Янгиланди, Украина: Путин Донецк ва Луганскни мустақил, деб тан олишини тасдиқлади, ишғол хавотири кучайди Video Rossiya Ukraina Dunyo Yangiliklar
Сурат манбаси, kremlin.ru
Путин халққа мурожаатини якунлади. Украинанинг икки бўлгинчи шарқий минтақаси мустақиллигини тан олишини ўзи ҳам тасдиқлади. Лозим ҳужжатларга имзо чекиб, парламентдан уларни имкон қадар тезликда маъқуллашини сўради. Бу энди Россиянинг Украина шарқига очиқча қўшин юборишига йўл очади.
Бундан аввал Кремль бу хусусда расмий баёнот билан чиққан ва Путиннинг қароридан қолган барчани огоҳ этганди.
Расмий Киев эса, воқеаларнинг бу каби ривожини Украинага бостириб кириш учун қилинаётган провокацияга қиёслаганди.
Икки бўлгинчи минтақа лидерлари бугун, душанба куни Россия президентига расман мурожаат қилишган.
Ундан ўзларини мустақил, деб тан олишини сўрашганди.
Путин бунинг ортидан ушбу масалани Россия Хавфсизлик Кенгашининг "йирик" ва "фавқулодда" йиғинида кўриб чиққан.
Буни шу бугуннинг ўзидаёқ ҳал қилиши ва бир қарорга келишини айтганди.
Кремлнинг баёнотида айтилишича, Путин Франция ва Германия лидерларини ўзининг ниятидан огоҳ этган.
Сўнгги янгиликка АҚШ ва НАТОнинг муносабати ҳозирча маълум эмас.
Ғарб Россия шу кунларда Украинага ҳужум қилади, деб турибди.
Украина инқирозига барҳам беришга қаратилган Минск келишувларида Украинанинг бу икки бўлгинчи минтақасига мухторият бериши кўзда тутилган.
Аммо имзоланган сўнгги саккиз йил ичида уларнинг бирор бир банди бажарилмаган.
Расмий Киев бу каби бир қадам Украина ичкарисида Россия томонидан назорат қилинувчи ҳудудларнинг пайдо бўлишига асос яратишидан хавотирда.
Таҳлил:
Алоқадор мавзулар:
Куннинг тарихчаси ўрнида
Хавфсизлик Кенгашида Россия Давлат Думаси ва Федерация Кенгаши спикерлари Донецк ва Луганскни мустақил, деб тан олишга чақиришди.
Уларга кейин ҳокимиятнинг бошқа вакиллари ҳам қўшилишди.
Бир қарорга келишдан аввал Путиннинг АҚШ президенти билан гаплашиб олиши айтилган.
Аммо Россия президенти шу бугуноқ бу масалани ҳал этишини баён қилганди.
Донецк ва Луганск 2014 йилги қуролли низолар ортидан ўзларини Украинадан мустақил, деб эълон қилишган.
Аммо уларни шу пайтгача дунёнинг бирор бир давлати уларни расман тан олмаган.
Россия бу икки минтақадаги бўлгинчиларни ҳарбий жиҳатдан дастаклаб келишда айбланади.
Аммо расмий Москва Украина ва Ғарбнинг бу айбловларини изчил равишда рад этади.
Куни-кеча Россия Давлат думаси ҳам худди шундай сўров билан Путинга мурожаат қилишга қарор қилганди.
Украинанинг икки шарқий бўлгинчи минтақаси ҳозир яна диққат-марказда.
Одамлари Россияга эвакуация этилишмоқда.
Раҳбарлари оммавий сафарбарлик эълон қилишган.
Путин эса, у ерда этник руслар "геноцид" қилинаётганини даъво қилишга ўтган.
Россия сўнгги саккиз йил ичида бу икки минтақадаги 70 мингдан ортиқ одамга ўзининг паспортини берган.
Украина: Россия устма-уст кутилмаган баёнот билан чиқди. Путин ўзи Байден билан гаплашмоқчими ёки йўқми? АҚШ янги даъвода
Сурат манбаси, official
Россия Хавфсизлик Кенгашининг "йирик" ва "фавқулодда" йиғинини чақирди. Йиғинни Путиннинг ўзи ўтказмоқда. Кремль Путин-Байден саммитини савол остига олди.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Москвадан олинаётган хабарларга кўра, Хавфсизлик Кенгашининг "йирик" ва "фавқулодда" йиғини бугун, кун охирига режаланган.
Шу соатларда йиғин сабаби ва кун тартиби тафсилотлари маълум эмас.
Аммо уни Россия президентининг ўзи ўтказиши айтилмоқда.
Йиғин Ғарб Россия шу кунларда Украинага бостириб киради, деган огоҳликларини такрорлаб турган бир пайтга тўғри келмоқда.
"Аниқ режаси йўқ..."
Кремлнинг яна баён қилишича, ҳалича Путин-Байден саммитининг аниқ режаси йўқ.
Саммит таклифи билан Франция президенти чиққан ва буни Оқ уй ҳам маъқуллаганди.
Байден Россия Украинага бостириб кирмаса, Путин билан мулоқот қилажагини айтганди.
Россия президенти матбуот котибига кўра эса, бу ҳақда аниқ бир гап айтишга ҳали эрта.
Аммо Дмитрий Песковнинг таъкидлашича, Россия музокараларга очиқ.
Европа Иттифоқи ҳам Путин ва Байден гаплашиб олиши керак, деган мавқеъда.
Украина Ташқи ишлар вазири эса, иттифоқ Россияга санкциялар киритишига умид қилмоқда.
Дмитрий Кулеба ҳозир Брюсселда, у Европа Ташқи ишлар вазирлари билан музокаралар олиб боради.
Янги даъво
Худди шу манзарада Америка Қўшма Штатлари янги даъво билан чиққан.
Ўзларидаги разведка маълумотлари Россияда Украинага бостириб кирган тақдирда, "ўлдирмоқчи ёки жамлоқларга юбормоқчи бўлган" украиналикларнинг рўйхати борлигига далолат қилаётганини айтган.
Бу ҳақда Америка оммавий ахборот воситалари хабар беришган.
Маълум бўлишича, Вашингтоннинг Женевадаги элчиси Бирлашган Миллатлар Ташкилотининг Инсон ҳуқуқлари бўйича комиссарига хат ёзган.
У ўз хатида Россиянинг ишғолдан кейинги режаси қийноқ, мажбурий бедарак кетишлар ва "кенг миқёсли инсоний азоб-уқубатлар"ни ўз ичига олишини иддао қилган.
АҚШ элчиси Украинада муҳожиратда бўлган Россия ва беларуслик диссидентлар, журналистлар, коррупцияга қарши курашган фаоллар, диний, миллий ва жинсий озчиликларга ўхшаш аҳолининг заиф қатлами вакилларини эҳтимолий нишонлар сифатида тилга олган.
"Айниқса, бизда Россия кучлари ҳарбий ишғол ортидан ўлдирилиши ёки жамлоқларга жўнатилиши керак бўлган украиналикларнинг рўйхатини тузаётганига оид ишончли маълумотлар бор", - дейилган унинг хатида.
Аммо АҚШ элчиси ўзларининг бундай хавотир билан чиқишларига айнан қандай жосуслик маълумотлари сабаб бўлганига ойдинлик киритмаган.
Путиннинг матбуот котиби эса, шу соатларда бунинг "мутлақ ёлғон" эканини айтиб чиққан.
Украина: Путин гаплашишга рози, аммо энди Байденнинг битта шарти бор ва Россия яна нима қилмоқчи?
Сурат манбаси, EPA
Сўнгги хабарларга кўра, Путин урушдан дипломатияни устун қўйишга кўнган. Аммо Беларусдаги қўшма ҳарбий машғулотларини чўзган. Донецк ва Луганскда эвакуация ҳамда оммавий сафарбарлик. АҚШ президенти эса, энди Путин билан ҳа, деганда, гаплашавермоқчи эмас.
Шарт
Оқ уйнинг баён қилишича, Россия Украинага бостириб кирмаган тақдирдагина, Байден Путин билан гаплашади.
Франция президенти икковлонни гаплашишга кўндириш учун сўнгги бир неча соат ичида "қаттиқ ҳаракат қилган".
Бўлажак музокаралардаги асосий мавзу эса, оташкесин бўлади.
Украина инқирози Европанинг бу яқин тарихидаги энг ёмони экани айтилади.
АҚШ разведкасининг тахмин қилишича, Россия босқинга тайёр.
Аммо расмий Москва ҳозир ҳам ўзининг Украинага ҳужум қилиш режаси ва нияти борлигини рад этади.
Россия худди шу манзарада Беларусдаги йирик қўшма ҳарбий машғулотларини чўзган.
Расмий Минск бунга Украина шарқидаги "вазиятнинг ёмонлашиб бораётгани"ни ҳам сабаб бўлганини айтган.
Якшанба куни тугаши керак бўлган қўшма машқларга Россия ўн минглаб ҳарбийсини ташлаган.
Беларусь ҳам Россия каби Украинага чегарадошдир.
CNN га гапирган АҚШ Давлат котиби "ишғол ёқасида турганликлари"ни айтган.
"Бугунги воқеълик вазиятнинг ўта жиддий эканига далолат қилиши"ни иддао қилган.
Кучаяётган танглик
Сурат манбаси, MAXAR VIA REUTERS
Кремлнинг маълум қилишича, Путин тангликни кучайишида Украина ҳарбийларини айблаган.
Расмий Киев эса, буни рад қилиб чиққан.
Аксинча, Россия урушга баҳона излаб, иғвогарлик қилаётганини айтган.
Франция президентига кўра, шунга қарамай, ҳар икки давлат раҳбари ҳам Нормандия формати доирасида гаплашиб олишга рози бўлишган.
Нормандия тўртлиги Украина инқирозига ечим топиш учун тузилган.
Унга Россия ва Украинадан ташқари яна Франция ва Германия ҳам киради.
Умид ва хавотирлар
Британия Бош вазири Путиннинг Макронга берган ваъдасини хуш қаршилаган.
Борис Жонсон буни Россия президентининг дипломатияни ҳануз назардан буткул соқит этмагани далолатига йўйган.
У Путинни "таҳдид қилишни тўхтатиш" ва қўшинларини Украина чегарасидан олиб чиқиб кетишга чақирган.
Путин ва Байденни гаплаштириш учун Франция президенти Россия лидерига икки бор сим қоққан.
Орада 15 дақиқа АҚШ президенти билан ҳам гаплашиб олган.
Франция президенти маъмуриятининг маълум қилишича, бўлажак саммитнинг қолган тафсилотлари ҳар икки давлат ташқи ишлар вазирларининг пайшанба кунги мулоқоти чоғида муҳокама этиб олиниши мумкин.
Оқ уй Франция президентининг таклифини тасдиқлаб баёнот чиқарган.
Аммо унда Россия Украинага тўлақонли уруш очиш учун ҳануз ҳозирлик кўраётгани айтилган.
Россия Украинага барибир бостириб кирса, АҚШ бунга "зудлик билан қақшатқич жавоб беражаги" яна бир бор баён қилинган.
Разведка ва тахминлар
Сурат манбаси, ERIK ROMANENKO\TASS
Байден маъмуриятининг тахминича, Донецк ва Луганксдагилари илова Россия Украина атрофида ҳозир 190 мингга яқин аскарини тўплаган.
АҚШнинг Maxar ширкати олган янги сунъий йўлдош тасвирлари Украина атрофида Россия ҳарбийлари ва зирхли уловлари сони янада ортганлигини кўрсатган.
АҚШ медиасининг хабарлари Вашингтон Россиянинг Украинага ҳужуми муқаррар, деган мавқеъда эканини англатади.
CBS Newsнинг хабар беришича, АҚШ Россия қўмондонларининг ҳужумга ўтиш борасида буйруқ олишгани, ҳозир жанг режасини тузишга киришганликлари ҳақида разведка маълумотларини қўлга киритган.
Агар, мазкур хабарга таянилса, ишғол аввалига кибер ҳужумдан бошланади, сўнгра ракеталар билан ва ҳаводан зарба берилади, бундан кейинги ҳаракат эса, пойтахт Киевни босиб олишга қаратилади.
Исми ошкор этилмаган АҚШ разведкаси мулозимининг телеканалга айтишича, ҳозир Россия одатий Қуролли кучларининг 75 фоизга яқини Украина атрофида.
Бунча катта сондаги Россия ҳарбийсининг Украинага зарба бериш масофасида тўпланиши ғалати, деб айтган манба.
Аммо Украина Мудофаа вазирига кўра, ҳужум "эрта ёки индин" бўлмайди.
Алексей Резниковнинг айтишича, Украина чегараси яқинида Россиянинг "зарба берувчи гуруҳлари" ҳалича кўзга ташланмайди.
Сурат манбаси, Getty Images
Воқеаларнинг бошқа ривожида:
- Якшанба куни икки украин ҳарбийси қурбон бўлган. Украина шарқида оташкескин ўнлаб марта бузилган. Бўлгинчилар ва Украина ҳарбийлари бунда яна бир-бирларини айблаб чиқишган;
- Аҳолиси бир неча миллионлик Донецк ва Луганксдан минглаб одам Россияга эвакуация этилган. Бу икки бўлгинчи минтақада уруш учун оммавий сафарбарлик эълон қилинган;
- АҚШнинг Москвадаги элчихонаси Россиядаги фуқароларини ҳушёр бўлишга чақирган. Уларни Украина билан чегара ҳудудлари илова жамоат жойларида ҳужум эҳтимоли билан огоҳлантирган. Россия Ташқи ишлар вазирлиги буни қоралаган;
Путин Украинанинг НАТОга олинишига қарши.
Буни ўз чегараларига таҳдид, деб билади.
НАТОдан бу борада кафолат беришини истайди.
Аммо иттифоқ ва Ғарб унинг талабини рад қилган.
Россиянинг бу галги ишғоли 2014 йилдагисидан кўра ҳалокатли бўлади, деган қўрқувлар бор.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
