаевага қарши санкция қўллашни истамаяпти, чунки бу Путинга "шахсий зарба" сифатида қаралиши ва бу кескинликни янада кучайтириши мумкинлигидан хавотирда.

Аммо санкция масаласи ҳеч қачон тўла истисно қилинмаган. Апрель ойида Оқ уйдан нима учун у охирги рўйхатда йўқлиги ҳақида сўрашганида, матбуот котиби "Ҳеч ким хавфсиз ҳолатда эмас" деб жавоб берди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek